尼希米记 6章1节 到 6章19节   背景资料  上一笔  下一笔
Tùi chit章thang看tio̍h尼希米带领犹太人修筑耶路撒冷城墙ê经过确实真无容易,因为伊不断受tio̍h恐吓。每pái tú-tio̍h恐吓ê事,尼希米lóng是一再祈求上帝帮助伊,hō͘伊有智慧明辨上帝ê话语。

第1节,tùi chit节thang知影经过五十两工了后,全部修筑完成,除了进口处iáu未安置城门,其余是连一个缺口mā无。

第2到4节,因为尼希米非常谨慎,并且要求所有参与修筑城墙工作ê人,无论是tī日时头á是暗时lóng一定tio̍h穿好衫裤,而且lóng「Kā武器giâ tī手中」(参考四:22—23),因为án-ne,伊ê仇敌参巴拉、多比雅、基善等人设计想beh诱hō͘尼希米离开耶路撒冷城,到离约帕东南约十一公里远ê「阿挪」会面。其实,in ê目的就是beh hō͘尼希米远离耶路撒冷城,án-ne beh谋杀伊就bē tú-tio̍h犹太人ê阻挡。M̄-koh尼希米深知in ê pháiⁿ念头,因为án-ne,都无接受邀约,虽然in lóng是波斯帝国皇帝属下ê官员,m̄-koh尼希米有皇帝亚达薛西ê诏书thang防身。伊派人回覆in表示无法度前往, 因为工作繁重。前后四pái邀约,每pái尼希米lóng用仝款ê理由回覆。

第5到7节,chit段经文讲chiah-ê想谋害伊ê人,就án-ne发出第五封公文,所用ê理由lóng kah叛乱有关。In表示听tio̍h尼希米想beh造反ê消息,所以chiah会积极修建城墙,因为伊想beh自立为王,并且讲伊安排先知准备ài膏立伊为犹大ê王。恐吓尼希米讲chit件事一定会传到波斯皇帝hia去。因为án-ne,in要求尼希米一定会亲自kah in会商chit-ê tāi-chì可能带来ê影响。

第8到9节,尼希米回覆清楚表示这是in捏造ê,绝对m̄是事实。M̄-koh chiah-ê人就恐吓讲beh hō͘ chit项修建工程停顿落来。尼希米是一个敬畏上帝ê人,每pái tú-tio̍h chit种困难á是威胁ê时,伊就是用祈祷来向上帝倾诉,恳求上帝帮助伊。

第10节,尼希米tī危险ê时chūn去走chhōe先知ê声音,结果示玛雅却ài伊bih起来tī「圣殿ê圣所」,这是真奇怪ê建议,因为根据民数记第十八章7节ê规定,只有轮职ê祭司chiah thang进入「圣所」,其他人进入lóng一定tio̍h处死。因为án-ne,伊ê建议其实就是陷阱,beh hō͘尼希米即使不被仇敌刣死,mā beh hō͘犹太人祭司团认为伊亵渎「圣所」ê神圣,就算不处死伊,伊mā会成做大家所诟病ê对象,án-ne伊要领导犹太人修建城墙ê工作会愈困难。尼希米mā tùi chia知影chit位示玛雅乃是一位假先知,m̄是真正先知。Tùi第14节mā thang看tio̍h,当时假先知iáu bē少,包括女先知挪亚底。

第11节,尼希米拒绝tī chit困难ê时chūn逃避。其实,若beh逃避tú-tio̍h ê困难而活命,伊不回乡就好势。伊就是因为听tio̍h城墙无修好,荒废tio̍h,伊chiah决定请求亚达薛西皇帝准伊回乡。

第12到14节,尼希米省思了示玛雅ê建议后,chiah发见示玛雅已经被参巴拉、多比雅等人买收了,想用chit种计谋hō͘尼希米tī犹太人中间失去尊严,无领导权,án-ne,in阻碍围墙修建ê工作就thang达tio̍h。Tùi chia mā看tio̍h信仰堕落ê情况,就是先知mā接受o͘-se去陷害别人,这已经违背十诫ê第九诫à。

    第15到16节,chia真清楚讲kui个围墙ê工程经历过五十两工,终其尾完成。Hiah-ê计谋beh阻止chit项工程进行kah陷害尼希米ê人lóng感觉非常见笑,因为in无完成阻碍ê目标。M̄-koh in bē记得,chit项工程是上帝所允准beh重建ê。有上帝允准,他就会出手帮助。

第17到19节,chit段经文thang看tio̍h除了有假先知附kah chiah-ê反对尼希米ê仇敌之外,同时mā有bē少犹太人参与tī chit项反对尼希米ê计谋中,原因真可能kah耶路撒冷ê贵族有关。In反对尼希米,真可能是因为尼希米ài in kā sàn-chhiah同胞ê债务一笔勾消ê缘故(参考五:1—13),这mā说明当时in同意kā债务一笔勾消,并m̄是真心实意,却是碍tī面子。另外,mā有可能是kah in kah外邦cha-bó͘-gín-á结婚有关。因为尼希米kah以斯拉lóng是极力反对kah外族通婚。不过mā有可能是因为看tio̍h耶路撒冷城墙修好后,人民óa靠贵族协助之心必定大大减弱,相对ê,是对上帝ê信心大大加添,mā造成chiah-ê有权势ê人对尼希米ê不满。

重新查询 专卷研经 尼希米记系列
错误回报,请联系comm[@]fhl.net