Tī旧约圣经中最后一本经册就是玛拉基书，tī宗教改革后chiah kā chit本经册编辑tī旧约圣经中最后一本，这可能是因为先知玛拉基是旧约先知中khah晚期ê一位先知。Tùi伊所传达ê信息来看，thang明确知影ê是chit位先知可能是tī主前第五世纪出来传讲上帝ê信息，kah所罗巴伯、尼希米、以斯拉、哈该、撒迦利亚等人真可能是同时代，tī时间上真可能比in lóng tio̍h早一点á。

    Ná亲像头前绍介chit本经册有提起ê，chit本经册编撰ê特色，就是用人kah上帝之间ê对话方式，真类似哈巴谷书ê样式。Chit章开始就是chit种编撰形式。值得注意ê是chit章特别针对祭司传出上帝ê信息，认为连祭司lóng用轻视ê态度teh看献祭ê事，若án-ne，以色列人民koh ná会对敬拜礼仪ê事重视？不可能。所以先知玛拉基真无客气地传出chit种信息：上帝beh拒绝听祭司ê祈祷。

第1节，chia开始讲「上主交带玛拉基转告以色列人民ê信息」，chia ê「交带」，mā thang当做「启示」解释。Koh讲，这「交带」一词ê原希伯来文是「masha」，chit-ê字tī以色列人民ê意思是「负担」，这表示上帝「交带」某一个个人一件事，chit件事就成做被交带者ê一种「负担」，意思就是无法度拒绝m̄做，m̄-koh做却无一定讨人欢喜，koh khah可能会为家己带来麻烦。「玛拉基」chit-ê名ná亲像第三章1节所提起ê是上帝差派ê「使者」。Á上帝ê使者主要ê工作，就是忠实地kā上帝所交带ê话传达出来（参考列王记上廿二：14），á是真确ê完成。

第2到3节，tùi第2节开始出现「问」kah「答」ê特色。Chit节mā显示出上帝kah以色列人民之间发生bē爽快ê事。

开始上帝表示伊「一直爱」tio̍h以色列人民。Á以色列人民却用怀疑ê句话问上帝「怎样表现」对in ê疼。Chia所用ê「疼」字，是teh指含有「契约」ê疼，而这「契约」指ê就是「拣选」。上帝拣选雅各，并且kah伊立约，这就是先知玛拉基信息里所讲ê「疼」ê意思。所以chia讲上帝ê回答是伊偏爱「雅各」，赢过爱「以扫」。虽然「以扫kah雅各是兄弟」。M̄-koh上帝却「憎恶以扫」。Á chia「憎恶」一词，用使徒保罗ê观点，就是上帝用「拣选」ê方式来表示（参考罗马书九：10—13）。使徒保罗引用ê目的khah强调上帝拣选ê要件，并m̄是根据人ê条件，却是有上帝ê主权tī其中。上帝ài怎样拣选，he是上帝teh决定，m̄是人thang质疑ê（参考罗马书九：10—18）。

第4节，当以东人m̄信in ê国家会hō͘上帝严惩而被敌人摧毁ê时，上帝ê回答是讲以东chit-ê「罪恶ê国」，并且讲「上主永远恼怒ê人民」，这一定tio̍h tùi历史层面去了解，tī主前587年当巴比伦帝国teh包围犹大耶路撒冷城ê时，以东chit-ê亲兄弟，并无出兵协助犹大ê同胞，反tńg幸灾乐祸、耻笑in，这mā是诗人向上帝提出控诉ê原因（参考诗篇一三七：7，耶利米哀歌四：21—22）。Á koh khah严重ê，恐惊就是先知俄巴底亚所控诉ê，以东人做两件siōng bē-tàng原谅ê事，其一就是kah敌人仝款，进入耶路撒冷城内掠夺以色列人民ê财产。其二是故意在耶路撒冷城门口，堵住hiah-ê想beh逃离灾难ê以色列人民，甚至替敌人掠hiah-ê想beh逃难ê人，这是引起上帝大愤怒ê恶质行为（参考俄巴底亚书）。

第5节，先知玛拉基讲上帝ê审判必定会实现，hō͘以色列人民「亲眼看见」上帝惩罚以东人，而确信上帝是万军ê统帅，全世界lóng是属tī他ê。

第6节，tùi chit节开始，直到第二章9节止，lóng是teh讨论祭司奉献态度ê问题。Chit节真清楚提出祭司ê问题是in根本「不尊敬」上帝，上帝直接讲出祭司「藐视」上帝。Chia先知玛拉基用两个譬喻：一是上帝kah以色列人民ê关系，ná亲像父子。二是ná亲像主仆。所讲「不尊敬」，thang讲是用潦草随便ê方式献祭。Tī chiah-ê祭司ê心中并无存「敬畏」ê心。

所讲「藐视」，thang tùi摩西律法看见有真chē严格ê规定，一个祭司beh进入上帝ê祭坛前，一定tio̍h先沐浴洁净家己ê身躯、脚手，了后chiah thang进入祭坛（参考出埃及记廿九：4、三十：19—21）。摩西律法会订定chiah-ê规矩ê原因只有一点：希望以色列人民teh敬拜上帝ê时，ē-tàng专心、真实。讲白些是众祭司并无看重敬拜上帝ê事，照规矩来进行献祭ê礼仪，却是以随便应付ê态度办理人民献祭ê礼仪。

第7节，先知玛拉基提出koh khah具体ê事证来说明以色列祭司ê堕落kah错误ê态度。Chia提起所讲「藐视」ê态度，就是kā「污秽ê食物」当做献hō͘上帝ê物件。所讲「污秽」指ê是无清气ê物件，这tī后来以色列人民发展出koh khah详细ê规定，说明甚么是无清气？有四个要件：

一是teh指过期ê物件，mā就是无新鲜ê。

二是用无清气ê动物，á是teh煮食祭物ê时参杂了无清气ê食物tī内面。

三是hō͘无清气ê人摸过ê物件。

四是已经腐pháiⁿ ê食物。
Tī利未记第十一章有真清楚ê规定toh一kóa是洁净kah无清气ê物件。所以身为祭司应该lóng真清楚甚么是洁净、甚么是无清气。

第8节，chit节讲献祭ê动物有「chheⁿ-mê、跛脚、破病ê cheng-seⁿ带来」献hō͘上帝，这实在是真过份ê事。Á chit种态度根本就是无kā上帝放tī眼内，这就是「藐视」ê意思，koh khah免讲所讲「尊敬」á无ê问题à。
先知玛拉基提出chit种问题：tio̍h用色列人民想看看in是m̄是会kā有残缺ê cheng-seⁿ当做礼物带去送kā in赐福ê「官长，看in欢喜无欢喜，领不领」in ê情，了后chiah来kah上帝谈chit件奉献ê事。

第9节，先知玛拉基特别强调讲，无论祭司怎样向上帝祈祷，lóng是无用ê，因为上帝根本「bē垂听」in「祈祷」ê声音，原因真简单，就是in既然亵渎上帝在先，用跛脚ê、有残缺ê cheng-seⁿ献tī祭坛上，án-ne对上帝hiah-ni̍h无尊敬、藐视，然后又ài向上帝祈求「施恩」怜悯，上帝怎样可能会听？

第10节，「Kā圣殿ê门关起来」，因为上帝kā拒绝接纳in tī祭坛所献ê祭物，因为hiah-ê所献ê物件并m̄是洁净、好ê。Tio̍h注意ê一点，就是先知玛拉基所讲ê chiah-ê有残缺之cheng-seⁿ，并m̄-nā kan-taⁿ是teh指表面上ê「chheⁿ-mê、跛脚、破病」等，而且mā有koh khah深ê含意，表示从来m̄-bat正当ê手段所得tio̍h ê物lóng是。先知玛拉基mā清楚表明上帝「无欢喜in」，这是真严重ê一件事，特别是对以色列人民来讲，明明是就是一件无法度接纳ê大事。
第11节，tú好kah第10节呈现出强烈ê对比；第10节讲以色列人民并m̄是真心敬拜上帝，连献祭物件lóng是hit种lah-sap、残缺不全。M̄-koh相对ê，tī以色列以外ê地区，人民是hiah-ni̍h-á欢喜用真实ê心敬拜上帝，献siōng好ê礼物hō͘上帝，以表示对上帝ê尊崇。真自然tek，上帝会「垂听ná敬拜伊、并实行他旨意ê人」（参考约翰福音九：31）。

第12节，chit节真清楚teh谴责chiah-ê祭司，家己先污秽上帝ê祭坛，soah koh推卸责任讲祭坛本来就是lah-sap ê。先知玛拉基指出，chit种态度就是tī「亵渎」上帝ê神圣。

第13节，chia讲出祭司行为koh khah严重ê问题，明明知影he是「偷来ê、跛脚ê、破病ê动物」，却iáu kā它当做祭品「献hō͘」上帝。这真清楚teh说明祭司kah以色列人民勾结，用不正当方法得tio̍h ê物件，当做献祭品hō͘上帝，m̄-koh he m̄是奉献，ná已经是teh亵渎上帝ê神圣à。

第14节，chit节进一步指出祭司「不诚实」ê心，就是用色列人民并无照所下ê愿来回报上帝ê慈爱，这已经是违背摩西律法所规定ê（参考申命记廿三：21—23）。Chit种态度所奉献出来ê物件，就是不诚实。只要是不诚实，无论奉献ê是甚么，lóng是teh欺骗上帝。欺骗上帝ê人等于是「Pián仙á」，就是犯罪了，是「该受诅咒」。