Tùi第十一章27节开始到十二章44节，犹太人领袖接连用四个经过设计ê问题来质问耶稣，主要目的lóng是想beh掠耶稣ê把柄，好杀害伊。

Chit段经文提起tī洁净圣殿ê事件后，第一个反映出来ê就是犹太人siōng koân议会ê代表「三和林」（Sanhedrin）成员――祭司长、经学教师、长老等，in来见耶稣，问伊「凭甚么权柄做chiah-ê事」。Chia无指明是甚么事，m̄-koh可能kah耶稣洁净圣殿ê行动有关。因为圣殿ê主管单位是祭司团，因为án-ne，in chit-ê问题可能就是teh指耶稣已经僭jú了祭司团ê权责。

耶稣并无正面回答in ê问题，却是提出另外一个问题反问in，这问题是ài in讲看行洗礼约翰ê权柄tùi tó位来？是tùi上帝？iáu是tùi人来ê？In m̄敢回答，因为in知影民众lóng相信行洗礼约翰ê权柄是先知，á先知是上帝ê奴仆，权柄当然tùi上帝来。M̄-koh问题是chiah-ê宗教领袖是m̄相信行洗礼约翰是先知，因为án-ne，in回答耶稣讲「m̄知」，为tio̍h án-ne，耶稣mā不回答in问ê问题。