士师记 10章6节 到 10章18节   背景资料  上一笔  下一笔
Tùi第6节开始绍介耶弗伊,篇幅真长,直到第十二章7节chiah结束。Á绍介chiah-ê有记事ê士师,lóng会有一句真重要ê踏话头:「以色列人koh得罪上主。」续落来就是in tī受tio̍h外族入侵了后,因为痛苦而祈求上帝帮助。就án-ne上帝koh差派士师来带领in。Chit种句型差不多就是士师记ê绍介士师ê时ê主轴经文。

第6到9节,chit段经文以色列人民背叛上帝,去拜迦南地人民siōng主要ê神明巴力kah「亚斯伊录」,这「亚斯伊录」是迦南地居民敬拜ê女神,主掌生育、繁殖kah战争ê神明。Ná亲像台湾民间宗教ê「注生娘娘」仝款ê神明。以色列人民chit种行为引起上帝愤怒,tùi án-ne hō͘非利士人kah亚扪人入侵占领,统治in长到十八年之久,而且入侵ê范围差不多是全部以色列民族khiā起ê地区,包括tī约旦河东岸,以及南部ê犹大地区全lóng陷落。

第9到14节,chit段经文真清楚说明in每pái tú-tio̍h痛苦就祈求上帝,过去上帝lóng会垂听,chit pái上帝并无koh听in祈求,ài in去求告in跟tòe迦南人所拜ê神明。M̄-koh以色列人民Tī痛苦中chiah体会tio̍h in所拜ê hiah-ê迦南神明其实是虚假ê神,就算耗尽了所有力量祈求,mā bē有任何反应。因为án-ne,in 回转求上帝。Tī第11节上帝特别提起几个迦南地原住民族ê名单,包括有亚摩利人、亚扪人、非利士人、西顿人、亚玛力人,kah马云人,以及tī迦南地西北边ê强大民族埃及人等。

第15到16节,chit两节说明以色列人民终其尾晓悟了家己ê 错误,表示愿意接受上帝ê惩罚,chit种态度mā表示出真实悔改ê人才有ê认真态度。In同时kā chiah-ê迦南神明lóng除掉,只希望ē-tàng因为án-ne而得tio̍h上帝ê拯救。

第17到18节,亚扪人准备ài攻击tòa tī基列ê以色列人民,虽然以色列人民mā准备好应战,m̄-koh却m̄知甚么人chiah是好ê领导者。因为án-ne,in出了一个附带有鼓舞作用ê奖赏,就是甚么人带领以色列人民抗敌成功,甚么人就当以色列tī基列ê领袖。



重新查询 专卷研经 士师记系列
错误回报,请联系comm[@]fhl.net