民数记 7章1节 到 7章9节   背景资料  上一笔  下一笔
Chit章是摩西五经(指创世记、出埃及记、利未记、民数记、申命记五本)中siōng长ê一章,共计长到89节。Chit章mā thang续落去tī出埃及记第四十章了后,摩西巡视圣幕全部lóng完工,而且看见上帝ê云彩降临tī圣幕里,显示出圣幕ê荣耀,以色列人民看见,就知影上帝临在圣幕中,然后chit章开始说明每一个支派带来in ê礼物献hō͘上帝。因为án-ne,mā thang明白chit章siōng主要是teh绍介以色列十二支派ê代表者,mā是以色列各支派ê领袖(长老),in teh代表以色列各支派来到圣幕里献祭hō͘上帝。

Chit章mā充分显示出「祭司文献」ê特色,ná亲像创世记第一章teh描述创造ê过程仝款,强调献祭ê过程是相当有秩序ê。

若是注意第九章15节,就会发见hi̍t节mā是讲「圣幕khiā立ê hit一工」,这表示tùi第七章到第九章,这之间记载ê lóng是kah圣幕ê规矩有密切关系。

Chit段经文记载圣幕经过摩西检查认为完美了后,伊就用圣油抹圣幕,kah圣幕内所有ê一切器具,表示分别为圣ê意思。

第1到3节,当摩西抹所有一切器皿了后,就kā它「奉献hō͘上主」,意思就是chiah-ê物件lóng是属tī上帝ê,是分别为圣出来ê物件,一般人是bē-tàng摸tio̍h á是移动ê。续落来是以色列各支派ê领袖,就带tio̍h代表in支派ê礼物来奉献hō͘上帝。In用十二头公牛teh代表十二个支派。

第4到5节,利未人tī圣幕内所分派ê工作m̄是teh献祭ê礼仪,因为这部分只有祭司chiah thang做。In主要工作是作祭司ê帮手。

第6到9节,利未支族ê代表有革顺kah米拉利。Lóng tio̍h分派in看管十二支派奉献ê篷车,以及公牛,只有哥辖ê支派无,因为in负责圣幕内所有ê圣物。

重新查询 专卷研经 民数记系列
错误回报,请联系comm[@]fhl.net