耶稣tī「安息日」医病并无第一pái，tī马可福音第一章21到28节就有记载伊tī安息日到会堂，遇tio̍h一位被污灵附身ê人，耶稣随时医好伊，hit件医ê神迹hō͘大家大开眼目，惊kah gāng去无停（参考马可福音一：23—28）。然后tī仝一工，伊mā医了彼得丈姆发烧ê病（参考马可福音一：29—31）。Ē-sái讲是当时lóng无传出任何反弹ê声音。

Chit-má仝款tī安息日，mā是耶稣tī会堂医医病人ê事件，却引起法利赛人非常不满。作者tī第2节用「窥伺」一词，形容chiah-ê法利赛人ê心态，就是teh当等看耶稣是m̄是敢tī安息日医人。

第3到4节，耶稣当然知影in ê心思。因为án-ne，伊无马上ê医动作，却是请hit-ê手lian去ê人khiā到众人面前，然后问大家安息日是m̄是thang「做好事」chit-ê问题。Tio̍h注意ê是耶稣用「做好事iáu是pháiⁿ事？救命iáu是害命？」kā它放做伙提问，用意真明显，表明无救治chit-ê手lian去ê人，等于是teh残害伊ê性命，hō͘ chit种人继续受苦落去，这等于是做pháiⁿ事，á绝对m̄是上帝设立安息日ê用意。

重点是tī第5节，耶稣对chiah-ê人冷漠ê态度感觉「悲伤」。Chia用「in ê心肠刚硬」，这用词mā是描述早年埃及国王回应上帝要求伊tháu放以色列人民ê态度（参考出埃及记七：13、22、八：15、19），因国王ê心刚硬soah引起上帝ê忿怒。Chia耶稣用命令ê语句，ài chit-ê人「Kā手伸直」，án-ne，病就好起来。

注意第 6节，法利赛人结合希律党人beh杀害耶稣，chit两种人tī政治意识上是完全无相仝ê人，却为tio̍h beh杀害耶稣来结合做伙，chia是第一pái，in第二pái合作是tī马可福音第十二章13到17节，in联手设计缴税hō͘罗马皇帝ê问题，想beh陷害耶稣。