民数记 15章1节 到 15章16节   背景资料  上一笔  下一笔
Chit章主要是讲tio̍h有关献祭ê条例。Chit段有关献祭ê条例部分,特别强调用「细面粉」,它是用小麦磨成ê。Chit章kah利未记第二章无仝ê所在,是chit段经文详细说明献祭ê时用ê物件量chē少,亲像油jōa-chē公升、细面粉jōa-chē公斤等。Tī chit章中mā特别提起有关赎罪祭ê条例。Koh讲,chit章mā提起一个违背安息日ê例,当做惩罚违反安息日规矩者ê警戒。Mā为以色列cha-po͘人beh穿ê外衫设定一个规范。

Chit段经文讲tio̍h有关献烧化祭、还愿祭、自愿祭,á是宗教节期ê献祭条例,需要加上素祭品ê规矩。

第1到3节,chia提起以色列人民有一工到à「上主赐hō͘ in ê土地ê时chūn」,对tī献祭hō͘上帝ê时,一定tio̍h遵守ê规矩。Chiah-ê属tī烧化祭ê牲礼,包括有「公牛、公羊、绵羊、山羊」等。

第4到10节,chit段经文真清楚规定,每pái献烧化祭,lóng tio̍h搭配用小麦磨成ê「细面粉」,然后调kah tio̍h橄榄油,并且配上酒,án-ne同齐献hō͘上帝。而且是无仝ê羊,á是牛,所搭配ê细面粉、橄榄油,kah酒ê份量就有无仝。

第11到12节,chit段经文讲若是献上ê牲礼是加倍,搭配ê素品mā是仝款tio̍h加倍。

第13到16节,chia ê规定真重要,讲述无论是以色列人民,á是寄居tī in中间ê外侨,无论寄居ê时间长á是短,只要是献祭,lóng tio̍h kah以色列人民仝款,无分别。因为tī上帝面前,所有ê人lóng仝款。换句话讲,只要是敬拜耶和华上帝ê人,所beh遵守ê条例就是仝款,bē有种族ê区别。

有一种见解,认为chia所提起ê「外族人」,是teh指已经被以色列人同化,成做in ê一份子。Mā因为án-ne,chiah-ê人chiah会跟tòe以色列人民去向上帝献祭。

重新查询 专卷研经 民数记系列
错误回报,请联系comm[@]fhl.net