这是一首感恩ê诗歌，tùi第1节就thang看出chit首诗是tùi巴比伦tńg去了后写ê。Kā chit首诗歌比较khah第四十二篇、第四十三篇这两首诗篇，就会看出二者之间ê极大cheng差；第四十二篇kah第四十三篇，lóng是teh祈求上帝带领in重头tńg来故土、家园、圣殿ê诗歌。Á这第一二六首诗篇，则已经tńg来故乡，因为án-ne，诗中充满欢喜、感恩ê声音。

第1到3节，诗人讲今á日ē-tàng tńg去故乡，明明是ná亲像做一场「梦」仝款，m̄-koh事实是「梦想成真」，hit种心中ê欢喜，只有ē-tàng用「欢笑」、「快乐歌唱」来表现。因为是上帝chiah有办法kā in tùi奴隶之地带领tńg来故乡来。

圣经讲上帝「成就大事」，通常除了用来指上帝ê创造外，mā用来形容上帝带领他ê子民离开埃及，以及后来tùi奴隶之地带领in tńg来故乡重建家园。

第4节，「像雨kā水带tńg来干涸ê河道」，意思是teh指祈求上帝复兴in，因为in tú tú tńg去故乡，he是荒芜甚久ê故土，亟需要上帝ê帮助，in chiah有能力重新建造起来。

第5到6节，这是流行tī巴勒斯坦地区ê谚语，当地ê人有一种看法，tī掖种ê时chūn，一面掖种、一面流目屎，就ē-sái掖落来去ê种籽得tio̍h掖种者ê性命之滋润，成长kah khah美好。Tī chia，诗人用来表示只要有认真重建荒废ê耶路撒冷、故乡、家园，必定会得tio̍h上帝ê赐福，hō͘ in得tio̍h满溢ê成果，而显出性命ê欢喜。