头前讲耶稣ê门徒无禁食，chit-má讲耶稣ê门徒tī安息日摘麦穗，马太福音第十二章1节讲门徒是因为腹肚饿，chiah会án-ne做。Á根据摩西律法，人thang tī腹肚iau ê时摘麦穗来食。M̄-koh，到耶稣时代ê犹太人，传统风俗已经加添了真chē规定，hō͘原本简单ê安息日规律，增加到chē kah 39项「bē-tàng」做ê禁令，hō͘人有窒碍oh行ê现象。

第25到26节，耶稣用大卫王tī逃亡ê时，欺骗大祭司亚希米勒ê事并且食了圣饼ê例来回答（参考撒母耳记上廿一：1—6）。这是犹太人lóng知影ê故事，耶稣强调仝款是腹肚饿，大卫就ē-tàng食伊bē-tàng食ê圣饼充饥，为甚么他ê门徒腹肚饿，就bē-tàng摘麦穗来食？

第26节chia kā亚希米勒写做伊ê kiáⁿ「亚比亚伊」（参考撒母耳记上廿二：20）。

第27节是siōng重要ê经文，「安息日是为人来设ê；人m̄是为安息日á生ê。」这是一句hō͘当时ê人耳目一新ê新解，说明人m̄是安息日ê奴隶，却是上帝创造万物ê时，beh hō͘包括人在内ê受造万物，lóng ē-tàng得tio̍h性命ê赐福，来设立这安息日。