箴言 9章1节 到 9章18节   背景资料  上一笔  下一笔
Tùi chit章thang看出箴言ê特色,就是ài用相对性ê句型,án-ne thang帮助人一读就明白「智慧」kah「愚戆」之间ê差别。作者提醒读者「敬畏上主」就是智慧ê来源。Chit章ê另外一个特色,就是第1到6节,kah第13到18节,ē-sái讲是非常明显ê对照句。中间ê第7到12节,是前后两段ê对照句,用愚戆者kah智慧者之间差别ê性格作教导素材,说明教导愚戆者是食力兼pháiⁿ看;相对ê,明智敬畏上帝ê人,知影智慧ê重要性,只要一讲,伊就bat,而且会尊敬教导者。

Tī新约福音书中记载耶稣用chit种相对ê句话来教导学生ê例真chē,亲像tī马太福音第七章13到14节,伊提起进入窄门是通往永生,通往灭亡ê路好行却真阔阔;koh亲像第七章24到27节,有两种厝ê根基,有一种是建造tī沙土上,tú-tio̍h风雨就倒了;另外一种是建造tī石磐顶,m̄惊风吹雨phah。Chit种教导真容易hō͘听道者明白。

第1节,chia用智慧者建造厝做譬喻。所谓「立七根柱子」,可能kah创世记第一章七工创造完成ê「七」有关系。Koh讲,「七根柱子」,mā隐喻tio̍h厝真大,表示主人是一个真有能力ê人,以siōng美好、完整ê方式建造房屋。

第2到3节,tī建造房屋完成了后,建造者非常欢喜设下「筵席」宴请宾客。然后派女仆去街上邀请人来加入伊ê主人ê筵席。然后,主人mā会到「城里ê siōng koân处呼喊」,表示chit件美好ê筵席是公开ê,欢喜ê人lóng thang来加入。Chia ê「siōng koân处」,mā teh表示一种极高ê权威、能力,mā是siōng好ê防卫地点。这已经teh表明真正智慧,ná亲像有siōng好ê性命防卫能力仝款。

第4到6节,呼喊ê对象,就是「愚戆人」,主要就是beh帮助in远离愚戆,行向智慧ê「路」,这已经teh隐喻,只要进入智慧者所建造ê城池,á是智者ê厝,就算是愚戆者mā会得tio̍h智慧。

第7到9节,讲有智慧ê人,bē随便纠正人ê过错,因为对「傲慢人」来讲,别人对伊ê纠正,ná亲像针刺一般ê痛苦,m̄-nā无帮助,反tńg是带来仇「恨」,「伤害家己」。M̄-koh相对ê,教导「明智ê人」,结果是完全颠倒;明智ê人欢喜受教,因为án-ne,教导chit种人会受tio̍h「尊重」,而且jú教导伊,会hō͘伊「koh khah明智」、「增长学问」。

第10到12节,chit三节真清楚说明智慧ê来源,m̄是人原本拥有,却是tùi上帝来ê赏赐。因为án-ne,真正明智ê人,知影「敬畏上主」,因为chit位创造并赏赐性命ê主,chiah是智慧ê泉源。敬畏chit位性命ê赏赐者,得tio̍h利益ê是家己;相对ê,m̄知敬畏上主ê人,「亏损」ê mā是家己。
Ná亲像头前所提起ê,第13到18节kah第一段ê 1到6节,差不多是完全相对称ê句型。

第13到15节,仝款是到街路上去呼喊,m̄-koh无知ê愚戆者会「像一个喧嚷、无知、无耻ê cha-bó͘人」仝款讲个无停,却lóng是无用ê物件。Siōng危险ê所在,就是chit种愚戆ê诱惑力mā是非常大,它mā会到城中ê siōng koân处显示力量,为tio̍h是beh迷惑人心,向hiah-ê「匆忙赶路ê人呼喊」,因为chit种人无有时间思考,看tio̍h ê lóng是外表亮丽ê权威。

第16到18节,呼喊仝款ê对象「无知ê人」,m̄-koh提供ê,m̄是家己ê能力所建造起来,却是用「偷」the̍h得tio̍h ê「水」kah「偷来ê饼」,结果是引诱人进入「死亡」,掉落tī「阴间ê深处」无法度脱离。Kah第5到6节ê景况完全颠倒。第17节chia讲tio̍h「偷来ê水甜些」,这是因为tī中东地区有bē少地方是干旱缺水地带,因为án-ne,水,往往是珍贵,需要用极高ê价钱买。「偷来ê水甜些」,是因为缺水严重,嘴干久了,感觉就无仝款。Tī chia,意思是teh指愚戆人往往会为tio̍h tam-tio̍h目nih-á ê甜头,而会失去性命。

重新查询 专卷研经 箴言系列
错误回报,请联系comm[@]fhl.net