诗篇 117章1节 到 118章29节   背景资料  上一笔  下一笔
这是诗篇全部一五○篇中siōng短ê一首诗歌,mā是o-ló诗歌。主要是teh宣召民众来o-ló上帝ê恩典。因为kan-taⁿ有简短ê两节kah四句诗句,因为án-ne,mā有学者认为这应该m̄是独立ê一首诗歌,却是kah第一一六篇连结,而且是属tī第一一六篇ê结语。M̄-koh有ê人mā认为kah第一一八篇连结做伙吟唱会khah好。不过,无论是kah前á是后同齐吟唱,lóng显现出它ê特色,就是chit首诗teh呼召全体民众来敬拜、o-ló上帝。伊呼召ê对象m̄-nā是以色列人民,mā是呼召全世界所有ê人民tio̍h敬拜上帝、歌颂 上帝ê慈爱。

Chit首诗篇mā是凸显整部诗篇ê中心信息:上帝ê慈爱kah信实。上帝ê慈爱是丰富ê,而且是永bē改变ê。因为他信守kah他子民所立ê约,beh永远成做以色列人民ê上帝,而in就是上帝ê子民,会kah in同在,救in脱离敌人加hō͘ in ê锁枷,保守in免受敌人ê威胁kah迫害,chit点一直tī以色列民族ê历史中呈现出来,tùi古到chit-má都无改变。

Chit首诗篇kah-ná是tùi真chē诗人所写ê诗歌中取材,经过一段时间了后,编撰而成ê一首诗歌。读chit首诗歌,真紧会想起宗教改革ê先驱马丁路德,伊siōng喜爱chit首诗歌。Tī伊所写ê诗歌中,会发见kah chit首诗ê内容非常接近(参考长老教会台语圣诗320首「上帝是咱安全要塞」)。因为chit首诗是描述tùi仇敌手中得tio̍h解脱ê感恩诗歌。因为án-ne,可能是teh表明以色列人民tùi埃及出来,á是tùi巴比伦奴隶之地回乡tńg去重建家园。

第1到4节,宣召所有ê人来敬拜上帝,为tio̍h是beh感谢上帝ê慈爱永远长存、至善。第1节ê诗句mā同时出现tī第一○六篇1节、第一○七篇1节等等。

Chia koh一pái提起「以色列人」、「祭司」、「敬畏上主ê人」等,就是teh指所有认bat上帝,知影敬拜上帝,mā会带领人来敬拜上帝ê人,chit种人lóng会清楚知影上帝是仁慈ê。

第5到9节,chit段诗歌表示诗人tī危难中,祈求上帝ê救助,上帝就伸手救助了伊。诗人见证讲,只要祈求上帝ê帮助,就ē-tàng赢过任何其他ê气力。只要有上帝同在,就m̄免惊惶任何对性命威胁ê气力。

第10到14节,诗人Tī chit段诗歌中描述敌人ê chē ná亲像tùi蜂窝中飞出来ê蜜蜂仝款,tùi四面八方围起来beh攻击,m̄-koh诗人知影只有上帝chiah是救主,因为án-ne,伊求上帝,上帝救助了伊,hō͘伊tùi被攻击倒tī土脚,mā ē-tàng khiā起来,脱离险境。

第15到18节,这是一段诗人teh歌颂上帝ê诗歌,诗人表示hō͘ 上帝严厉ê惩罚á是管教,差一点á就丧生,m̄-koh上帝怜悯,展现他拯救ê大能力,hō͘伊tùi死亡中脱离出来。

第19到21节,tùi第19节开始,就是一种启应ê方式,当领诗ê人带领群众来到圣殿chìn前,伊大声hoah圣殿管理者开启圣殿ê门,然后就唱出「开启圣殿ê门」,群众续落来回应「我beh入去颂赞上主」,续落来依序领唱者一句,群众回应一句。

第22到23节,tī新约圣经中,耶稣kah众使徒lóng引用过(参考马太福音廿一:42,马可福音十二:10,路加福音二十:17,使徒行传四:11,以弗所书二:20,彼得前书二:7)。表示人看bē起ê,却是上帝所重视ê。诗人用chit种方式teh表达,当敌人轻视伊ê时chūn,上帝看顾敬畏他ê人。

第24到25节,chit两节teh说明上帝出手拯救,就得tio̍h胜利。这是值得庆祝ê时刻。第25节「上主ah,救阮,拯救阮」,chit句诗歌mā就是大家所熟悉ê「和散那」ê意思。这mā就是耶稣骑驴á入耶路撒冷城ê时,民众hoah出ê o-ló诗(参考马可福音十一:9—10)。

第26到29节,当群众lóng来到圣殿门口,祭司就宣告上帝赐福所有参与敬拜歌颂行列ê群众。第27节「the̍h树枝向(ǹg)祭坛行入」chit句诗词,有学者认为chit首诗是用tī Tòa棚节ê诗歌。第29节kah第1节仝款。

重新查询 专卷研经 诗篇系列
错误回报,请联系comm[@]fhl.net