Chit章kah第廿二章lóng是讲tio̍h有关祭司应该tio̍h遵守ê条例，á这第廿一章主要teh强调祭司ê圣洁行为。因为祭司teh代表以色列人民献祭hō͘上帝，因为án-ne，若是祭司无遵守圣洁ê条例，就会teh献祭ê礼仪上随便，á是无够忠心，án-ne，延伸出来ê必定会hō͘以色列人民teh敬拜上帝ê事顶面轻忽，不慎重，甚至会弃sak上帝去拜偶像，chit种情形后来teh进入迦南地一段时间后就出现。因为án-ne，对祭司有严格ê要求是正确ê，因为in是以色列人民宗教信仰ê领导者。

因为以色列人民认为尸体是无清气ê。因为án-ne，除非是kah祭司为仝一个家庭中ê关系者，若无祭司是bē-tàng摸tio̍h任何尸体ê。会有chit种限制，lóng是围tī一个基本思维：上帝是圣洁ê，因为án-ne，事奉ê祭司mā一定tio̍h圣洁。保持圣洁就beh先tùi生活上siōng可能tú-tio̍h，而且会致使祭司tī祭祀礼仪上有无清气ê事开始注意，丧礼就是其中siōng直接，siōng容易tú-tio̍h，mā是siōng需要特别注意ê事。

第1到4节，chia真详细写出容许祭司参与葬礼ê对象，包括有「父母、kiáⁿ、兄弟，á是未出嫁ê姊妹等近亲」，m̄-koh bē-tàng「参加姻亲ê葬礼玷污了家己」。

第5到6节，tī第十九章27到28节就已经有清楚记载，bē-tàng tī亲人往生ê时，有chit种「剃头、修胡须，á是割家己ê身躯」等行为来表示哀悼，真可能因为he是迦南地人民ê风俗。特别是割伤家己ê身躯，真chē民间宗教会有chit种行为，表示有神力附身，ná亲像台湾庙会中ê童乩。这tī耶和华宗教信仰中是严厉禁止ê。

第7到9节，祭司tī性行为上一定tio̍h严守圣洁规定，mā就是tī婚姻生活上一定tio̍h绝对忠实，因为祭司是代表以色列人民敬拜上帝，á上帝kah以色列人民之间有ná夫妻一般，需要绝对忠实。

Chit种忠实，包括祭司cha-bó͘-kiáⁿ ê工作mā是仝款，绝对bē-tàng有人去做妓女。其实，m̄-nā是祭司ê cha-bó͘-kiáⁿ bē-tàng沦为妓女，包括一般人民ê cha-bó͘-kiáⁿ mā lóng tī禁止之列（参考十九：29）。因为若是做妓女，就真容易成做庙妓，tī庙宇中服事迦南地ê人，这等于侮辱上帝子民ê圣洁记号。Chia真清楚规定，若是发见祭司ê cha-bó͘-kiáⁿ成做妓女，就beh用火烧死伊。