士师记 20章18节 到 20章48节   背景资料  上一笔  下一笔
这是一段战事记,描述两军对抗,第一回合是便雅悯支派ê极少数军对,phah败相对大多数ê以色列十一支派联军,chit种初tam胜利ê果子,却hō͘ in bē记得上帝khiā tī十一支派hit-pêng。

第18节,chit节thang对照第1节来看,就会发见军队聚集tī米斯巴,m̄-koh圣所示tī伯特利,二者之间相差约有十五公里远,当时约柜是tī伯特利(第27节)。Ná亲像摩西时代仝款,每pái出兵相刣一定tio̍h走chhōe上帝ê允准,即使koh再远mā tio̍h先问上帝ê旨意。In问上帝该由甚么人phah前锋?上帝ê回答是犹大支族。

第19到23节,这是第一pái相刣,结果联军死伤惨重,有两万两千名以色列联军死亡,这是一个惨重ê失败。Mā表示便雅悯军对ê厉害,特别是基比亚精挑出来ê精锐甩石头部队。因为án-ne,in koh一pái询问上帝ê旨意,答案又koh是肯定ê。

第24到28节,虽然失败,in iáu是继续询问上帝ê旨意,是m̄是该继续phah落去?结果chit pái得tio̍h ê答案又koh是肯定ê,ē-sái讲是iáu是失败了,chit pái死亡有一万八千名,而且lóng是受过训练ê士兵,这表示便雅悯军队ê实力真正bē-tàng小觑,这mā反应出in为甚么敢拒绝十一联盟首领ài in交出基比亚无赖ê原因,就是仗恃tio̍h家己ê军队精良,ē-tàng抵抗其他族群ê军队。

为甚么已经先求问上帝了,而且iáu得tio̍h指示讲beh「犹大支族」先攻,却iáu是落败,而且都无记载便雅悯人tī chit两次中死亡ê人数。到底是怎样tńg来事?圣经ê作者并无提供答案。M̄-koh thang注意ê一件事,是in先求问上帝ê,m̄是先问「kám bē-tàng去攻打同胞便雅悯支族,á是者就此罢休」,却是问「toh一支族该作先锋去攻打便雅悯人」,chit种问法是已经有决定,chiah tio̍h上帝「背书」,结果是失败à。仝款ê,第二pái mā是用类似「是非、选择题」teh询问上帝ê意见。只有第三pái chiah是teh徵求上帝ê意见。
注意第27节讲亚伦ê孙á非尼哈当时是服事约柜ê祭司,ná亲像chit-má ê「军中牧师、神父」仝款,为国家ê军事行动提供服务。

第29到36节a句,chit段是描述第三pái战事,虽然头前已经有两pái lóng问过上帝,mā认为上帝允准in去攻打便雅悯支族,m̄-koh lóng是失败而归,chit pái in m̄-nā是问「该不该去攻打」,而且iáu问讲是m̄是就án-ne soah去?上帝ê回答真清楚,ài in去攻打,他beh kā便雅悯人交hō͘ in,第28节ê chit种回答句就是表明上帝khiā tī联军chit-ê边ê意思。

Chit pái ê相刣,以色列联军有谋略,用撤退诱敌ê方式,hō͘便雅悯军队陷入峡谷中无法度发挥甩石头ê精准力量,结果chit pái无koh是以色列军队战败,却是便雅悯军队共计有两万五千一百名被刣死战场,m̄-koh in总共兵力chiah只有两万六千七百名,thang讲差不多全军覆无。

Chit段经文是对前段经文ê补充说明。

第36节b句到37节,chia先说明基比亚城被以色列盟军攻破,军队进入城内进行大屠杀,in kā城内ê居民lóng杀害,真是真残酷ê报复结果。

第38到41节,tī前线ê便雅悯军队iáu m̄知in认为siōng坚固ê基比亚城已经被攻破,当in tī前线回头看见城内烟火冲天,就知影不妙,可能会hō͘消灭。这thang看出当初in为tio̍h几个无赖,无愿意kā in交出来受惩罚,恃tio̍h家己ê军力,m̄肯接受承认错误,硬beh对抗,结果付出ê代价是整城ê人lóng惨遭杀害。

第42到46节,teh对抗以色列军队ê便雅悯主力部队,看见chit pái无法度抵挡以色列联盟军队ê时,in开始四界逃窜躲避被杀,m̄-koh即使是逃走到旷野去,ē-sái讲是mā仝款被杀灭。Tī逃窜ê过程中,就有一万八千精兵被杀,逃向旷野ê就有五千名tī路上被杀,然后tī基顿koh有两千人被杀,án-ne,这第三pái ê对抗,共计有两万五千人被杀害。

第47到48节,chit两节mā讲出十一支派联军对家己同胞一点mā不手软,á是心存怜悯,in ná亲像基比亚ê无赖仝款,对弱势ê cha-bó͘人一点mā不疼惜,kā伊轮暴致死。chit-má以色列联军是一点mā不疼惜家己ê同胞,除了有六百个便雅悯士兵逃往临门岩bih起来四个月而会得thang存活落来外,其余便雅悯支族所khiā起ê城市村落ê人,包括in所有ê男女孩童cheng-seⁿ无一幸免,惨遭屠杀,差不多就beh灭族。Án-ne,kui个便雅悯支派就是只chhun这六百个逃亡者生存落来,这实在是惨痛ê军事行动,hō͘便雅悯接近灭族ê危机(参考廿一:6)。莫怪后来ê扫罗被先知撒母耳膏立为王ê时chūn,会讲:「我kám m̄ 是便雅悯人,以色列支族中极小khóa ê ?便雅悯支族chiah-ê 家ê 中间, 我ê 家kám m̄是极微细?祢ná 会对我讲chit 款话?(全民版)」(撒母耳记上九:21)

Chit章ê记事,其实就是teh回应第十七章6节所讲ê ná句话。Mā同时是teh说明以色列人民心中完全bē记得上帝ê话语,án-ne chiah是真正ê问题所在。



重新查询 专卷研经 士师记系列
错误回报,请联系comm[@]fhl.net