Chit章就是根据头前所提起有关人口调查了后，teh移动ê时，以圣幕做中心，十二支派分别tī东、南、西、北等面维护tio̍h圣幕ê安全kah神圣。然后koh分别清楚利未族人应该分担移动圣幕ê各项工作。

因为圣幕是tī扎营区域ê中央，因为án-ne，chit章就真清楚讲tio̍h怎样hō͘以色列人民保持洁净ê身心，免得因为无清气á hō͘圣幕遇tio̍h污秽。Koh讲，因为圣幕teh代表上帝同行，因为án-ne，以色列人民需要teh生活伦理上保持洁净，chiah ē-tàng进入敬拜上帝。

这短短四节，讲出以色列人民对圣幕ê重视。为tio̍h beh保持圣幕ê神圣，凡是hō͘人认为「无清气」ê对象，一律不准进入参加敬拜ê行列。

第1到2节，chit两节列出bē-tàng khiā起tī扎营ê营区内ê人，包括有癞ko病患、遗漏症ê人，以及摸到尸体ê人等，lóng一定tio̍h离开营区。因为各族扎营tī圣幕ê四周，表示上帝ê慈爱照顾到营区各族中。无清气者一定tio̍h送到chiah-ê营区之外，chiah ē-tàng避免污秽了圣幕ê神圣kah圣洁。