玛拉基书 2章1节 到 2章9节   背景资料  上一笔  下一笔
Chit章thang分做两个部分,一是第1到9节,继续提起祭司所犯ê严重错误行踏,表面上看起来祭司有照规定替人民举行献祭,其实,in所献祭ê cheng-seⁿ m̄-nā有瑕疵而且无清气。二是第10到16节,chit段经文真清楚指出以色列人民所犯ê错误。先知玛拉基特别引用上帝kah以色列人民之间特有ê「夫妻」关系说明以色列人民弃sak上帝,去拜偶像神明ê事,就ná同bó͘背叛了丈夫仝款ê不应该。

Chit段经文真清楚讲出上帝ê愤怒,他beh严厉惩罚chiah-ê无尽责把关ê祭司,跟tòe民众ê意思去行,m̄-nā无做到祭司应该做ê事,却iáu kah民众同齐做出污秽上帝ê行踏,这是非常严重ê错误。

另外一方面,先知玛拉基mā提醒以色列人民,上帝是信实ê,伊一定会严守kah以色列人民所立ê约。只要是真实ê祭司,一定会自我要求行为正确,而且会尽责任教导以色列人民确实尊敬上帝,学习履行上帝ê旨意。

第1到2节,先知玛拉基传出上帝beh hō͘祭司ê「命令」,就是ài in「一定tio̍h以行为来尊敬」上帝。可惜祭司显然并不在意上帝chit种命令,mā因为án-ne,以色列人民真自然tek mā跟tòe随便起来,信仰就án-ne败坏à。Chit种结果kan-taⁿ会为in带来「诅咒」,因为in并「无重视」上帝ê「命令」。

第3到4节,chia讲上帝诅咒chiah-ê藐视上帝ê祭司,就是「惩罚」in ê「kiáⁿ儿」,这表示祭司ê后代kiáⁿ孙kan-taⁿ会jú来人数jú单薄。天主教《思高圣经学会晓版本》koh khah有意思,就是上帝beh「phut断in ê手股头」,意思就是上帝beh hō͘ in失去工作ê能力。根据摩西律法ê规定,祭司一定tio̍h是身躯健壮ê人chiah thang担任(参考利未记廿一:17—21)。无手股头,当然就是身躯有残缺,既然有残缺,就无法度koh再继续担任献祭ê工作,án-ne,伊就无法度得tio̍h任何献祭品。

Chia iáu讲ài kā in献祭ê「cheng-seⁿ ê粪便」泼tī祭司ê「面上」,原本以色列人民teh献祭前,一定tio̍h kā chiah-ê清洗出来ê排泄物the̍h-tio̍h特定ê所在,kā它用火烧掉。Chit-má,却tio̍h用chiah-ê排泄物泼tī祭司ê面上,这是teh表示祭司ê形像就ná同chiah-ê动物ê排泄物一般,m̄-nā lah-sap臭,而且像是beh弃sak ê废弃物,thang用火kā它烧掉,hō͘人看bē-tio̍h。虽然上帝是用chit种严厉方式惩罚祭司,m̄-koh先知玛拉基mā同时传出一个重要ê信息,就是上帝kah人所立ê约,是永远ê约。表示上帝并无会因为án-ne就废弃了他kah利未族人所立ê约,iáu会hō͘利未族人永远lóng当祭司来服事顶面帝(参考出埃及记廿九:29,民数记三:11—13,申命记十八:5)。

第5节,遵守kah上帝所立ê约,必定会得tio̍h上帝赏赐ê「性命、平安」,这是上帝kah人立约ê时就已经应允ê礼物(参考申命记四:40)。

第6到7节,chit两节讲出一个真实ê祭司应该做到ê事,包括有下列几项:

一是「传授真理」。Chit-ê词「真理」tī希伯来文是「Torah」,这mā ē-sái讲是以色列人民认为siōng重要ê经典,mā就是摩西ê律法。祭司有责任教导人民认bat摩西律法(参考利未记十:11)。M̄是只有停止teh主持献祭ê工作而已。

二是「无讲不义ê话」。这是teh指无讲欺骗、虚假ê话语。换句话讲,做上帝ê奴仆祭司,一定会诚实。

三是「行为正直」。这是teh指祭司bē-tàng有欺骗ê行为,á是去做陷害别人ê事。上帝ê奴仆祭司,应该真清楚甚么是该做ê,甚么事是bē-tàng做ê。正直,mā包括公义在内。所讲公义,就是teh指对不应该有ê事,会挺身出来阻止。

四是「帮助真chē人弃sak罪恶」。Chia所讲ê「罪恶」,是teh指去拜偶像神明。身为祭司,就是beh帮助人透过敬拜上帝而认bat性命ê主。

第8到9节,先知玛拉基讲出祭司ê问题所在,就是本身对上帝不尊重,真自然就无法度带领人民真正认bat上帝。In既然用chit种方式藐视上帝,上帝mā会用仝款ê方式回应in,就是「hō͘以色列人民藐视」in。

重新查询 专卷研经 玛拉基书系列
错误回报,请联系comm[@]fhl.net