士师记 14章1节 到 14章9节   背景资料  上一笔  下一笔
Chit章开始绍介参孙长大,m̄-nā描述参孙有极大ê气力,ē-tàng刣死狮,而且ē-tàng一个人抵挡三十个非利士人。

Chit段经文讲述参孙喜爱一个非利士cha-bó͘-gín-á,拒绝父母ê劝诫,然后koh食了死去狮尸体ê蜂蜜,chiah-ê行为lóng teh表示伊已经违背本来献hō͘上帝ê离俗人应有ê行为。

第1到4节,chit段经文ê开始就讲tio̍h参孙已经长大,而且喜爱上一个非利士cha-bó͘-gín-á,这正讲出第十三章1节,hit时以色列人民正受tio̍h非利士人统治,tī痛苦中祈求上帝帮助。因为án-ne,伊喜爱非利士cha-bó͘-gín-á ê事,一定引起父母ê不满,而这mā讲出当时以色列人民tī迦南地已经kah当地人普遍有通婚ê现象,m̄-koh mā因为chit种通婚,致使以色列人民跟tòe当地人民ê宗教信仰而弃sak了上帝。Chit点mā是后来圣经作者一再认为:若是kah m̄信上帝ê人结婚,会hō͘人弃sak上帝,án-ne chiah是hō͘性命受tio̍h苦难ê siōng大因素。M̄-koh第4节chia讲参孙决定娶非利士人cha-bó͘-gín-á做bó͘,是出tī上帝ê旨意,为甚么会是án-ne?这实在是件「奇妙」ê事。上帝往往会用人ê软弱来完成他奇妙ê拯救计画(参考创世记四十五:8;五十:19—20;历代志下廿五:20;使徒行传二:23—24)。

第5到6节,chit两节讲出参孙有特别ê气力ē-tàng单独一个人刣死一只狮,伊ê气力是tùi上帝来ê灵同在。圣经作者beh表明一件事:有上帝ê灵同在ê人,伊ê气力是无法度估计ê大。其实参孙是tùi伊tī老母ê胎中就已经有上帝ê灵同在了,直到伊成长过程中lóng是án-ne,因为伊是tī上帝旨意下出世ê gín-á。其实,参孙身上有hiah-ni̍h大ê气力ē-tàng刣死一只狮,这mā teh回应hit位天使所讲ê「奇妙」ê意思。

第7到9节,讲参孙食狮尸体内ê蜂蜜,并且kā它hō͘ m̄知情ê父母食。尸体,这是teh指无清气ê物,依规定「离俗人」是bē-sái食án-ne ê物件。换句话讲,参孙已经bē记得家己是「分别为圣」ê人,一定tio̍h tī生活上非常ê顶真。包括伊想娶ê bó͘是异族人,chit-má koh食无清气ê物件,而这两件事lóng是tī父母无仝意á是m̄知情之下所做ê,这表示伊所做ê事已经违背本来伊出世就已经献身hō͘上帝当「离俗人」ê本意à。Á chit件食狮尸体内ê蜂蜜ê tāi-chì,就成做伊弃sak上帝拣选ê一个暗示,这暗示mā说明以色列人民ê实况,不时为tio̍h婚姻弃sak上帝,mā为tio̍h好味而bē记得上帝ê赏赐比hiah-ê食物koh khah丰富。

重新查询 专卷研经 士师记系列
错误回报,请联系comm[@]fhl.net