士师记 16章1节 到 16章22节   背景资料  上一笔  下一笔
Chit章讲tio̍h参孙ê堕落kah死去,mā结束伊当以色列人民长到二十年士师。其实,tī参孙ê身上所隐喻出来ê,ná亲像以色列人民仝款,chit章所讲ê参孙kah妓女困,ná亲像teh讲以色列人民去拜偶像神明仝款。也kah先知何西阿所传达ê信息仝款。只有tńg来归到上帝怀前,chiah有重新得tio̍h性命力量ê机会,这就是参孙ê事件。

Chit段经文ē-sái讲是参孙记事ê第二部分,描写伊kah一位妓女困,差一点á被迦萨人攻击,后来koh爱上一位名叫黛利拉ê cha-bó͘-gín-á,结果非利士人利用chit-ê cha-bó͘人,hō͘参孙彻底失败,成做一个lóng无力量ê弱者。

第1到3节,chit段经文讲参孙到非利士人ê迦萨城kah一个妓女困,这表示伊已经无koh是「离俗人」,却是一个不守洁净礼仪ê以色列人。其实这mā teh暗示 tī参孙ê身上就thang看tio̍h kui个以色列人民ê缩影。迦萨城ê非利士人原本埋伏tī厝外准备ài beh杀害参孙,结果被参孙发见,伊提早tī半暝就离开了迦萨城,hō͘ hit-ê城ê非利士人想beh突击伊ê计画落空。M̄-nā án-ne,参孙气力之大,mā kā hit-ê城ê城门连框带扇、门闩lóng拆掉扛tī肩头壳顶,气力之大明明是叫看tio̍h ê人heⁿh惊kah讲bē出话来。M̄-koh无人知影伊chit种大气力是tùi何而来?

第4到5节,ná亲像顶pái伊ê bó͘ hō͘人利诱套出参孙谜语ê谜底,chit-má koh有非利士人ê五个首领想用一千一百块银á作o͘-se,这确实是一大笔金钱,为tio̍h beh hō͘参孙爱上ê非利士cha-bó͘人黛利拉来探听参孙ê气力tùi何而来。

第6到9节,果然,黛利拉接受o͘-se beh探听出参孙ê气力来源。Á参孙并无因为顶pái妓女ê事有警觉性,伊iáu是kā黛利拉讲,thang用「七根iáu未干ê新绞绳捆绑」伊。Á黛利拉并m̄是真正爱参孙,却是只爱金钱,伊the̍h-tio̍h钱就去通报hiah-ê想beh杀害参孙ê首领,而参孙却tī cha-bó͘人中间沉沦落去。虽然chit pái并无成功,m̄-koh至少说明参孙显然并无觉醒。

第10到12节,这是黛利拉第二pái询问参孙,ài怎样ê方式chiah会kā伊捆绑得tòa。伊koh讲了,方式是the̍h新索á,结果是无效果,仝款被参孙扯断。这引发一个问题:参孙是知影伊所疼ê chit-ê cha-bó͘人beh套出伊ê秘密,á是参孙真tú hông爱情冲昏了头?

第13到14节,这是黛利拉第三pái诱骗出参孙讲出制止伊力量出现ê方式,chit pái参孙讲出伊头壳顶头毛ê辫子,而这已经jú来jú接近伊真实力量ê来源头毛à。Chit pái mā是hō͘参孙脱离捆绑ê灾难。M̄-koh伊iáu是无觉醒。

第15到17节,这是黛利拉第四次探听参孙力量来源,虽然参孙拒绝讲出真相,m̄-koh到落尾iáu是不堪黛利拉ta̍k工问伊、纠缠tio̍h伊,最后终其尾kā真相讲出来,就是kā伊ê头毛剪掉,因为he是伊一出世就被献祭hō͘上帝成做「离俗人」ê记号,只要剪掉头毛,伊就kah一般人仝款。M̄-koh参孙bē记得,若kā chit teh代表kah上帝之间有约ê头毛辫子之记号剪掉,就表示伊kah上帝之间ê关系mā彻底破坏à。

其实thang án-ne了解:参孙ê头毛,等同tī以色列男婴出世第八工就需要割礼做为分别为圣ê记号。因为这割礼ê记号teh代表以色列人民kah上帝ê约。若是kā这记号lóng鄙视(siùⁿ)了,就等于鄙视(siùⁿ)kah上帝ê约仝款。Án-ne,上帝mā bē继续赏赐hō͘立约子民有特别ê性命力量。

第18到21节,果然,黛利拉kā chit重要ê秘密通知了非利士人,另外一方面,伊hō͘尽了方法hō͘参孙困落眠,然后非利士人kā伊头壳顶ê七根头毛编织ê辫子hō͘剪掉,参孙就án-ne会失去力量。Chia讲参孙ê头壳顶有绑「七根」辫子,「七」tú好teh表明「神圣」ê数字,说明伊kah上帝之间有特殊ê「神圣」关系。taⁿ参孙kā kah上帝之间teh代表约之关系ê记号完全破坏,就会hō͘伊陷入tī性命siōng苦难ê环境中,m̄-koh参孙已经bē记得chit件事loh。上帝无koh kah伊同在,伊就会失去力量。Á非利士人掠tio̍h伊,并m̄是随时刣死伊,却是凌迟伊,m̄-nā挖出伊ê目睭,hō͘伊变成chheⁿ-mê,带伊到迦萨监狱关起来,做推磨ê苦役。

第21节,chit节讲参孙ê头毛慢慢长出来,就为下一段经文预先做序言。

重新查询 专卷研经 士师记系列
错误回报,请联系comm[@]fhl.net