约珥书 3章1节 到 3章21节   背景资料  上一笔
当先知约珥呼吁伊ê同胞一定会确实悔改,来期待上帝ē-tàng赦免、赦免ê时,伊真清楚指出,上帝并无ài他子民ê悔改只是外表上做做款式,却是ài in真实地tùi心内ê悔改做起,这就ná亲像teh拆裂心肝仝款(中文和合本用「beh拆裂心肠」,台语汉字本用「拆裂lín ê心」)。这kah大卫王犯罪了后忏悔ê时所讲ê意思仝款;伊讲:「上帝ah,祢所意爱ê祭就是忧伤ê心;忧伤痛悔ê 心,祢bē 看轻。(全民版)」(诗篇五十一:17)tī先知以赛亚讲有chit种心境者,上帝一定会hō͘ chit种人重新得tio̍h性命ê「希望」(参考以赛亚书五十七:15)。

先知约珥ê呼吁了后,以色列人民确实有真具体ê回应,因为án-ne,先知约珥就传出了上帝hō͘以色列人民非常美好ê信息做回应,chit-ê信息是上帝ê拯救kah怜悯。Tùi第二章18节开始直到第三章最后,lóng是án-ne ê信息。

悔改ê意义,就是kā罪恶改变成做良善,chit种人会得tio̍h上帝ê欢喜kah接纳,chit点mā ē-sái讲是kui本圣经ê中心主题。以色列人民必定是tī听tio̍h先知约珥ê呼吁了后,有明确ê改变,chiah会hō͘上帝生出怜悯ê心,决定beh改变他本来beh毁灭以色列ê计画,换做赐福、赦免、怜悯,并且继续接纳以色列人民为他ê子民,他是以色列人民ê上帝。

第1节,chia开始就提起「上主ê日子」。Chit-ê词句一再出现(参考一:15、二章:1、11、29、三:1、14、18),ē-tàng看出先知约珥对「上帝ê日子」chit-ê信息ê看重。通常tī先知文献中,chit-ê词句lóng是teh指上帝ê审判来临之日,同时mā thang讲是teh指上帝拯救、怜悯ê时刻。Tī先知约珥ê信息中mā是án-ne;伊tī第一章到二章17节chìn前,谈起「上帝ê日子」,所beh表达ê信息lóng是kah上帝惩罚ê时刻来临有关。Á tùi第二章18节了后到第三章结束,「上帝ê日子」lóng是kah上帝拯救ê恩典来临有密切关系。

Chit节讲上帝「beh hō͘犹大kah耶路撒冷重新繁荣起来」,chit句话thang对照第二章23节所提起「锡安ê人民,tio̍h欢乐」chit句话。「繁荣起来」有一个重要ê意义,就是有丰富ê性命力。Chit种性命力bē因为tú-tio̍h困境就埋怨、kiu-kiu,á是妥协,却是会想beh尽一切办法好好á生存落去,因为确信上帝必定会同在,mā会适ê时伸出援手救助。

第2到6节,chit节提起「审判谷」,意思是teh指「耶和华ê审判」。M̄-koh现今已经无法度确定这地点是tī tó位,m̄-koh真可能是teh指耶路撒冷城外南边ê「欣嫩子谷」,chit-ê地mā是当时执行死刑á是倾倒垃圾ê所在。

为甚么上帝beh集合万国到chit-ê所在来?原因如下:

一是in侵占了以色列土地,逼kah人民四散到外国去避难(第2节)。Chit款tāi-chì发生tī主前第八世纪ê亚述帝国,以及第六世纪巴比伦帝国,以及以后ê各种帝国,包括tī希腊帝国时代lóng是。

二是kā俘虏来ê以色列人民送到奴隶市场去贩卖,á是分配到王公贵族ê府中去做奴隶,而koh khah严重ê是kā儿童—无论男女,lóng当做换取娱乐ê「商品」般贩卖、兑换(第3节)。

三是掠夺了耶路撒冷圣殿内敬拜用ê圣器,并且kā chiah-ê敬拜上帝用ê圣器,the̍h去khǹg tī in庙里供奉偶像神明,这是对上帝极大ê侮辱(第5节)。先知何西阿mā bat án-ne指控过in(参考何西阿书二:8)。

四是kā以色列人民贩卖hō͘希腊人(第6节)。

先知约珥讲述chiah-ê用意,就是tī说明上帝对chiah-ê严重ê错误行为lóng记载kah非常清楚,一点mā无容允有狡辩、逃避ê机会。这mā是teh显明上帝公义审判ê特色。

注意第6节mā是tī前面提过ê,因为chia有谈起希腊人ê问题,因为án-ne,有学者认为先知约珥ê时代应该是tī主前第三、四世纪时代。

第7节,chit节讲上帝kā采取chit种报复ê方式,就是以chiah-ê大帝国对待上帝子民ê方法来对付in。这mā是一般所讲ê「报应」。

第8节,先知约珥讲上帝ê报复,就是hō͘ chiah-ê习惯海洋生活人,变成被卖者,in会hō͘卖hō͘ tī沙漠中游行各地经商ê阿拉伯人(示巴族),án-ne,in ná亲像以色列人民被绑tio̍h送上船卖去远方仝款,现在换做in家己hō͘人绑tio̍h,被骆驼商队ê人拖tio̍h,行过各地ê沙漠,仝款m̄知会hō͘卖到何方去做奴隶。

示巴人,这是阿拉伯人ê一支,圣经时代in tī商业上非常活跃。

Tùi第9节开始到最后,是先知约珥kah上帝之间交hō͘讲话ê记录。

    第9到10节,chit两节是上帝ài先知约珥公开宣告,讲上帝beh出征了,chiah-ê hō͘上帝点名ê国家好好á准备来对敌上帝pah。第10节提起上帝发起ê战争,tú好kah先知弥迦所讲ê,以后be7 koh有相战完全无仝(参考弥迦书四:3—4);先知约珥是讲beh chiah-ê对敌上帝ê国家、族群起来整军备战,上帝就beh派出他ê军队来攻打in à。

第11到12节,chit两节看起来ná亲像天顶ê天军beh kah地上ê联军开始phah起来仝款。先知约珥一方面tio̍h以色列四周围ê国家、民族lóng集合到「审判谷」来聚集,另外一方面,伊mā祈祷上帝差遣天军降临来kah chiah-ê国家相战。其实,先知约珥chit段话已经讲出一个重要ê信息:

chiah-ê列强国家并无悔改,若无,in一听讲先知约珥ài in到上帝审判ê所在去,就会知影he是惩罚时刻来临à,聪明ê人会马上悔改归向上帝,来期待得tio̍h上帝ê赦免kah怜悯。

第12节下半句ê「上主beh tī hia开庭」进行审判ê工作,这mā表示上帝ê军队已经战赢chiah-ê骄傲国家ê军队,chiah会开庭审判chiah-ê现代人所讲ê「战犯」。

第13节,chia用作穑人teh收割ê情景来形容上帝审判ê款,这ná亲像tī第一章kah第二章所描述ê,上帝差遣草蜢过境仝款,摧毁了所有ê农作物仝款。现在上帝ê审判ná亲像作穑人the̍h镰刀teh收割成熟ê粟á仝款,双手收割ê动作非常俐落,hit种轻快有力,而且收得非常清气。同时mā用葡萄收成了后,送入去压酒池去压汁、kek酒。Chia用「满溢出来」,表示葡萄丰收。先知约珥用chit种句话teh描述上帝ê军队确实是大获胜利。而且上帝是用非常严厉ê方式审判hiah-ê邪恶者,先知约珥形容上帝ê审判ná亲像榨压葡萄ê方式,bē漏掉任何一粒葡萄般ê来审判chiah-ê邪恶者。

第14节「成千上万」,这表示聚集ê人数相当chē ê意思。

第15节,这是常看tio̍h ê句话,lóng是用来形容末日来临ê景象,像第二章10节、31节等等,表示情况是已经到à非常严重ê程度à。

第16节,chit节tú好讲出「上帝ê日子」另外一个意义就是以色列人民得拯救ê日子,hiah-ê邪恶ê国家、族群受审判ê时刻。现在上帝beh tùi耶路撒冷发出非常忿怒ê「怒吼」声音。上帝怒吼ê声音足以hō͘「天地lóng颤抖」,而且声音之大ná亲像出埃及记ê作者用「雷轰」声音来表示上帝ê出现(参考出埃及记十九:16—19,诗篇七十七:17—19,以赛亚书廿九:6)。「雷轰」表示表示上帝ê忿怒,beh惩罚背逆ê子民kah邪恶ê国家、民族,mā teh表示上帝beh来拯救他ê子民脱离敌人ê手。

第17节,「你就知影我是上主」,chit句话不时出现tī上帝施行神迹奇事,彰显他奇妙ê作为了后。值得注意ê是:当上帝彰显他ê神迹奇事异能ê时,有两个情况ē-tàng看出来,一是上帝施行大能ê手拯救他ê子民脱离苦难。其二是上帝出手重重地惩罚对敌他ê人。Koh讲,chit节koh一pái强化耶路撒冷城ê重要性,认为he是上帝khiā起ê所在,上帝必定会为tio̍h他ê荣耀而保护它,hō͘ hit-ê城永远屹立不摇。Tī以色列人民ê认知中,耶路撒冷城就是「上帝ê城」(参考诗篇四十六:、四十八:1)。In甚至称耶路撒冷城为「圣城」(参考以赛亚书四十八:2、五十二:1)。

第18节,chit节回应第17节所讲ê耶路撒冷城乃是上帝之城ê意义。先知约珥teh描述一个美丽景象:只要有上帝同在ê所在,就ná亲像是伊甸园仝款ê美丽,hō͘人看了lóng会垂涎(参考创世记三:8—14)。

Chit节讲「有一条泉水beh tùi上主ê圣殿流出来」,chit句话thang参考以西结书第四十七章1节。「泉水」,这是teh代表永恒性命ê记号,hō͘人永远ê性命bē饥渴。

第19到20节,上帝beh惩罚ê对象m̄-nā是「埃及」、「以东」而已,mā包括第4节提起ê泰尔、西顿、非利士等等chiah-ê国家、族群,上帝一定会惩罚chiah-ê欺压别人ê国家。这mā是tī第7节所讲ê,上帝beh照in对待别人ê方式,反tńg来对待in。这就是俗语所讲ê:「以其人ê道iáu治其人ê身。」

第21节,相对tī第20节所描述ê,耶路撒冷kā成做一个繁荣ê城市,因为有上帝ê慈爱teh照顾tio̍h hit-ê城。Chit种「人烟稠密」,tú好kah主前586年被巴比伦帝国摧毁了后,hit-ê城几呈废墟ê状态,完全颠倒。Tī上帝赐福之下,hit-ê城kā成做一个人人欢喜khiā起ê城市。


重新查询 专卷研经 约珥书系列
错误回报,请联系comm[@]fhl.net