因为利未人kā伊ê细姨ê尸体切做十二块，并且kā它分发到十二支族hia，结果引发以色列同胞ê愤慨，in声言beh讨回公道。

Chit章显然有kóa夸大描述十一支派联盟kah便雅悯支派ê内战惨况，m̄-koh重要ê是teh讲述便雅悯支派后来战败，tī一夕之间就变成十二支派中siōng弱小ê支派，而且面临差一点á灭族ê危机，koh khah严重ê，这十一支派联盟出手之残酷，是连gín-á lóng杀。Ná亲像基比亚ê人对待这外出ê利未人ê细姨hit种不人道，仝款ê，其他支族ê人mā好无gōa chē。这lóng tī说明kui个以色列人民确实是人人lóng随心所beh去作家己欢喜ê事，m̄-koh却是上帝眼中邪恶ê行为。

Chit段经文teh描述十一支派联盟出兵beh惩罚便雅悯支族ê人ê前，in确实有经过调查，hō͘事件koh khah清楚，并且ài便雅悯支族ê人kā基比亚城ê无赖交出来接受惩罚，m̄-koh便雅悯支派ê人拒绝chhap，并mā决定出兵kah其他十一支派ê联盟对抗。这mā说明一个重要问题：犯错，却无承认，这是非常错误ê行为。

第1节，chit节讲出当时以色列民族占领ê土地范围，就是tùi北部ê「但」到南部ê「别是巴」；东边边界ê基列到西边ê地中海等地。

第2节，chit节讲「以色列各支族ê首领lóng出席了chit pái上帝子民ê聚会」，这是进入迦南地安居后第三pái有chit种聚集，第一pái是tī约书亚记第十八章有关分配土地ê事，「全体人民lóng聚集tī示罗」，第二pái是记载tī约书亚记第廿二章，因为约旦河东岸ê二支族半tī基利禄建造一座祭坛，而引发其他支族ê紧张。Chit pái是第三pái。M̄-koh，这一pái比较像第二pái ê聚集，因为，第二pái ê聚集是关系支族之间ê互动，chit pái ê聚集mā是kah支族之间ê互动有关系。M̄-koh chia特别注明讲是「各支族首领lóng出席了」，而且有「步兵四十万人」，chit句话已经teh表示chit pái会议，是一件军事会议，同时说明这十一支派联盟共有ê兵力。

第3节mā说明便雅悯支族ê人已经听tio̍h chit件事ê风声，m̄-koh并无代表出席chit pái会议。因为事件是发生tī in ê辖区之内。

第4到7节，chit段经文是chit群来自十一支族ê领袖询问chit位利未人，伊详细地描述事件发生ê经过，虽然chit种描述kah伊推出家己ê细姨保身有cheng差，m̄-koh事实是伊ê细姨被轮奸致死chit件事完全符合。然后伊问chiah-ê首领，该怎样替伊伸冤。第5节是重要ê一节，因为chit位利未人表明是因为基比亚人beh「刣」伊，后来kā伊ê细姨凌辱致死，chit种讲词其实m̄-nā是加重了犯案者ê罪刑，mā缓和了伊tī第6节肢解细姨尸体ê严重性。Mā因为伊chit种作法，激发了以色列人民teh进入迦南地一段时间后，第一pái「团结一条心」（第11节）。

第8到11节，「帐棚」，指ê是in tī旷野流浪ê年代。「tòa厝」，表示in已经tī迦南地定居。Tī chit段经文中，in表示无论是tī怎样ê生活环境下，lóng m̄应该做出chit种邪恶ê行为。因为án-ne，in决定惩罚便雅悯支族tī基比亚ê人，chia作者特别强调这是以色列人民进入迦南定居了后，第一pái chiah-ni̍h团结。

第12到14节，照理讲应该先hō͘便雅悯人有一个说明ê机会chiah-tio̍h，为甚么无？为甚么便雅悯人会「挺」基比亚人？这背后ê原因，可能是对事件ê看法有无仝ê立场；可能是因为出tī「以扫」kah「大卫」传承资料ê无仝，因为前者是便雅悯了kiáⁿ孙，而后者则属「犹大」ê。Koh讲，如果是惩罚ê对象kan-taⁿ限tī hiah-ê作奸犯科ê人，比较容易被接受，m̄-koh若是扩kah其他无辜ê，则oh得被同族ê长老接受。第13节强调以色列其他支族代表ê要求是合理ê，因为in beh ê是惩罚「无赖」。可惜ê是，便雅悯支族ê人m̄-nā不接受，反tńg是用强硬ê态度beh kah十一支派联盟作战，这就引发了以色列人民进入迦南地后，第一pái同胞相残（就是现今ê「内战」）。

第15到17节，chia特别提起基比亚ê居民，召集ê七百名勇士lóng是「使用倒手」ê，这kah第三章15节提起第二位士师「以笏；伊是便雅悯族人基拉ê kiáⁿ，习惯用倒手」，可见习惯常常使用倒手甩石头kah射箭，是便雅悯支族ê专长（参考历代志上十二：2）。Chia讲基比亚人挑选出来ê勇士非常杰出，chiah会tī hàiⁿ石头ê功力上「毫发不差」。便雅悯支族总共兵力是两万六千名，而基比亚城ê居民mā精挑了了七百名所讲ê「神枪手」， ē-tàng hàiⁿ石头ê时一屑á都无差。M̄-koh相对ê，以色列十一支派联盟军队共计有四十万受过训练ê士兵，这表示双方ê兵力相差非常悬殊。