民数记 27章12节 到 27章23节   背景资料  上一笔  下一笔
Chit段经文是teh说明摩西年近老迈ê时chūn,mā是伊beh交带后事ê时刻。伊照上帝ê旨意按立约书亚继承伊ê领导权。其实,早tī tú出埃及无久,以色列人民第一pái kah亚玛力人交战ê时,就已经teh凸显约书亚ê领导能力(参考出埃及记十七:9),然后摩西上山去领取上帝颁布ê诫命ê时,就是带tio̍h约书亚当助手(参考出埃及记廿四:13),民数记第十一章28节特别提醒,讲约书亚tùi少年时代就是摩西ê助手,而且伊kah迦勒两人排除众议,坚持beh进入迦南地(参考民数记十四:6)。Chiah-ê资料lóng tī为chit-ma2chit段经文作准备。

第12到14节,chia讲是「亚巴琳山」,tī申命记第三十四章1节,讲是「尼波山」。上帝真清楚kā摩西讲,伊将kah亚伦仝款死去,原因是in两人lóng「teh chhōe旷野违背」上帝ê旨意,因为无「承认」上帝「神圣ê能力」。Chit件事tī民数记第二十章1到13节有记载,m̄-koh并无真清楚说明摩西有toh一kóa举止动作违背上帝。只是tī he事件后无jōa久,亚伦就往生à。

第15到17节,摩西听tio̍h上帝án-ne对伊讲了后,表现出来ê就是上帝忠实ê奴仆态度,完全顺服。伊讲上帝是性命ê源头。并向上帝祈求ē-tàng差派一个人,thang hō͘ in有好ê牧者来带领以色列人民。

第18到23节,上帝真清楚讲出约书亚就是一个「有才能ê人」,beh按手tī伊头壳顶,设立伊为领导者。按立ê礼仪,就是tī大祭司以利亚撒kah众人面前,由摩西按手tī约书亚ê头壳顶,然后公开宣布约书亚ê使命。并且ài kā权力分hō͘约书亚。申命记第三十四章9节,作者讲因为摩西ê按手,hō͘约书亚「充满智慧」,而且以色列人民听从伊。

值得注意ê是tī第21节,chit节强调大祭司ê角色非常重要,就是tùi chia开始,讲约书亚mā tio̍h听从以利亚撒ê话。M̄-koh大祭司以利亚撒bē-tàng专权,伊一定tio̍h凡事请求上帝ê旨意,帮助约书亚kah以色列人民听从上帝ê旨意。


重新查询 专卷研经 民数记系列
错误回报,请联系comm[@]fhl.net