Chit篇mā是一首感恩ê诗歌，主要是诗人teh经历过死亡边缘ê困境中，得tio̍h上帝ê拯救而献上ê诗歌。Tùi第14节、第17节，以及第19节ē-tàng看出，诗人bat到圣殿去献上还愿ê祭。因为án-ne，chit首诗mā被用tī圣殿ê敬拜礼仪中。

第1到11节，chit段诗歌是teh讲述诗人被拯救ê经过。诗人一开始就讲上帝「垂听」了伊ê「祈祷」，这是伊siōng感觉欣慰ê事。而且是「每pái求告」上帝，上帝lóng会「垂听」，这是伊即使陷入tī siōng危险ê困境中，mā ē-tàng有坚定ê信心ê原因。

第6节诗人讲上帝「保护单纯ê人」，chia ê单纯，mā thang讲心内无诡诈ê意思，表面上看起来kah-ná是愚戆ê款，m̄-koh心内是纯洁ê。Chit种人chiah ē-tàng进入上帝ê殿宇中敬拜上帝（参考诗篇廿四：3—5）。Chit种心内单纯ê人，mā是谦卑ê人，伊知影上帝会鉴察人ê心内意念，m̄免隐藏，mā无可能隐瞒得tòa上帝ê目睭。因为上帝知影所有ê一切。

诗人mā Tī chit段诗歌中表示，就算tī「非常郁卒」中，伊iáu是仝款，对上帝「保持信心」，chit点是得tio̍h上帝赐福ê基本要件。

第12到19节，是诗人表示还对上帝所下ê愿。Chit段诗歌真清楚，诗人得tio̍h上帝拯救ê恩典，而且是tùi死亡ê边缘中被救出来。因为án-ne，对伊来讲是真大ê恩典，伊一定会表示感谢。Á这感谢是beh tī上帝子民ê聚会中表示出来。

第15节是真有意思ê经文；伊讲：「上主看他圣ê 子民死去，非常m̄ 甘。(全民版)」这是teh指一个到死lóng忠于上帝，bē改变心志ê人，chit种子民，tī上帝看起来是非常珍贵ê，所以一定会拯救chit种人。Thang看出作者感受tio̍h家己性命tùi死亡ê边缘中hō͘ 上帝拯救tńg来ê欢喜。Mā可能伊自认是真卑微ê人，m̄-koh，上帝并无因为án-ne就疏忽了伊。因为任何一个人ê性命tī上帝面前lóng是贵重ê。

第16节thang看出chit-ê诗人全家lóng是延续对上帝忠实ê传承，无改变。Á chit节ê「释放」，mā teh表示tùi死亡ê境况中脱离出来。

第18 kah 14节完全仝款，表示伊beh tī公开ê场合为上帝这奇妙ê救恩做见证。