民数记 9章1节 到 9章14节   背景资料  上一笔  下一笔
Chit章讲tio̍h两个重要ê主题,一是关系守Pôaⁿ过节ê规律,这tī出埃及记第十二章1到28节、43到51节等等;利未记第廿三章5到14节mā有记载。M̄-koh tī chia特别探讨若是有人tú-tio̍h尸体,表示chit种人已经无清气à,是m̄是thang守Pôaⁿ过节ê规律。二是关系上帝用云彩降临tī圣幕中,表示他tī圣幕里,chit时,以色列人民是m̄是beh行动ê事。

Ná亲像头前提过ê,chit段经文是讲tio̍h有关Pôaⁿ过节tio̍h遵守ê规矩,kah出埃及记第十二章、利未记第廿三章所记载关系Pôaⁿ过节ê相关细则虽然无仝,m̄-koh却thang互补。

第1到5节,tī出埃及记第十二章记载以色列人出埃及chìn前一夜,第一pái守Pôaⁿ过节,然后in出埃及后,经过三个月ê时间,行到西奈山下(参考出埃及记十九:1),tī chia是经过一年ê时间,守Pôaⁿ过节ê时间来临。以后lóng是照规定tī每年正月十四日举行,而且所有ê人(包括外侨在内)lóng一定tio̍h参加。因为án-ne,chia记载ê Pôaⁿ过节,thang讲正式kā它律法化。Chia强调「上主命令摩西」,以色列人民「lóng一一遵行」。

第6到8节,chit段经文特别ê所在是讲tio̍h有人因为不慎接触tio̍h尸体ê时,该án怎chiah好办理ê事。因为根据摩西律法ê规定,只要摸到尸体,就成做无清气ê人。因为án-ne,in来询问摩西为甚么in无法度teh指定ê时间向上帝献祭?摩西并m̄是家己决定tāi-chì,所有ê律法规矩lóng是出tī上帝ê旨意。因为án-ne,伊回答需要请示上帝ê旨意。这mā teh说明一件重要ê认bat:m̄是摩西teh决定以色列人民ê律法事务,却是上帝teh决定。因为án-ne,遵守摩西律法等于遵守上帝ê教导。

第9到10节,chit段经文是摩西请示上帝了后所得tio̍h ê回应。Chia包括两种对象,一是摸到尸体ê人,二是外出远门ê人mā想beh守这重大节期者。

第11到12节,chit两种人thang延迟一个月ê时间,mā就是tī二月14日暗时守Pôaⁿ过节。而且所有ê条例lóng tio̍h照Pôaⁿ过节ê规定,bē-tàng因为延迟一个月就有所省略。

第13节,chit节提起故意不守chit节期ê人,就是看轻上帝ê拯救恩典ê人,chit种人无法度成做上帝ê选民, tio̍h kā伊除名。

第14节,寄居tī以色列人民中间ê外族人,若是beh kah以色列人民守chit节期,mā是仝款,所有ê规矩lóng tio̍h遵守。照出埃及记第十二章48节ê规定,chiah-ê寄居者á是外族人,若是beh kah以色列人民守Pôaⁿ过节,第一个要件,就是beh先行割礼。

换句话讲,任何人beh守Pôaⁿ过节ê活动,就一定tio̍h一切lóng kah以色列人民tī chit-ê节期所要求ê仝款,bē-tàng有省略。Á所有chiah-ê要求thang参考出埃及记第十二章。

重新查询 专卷研经 民数记系列
错误回报,请联系comm[@]fhl.net