利未记 8章1节 到 8章13节   背景资料  上一笔  下一笔
Tùi第八章开始,一直到第十章,lóng是有关祭司方面ê条例,tī第十章1到7节特别记载亚伦ê kiáⁿ拿答kah亚比户,因为违背祭司献祭ê条例,á tī圣幕中被火烧死,用chit种实例来警告所有祭司一定tio̍h严格遵守献祭ê礼仪规定。

Chit章是记载有关设立亚伦kah伊ê kiáⁿ孙成做祭司ê kui个程序。有kóa学者认为比较像出埃及记第四十章ê延续,因为tī出埃及记第四十章是完成圣幕ê制造,续落来就是设立祭司ê规律,án-ne chiah算完整。不过tī出埃及记第廿九章已经有记载亚伦kah伊ê kiáⁿ孙是祭司,并且mā记载án怎设立祭司ê条例。

Tio̍h注意ê是,设立祭司ê时chūn,全体以色列人lóng一定tio̍h集合tī圣幕门口,由摩西当众宣布设立祭司ê大事。这就真亲像当今教会teh设立牧师仝款,全体会友lóng一定tio̍h参加。Koh讲,chit章经文规定祭司一定tio̍h洁净ê规矩,然后chiah是进行献祭仪式。这表明:祭司一定tio̍h先洁净家己了后,chiah ē-tàng执行献祭ê工作。因为只有洁净ê双手、脚、身躯(第1到13节),chiah ē-tàng避免污秽了原本已经洁净ê祭物(第14到36节)。Á kui个设立ê时间是「七」天(第33节),这表示祭司ê职分是神圣ê,因为祭司ê工作是为tio̍h以色列人kah上帝之间ê密切关系。

Chit章讲只有亚伦kah伊ê kiáⁿ孙chiah是属tī祭司ê传承者,m̄-koh后来申命记则扩大了范围,认为只要是利未支派ê族人lóng thang成做祭司(参考申命记十八:1―5)。祭司ê主要工作,除了帮助献祭ê事务外,「因为祭司ê 嘴唇tio̍h 存智识, 人tio̍h tùi 伊ê 嘴请教律法,因为伊是万军ê 上主ê 使者。(全民版)」(玛拉基书二:7)

Chit章因为lóng是讲祭司ê事,因为án-ne,lóng会重复一句话:「这一切lóng遵照上主ê命令做。」(八:9、13、17、29、34、36)这表示祭司ê规律就是beh遵照上帝ê旨意,若无,就是teh侮辱上帝。

Chit段经文是设立祭司ê规定。

第1到5节,「亚伦kah伊ê kiáⁿ」,这表示后来ê利未族人中,thang被推举出来当祭司ê人。设立ê方式,就是带祭司到上帝ê圣幕前,然后召集所有以色列人到圣幕前聚会,表示这是全体以色列人ê大事。被设立ê祭司tio̍h带所beh穿ê「圣服」,按立用ê「圣油、一头赎罪祭ê小公牛、两只公绵羊,kah一篮无酵饼」。

第6到9节,被按立为祭司者,一定tio̍h先「沐浴」,表示洁身。Tī chit段经文中记载祭司应该穿ê衫裤、帽á、配件等等。特别tio̍h注意ê是胸牌中有「乌陵」kah「土明」,这两项物件是用来测知上帝ê旨意之圣物。M̄-koh已经无法度明白是怎样ê物件。Tùi第9节thang看出亚伦被设立为「大祭司」,因为伊带tio̍h圣冠,kah伊ê kiáⁿ孙戴tio̍h帽á有区别。Iáu有,只有伊身上是带tio̍h胸牌,á这胸牌上镶tio̍h十二块宝石,每一块顶面刻tio̍h雅各一个kiáⁿ ê名,teh代表以色列十二支派(参考出埃及记廿八:15―30)。

第10到13节,设立祭司ê时,需要the̍h圣油抹圣幕内面所有ê器物,然后kā圣油倒tī祭司ê头壳顶,照出埃及记第三十章30节,亚伦ê kiáⁿ mā需要用圣油膏tī头壳顶。Chit种动作teh表明分别为圣。


重新查询 专卷研经 利未记系列
错误回报,请联系comm[@]fhl.net