利未记 14章1节 到 14章32节   背景资料  上一笔  下一笔
Chit章一开始就讲tio̍h癞ko病被当时ê人认为是一种会传染ê疾病,因为án-ne,一定tio̍h先kā病患隔离出来。甚至祭司mā bē-tàng tī社区里检验,一定tio̍h城外检查。

Chia就牵涉tio̍h一个问题,如果癞ko真正无药物thang治,ná怎样可能会得tio̍h医(如果无tú-tio̍h像耶稣hit种有行神迹能力者出现)?咱thang án-ne了解:因为祭司m̄是医生,发生「误诊」是常有ê事。因为án-ne,先kā thang疑ê病人隔离起来观察,过一段时间了后,就比较ē-tàng确定是m̄是癞ko病了,若皮肤lóng恢复正常,就thang认为是「痊愈」,chiah恢复chit种人「洁净」之身。

Chit段经文是有关癞ko病症好了后,应该有ê处理方式。Chit段经文thang分做两个部分来看:一是第3到9节,主要ê方式是用血kah水,表示人ê罪已经被洗净并赎回。二是第10到32节,献上赎罪祭ê礼仪。Tī祭司ê看法里,像癞koán-ne严重ê病症,m̄是一般礼仪就ē-tàng得tio̍h平衡,因为án-ne,tī洁净ê礼仪上,除了用「赎罪祭」之外,iáu ài khah上三分之一ê「量」来表示重要性。这是因为古代观念中认为:疾病是因为犯罪所延伸出来ê惩罚,因为án-ne,献「赎罪祭」乃是理所当然ê方式,mā是siōng好ê方法。

第1到2节,ná亲像第十三章所记载ê,若是有人发见身上皮肤有异样,就需要带去hō͘祭司检验,看是m̄是癞koê症状。仝款,若被诊断并m̄是癞ko病,mā需要tńg来到祭司hia去确认chiah thang。

第3到9节,chit段经文真清楚说明所有检验ê过程,其中siōng主要ê,就是祭司tio̍h chhōa chit-ê人「到营外检查」,这mā是一种预防措施,万一无完全痊愈,thang避免扩大感染。Koh讲,照第十三章46节ê规定,被判定是癞ko病ê人,原本就需要tòa tī营外。因为án-ne,当chit-ê人发见家己ê病已经好了,伊iáu无法度入城内,需要留tī营外等祭司去检查,通过了后chiah thang入城去。

除了献祭ê鸟两只外,mā需要香柏木、一条朱红线、一条牛膝草ê嫩枝。鸟ê血tio̍h hiù tī病人ê身上「七pái」,表示完全洁净ê意思。然后伊需要kā身上所有ê毛发lóng剃掉,然后沐浴、洗荡衫裤,tòa tī帐棚外七工。了后koh一pái剃掉身上所有ê毛,然后koh一pái洗荡衫裤、沐浴等,án-ne chiah算完成洁净礼。

第10到20节,当祭司宣布chit-ê人已经完全痊愈了后,chit-ê人就一定tio̍h照必要ê礼仪献上感恩ê祭,除了献烧化祭ê两只小公羊、一只小母羊外,mā需要献素祭ê三公斤调kah tio̍h橄榄油ê细面粉、三分之一公升ê橄榄油。Á洁净礼中间,非常重要ê一点,就是用橄榄油倒tī he人头壳顶,并且用献牲祭ê血抹tī he人ê右耳垂、正手大头拇、正脚ê大头拇上,用chit种方式表示洁净。Á chit-ê礼仪mā就是所讲ê洁净礼。

第21到32节,chit段经文是针对hiah-ê sàn-chhiah人家所规定ê洁净礼。Kah头前ê差别,是chia thang用一只小公羊作赎过祭to̍h ē-sái,koh讲细面粉只需要一公斤。另外是用两只粉鸟á是斑鸠取代一只小公羊、一只小母羊。其它动作lóng仝款。

其实,就算一只小公羊,对sàn-chhiah人来讲mā是真大ê负担。M̄-koh ē-tàng被宣布洁净是一种性命锁枷ê解脱,至少chit-ê人thang tńg到厝里,ná亲像被法官宣判无罪获释仝款,是性命极大ê喜乐。

重新查询 专卷研经 利未记系列
错误回报,请联系comm[@]fhl.net