民数记 14章1节 到 14章10节   背景资料  上一笔  下一笔
Chit章mā是记载有关hiah-ê受派前去窥探迦南地ê代表,带tńg来ê消息,以及因为in ê报告所造成ê影响。Tī第十三章bat提起有十个支派去窥探ê代表认为,比起迦南人,以色列人民就「像草蜢á仝款渺小」。chit-má第十四章则提起有两位被派去窥探ê人认为应该ài有信心进入迦南地,in就是用法莲支派嫩ê kiáⁿ约书亚,kah犹大支派耶孚尼ê kiáⁿ迦勒。M̄-koh,in两人报告ê时却差一点á被以色列人民用石头phah死。

为以色列人民chit种对上帝无信心ê态度,上帝mā非常艰苦心。上帝想beh用严厉惩罚来教示in,m̄-koh摩西恳求上帝ê怜悯kah赦免。上帝虽然是垂听摩西ê祈祷,m̄-koh却mā决定m̄ hō͘年满二十岁以上ê人进入迦南地,beh hō͘未满二十岁ê新生代进入chit-ê应允之地。

Chit段经文是讲tio̍h以色列人民听tio̍h chiah-ê代表ê报告后,产生真大ê困扰,人民开始感觉悲哀,上帝beh赏赐hō͘ in ê土地,竟然可能是koh一pái hō͘ in陷入奴隶悲惨生活之地,ná会是án-ne leh ?In甚至认为倒不如另选一位领导者来chhōa in tńg去埃及。

第1到4节,以色列人民koh埋怨起摩西kah亚伦来à。认为in带领in离开埃及,竟然是去一个令in感觉惊惶kah不安ê所在。In认为只要进入迦南地,一定会hō͘杀光,bó͘-kiáⁿ会hông掠去做奴隶á是被奸污。In认为不如tńg去埃及继续做奴隶来得好,甚至tio̍h选一个领袖chhōa in tńg去埃及。这等于是beh废掉摩西kah亚伦,用chit-má用语,就是叛变。

第5到9节,摩西kah亚伦坦覆 (thán-phak)tī土脚,并m̄是teh向人民请罪,却是teh向上帝祈求。In知影只有上帝chiah有办法解决chit种问题。因为是上帝ài in tùi埃及带领以色列人民出来ê。因为án-ne,上帝会家己解决chit种困难ê问题。

以法莲族ê领袖约书亚kah犹大族代表迦勒两个人出来对以色列人民讲话。伊两人所讲ê有几点重点:一是确实迦南地相当肥,á这mā是上帝应允ê要件。二是如果上帝欢喜以色列人民,就会亲自带领大家进入迦南地。三是bē-tàng背叛上帝。四是上帝会kah大家同在,ài有chit种信心。

第10节,m̄-koh in两人所讲,民众听bē落去,甚至想beh用石头phah死in,ē-sái讲是忽然看见上帝ê荣耀显现出来。若m̄是án-ne,约书亚kah迦勒就会hō͘ in用乱石phah死。

重新查询 专卷研经 民数记系列
错误回报,请联系comm[@]fhl.net