Chit章记述约书亚koh一pái召集所有以色列各支派讲话，mā是对in重申遵守上帝ê律法命令之重要性，chit种情形有ná摩西最后对以色列人民所讲ê话仝款；摩西是将祝福kah诅咒、性命kah死亡pái tī以色列人民，ài in选择性命。chit-má约书亚是beh以色列人民tio̍h选择上帝，á是beh选择偶像神明，m̄-koh伊真清楚表明，伊kah伊ê厝lóng tio̍h选择上帝，对上帝忠实。

这是一段历史ê回顾，tī chit段历史ê回顾中，上帝透过约书亚提起几件重要ê事：

第1节，chia讲约书亚koh一pái召集以色列各支派tī示剑集会，ná亲像第廿三章2节仝款。过去召集ê地点是tī示罗，chit-má却是tī示剑。Á且强调in lóng「来到上帝面前」，chit句话已经teh表示当时ê「示剑」已经是一个宗教中心。Mā因为chit句话，接落去第2到13节chit段经文，ē-sái讲是用上帝ê名对以色列人民讲话。

第2到3节，先提起上帝呼召并拣选亚伯拉罕，而且强调当时亚伯拉罕所khiā起ê所在，是一个「拜别ê神明」，上帝赏赐hō͘亚伯拉罕有一个kiáⁿ以撒。

第4节，chit节提起雅各继承族长ê使命，并且带tio̍h kui个家族进入埃及。

第5到7节，chit段经文讲tio̍h上帝差派摩西kah亚伦kā以色列人tùi埃及带领出来，并且用红海阻挡并吞食埃及人ê追兵，hō͘以色列人民thang进入旷野漂流真长一段时间。

第8到13节，chit段lóng是描述tī旷野发生ê各种事件，特别是上帝带领in已经来到à约旦河东岸，过程中有亚摩利人来攻击in，iáu有摩押人设法chhōe巴兰来诅咒以色列人民等，m̄-koh上帝并无听巴兰ê祈祷。然后，上帝带领以色列人民pôaⁿ过约旦河，进入迦南地，一一驱逐当地居民。M̄-koh chiah-ê居民hông驱逐，并m̄是因为以色列人民有甚么能力á是有强大ê武力，却是因为上帝ê赏赐。上帝赏赐hō͘ in ê包括土地、城市，mā包括了in tī迦南地享受美好ê食物。