马可福音ê作者对耶稣降生ê故事kah-ná无兴趣，伊ê重点无khǹg tī耶稣ê降生，却是tī耶稣ê言行。

第1节，chit节是马可福音ê结论，作者故意kā它编辑tī siōng头前，chit点mā是马可福音编辑上ê特色。作者用结论作开场白，kā咱讲耶稣基督就是上帝ê Kiáⁿ，mā是福音ê本身。然后tùi第2节开始，beh绍介耶稣基督是甚么人kah伊ê事工。

第2到3节，chia写讲「先知以赛亚tī伊ê册上记载」，其实第2节是引用玛拉基书第三章1节chiah正确。第3节chiah是引用先知以赛亚ê册第四十章3节。表明ê意思是上帝ê拯救来临à。

第4到5节，行洗礼约翰出来传福音ê第一句话是「lín tio̍h悔改」，悔改是表明「改变」，tùi pháiⁿ ê变成好ê。悔改chiah是得tio̍h上帝赦免ê唯一途径。民众听伊ê呼吁，kui个巴勒斯坦地区ê民众lóng来领受伊ê施洗，表明愿意悔改。悔改，mā是kui本圣经ê中心信息。

第6到8节，行洗礼约翰chit种样式，kah先知以利亚ê样式真相近（参考列王纪下一：8）。伊公开宣告有一位tī伊了后来ê，比伊koh khah重要，伊是用水洗礼，hit位tī伊后壁来ê，是用「圣神」为大家施洗。这「圣神」是teh指上帝ê能力。