Chit段经文记载两件事，第一件是第14到15节，讲彼得ê丈姆发烧，经耶稣「一摸伊ê手，就退烧」，续落来彼得ê丈姆就起来「接待耶稣」。马太福音chit种笔法表示：彼得ê丈姆服事耶稣，表示感恩ê意思。

Koh讲，chia提起彼得ê丈姆，表示彼得有结婚，而且tī后来出去传福音ê时，是chhōa bó͘同齐去（参考哥林多前书九：5）。

Tī第16到17节，chit两节虽然真简单teh说明耶稣ê工作，m̄-koh却是kā伊tī加利利所行各种神迹奇事，而且「kan-taⁿ用一句话就kā鬼lóng赶走，koh医好所有ê病人」，chit种话句，lóng是teh表示耶稣身上确实有特别ê能力。马太福音作者kā耶稣chit种一直为病人医ê工作，引用以赛亚书第五十三章4节ê经文来表示，hi̍t节经文原本表示上帝差遣来ê受苦奴仆，就是为tio̍h beh负担咱ê痛苦，chit种性命ê痛苦kah「罪」有密切关系。