约伯记 8章1节 到 8章22节   背景资料  上一笔  下一笔
Chit章是约伯ê第二个朋友书亚人比勒达tī约伯和提幔人以利法ê论述结束后,对约伯ê回应。Tùi比勒达讲话ê内容来看,伊显然比以利法对约伯苦难事件ê认知koh-khah少,伊一再强调约伯ê遭遇必定是因为得罪上帝ê缘故,包括伊ê kiáⁿ lóng得罪上帝。

比勒达所讲ê内容kah以利法所讲ê大部分是仝款ê,lóng是根据非常传统ê宗教信仰之认知,in认为人性命出现苦难,必定是因为人犯罪、得罪上帝。比勒达认为约伯ê kiáⁿ一定是得罪上帝chiah会遇tio̍h án-ne重大ê灾难来死亡。伊劝约伯tio̍h趁家己iáu活teh ê时chūn,赶紧悔改、认罪,án-ne chiah ē-tàng得tio̍h上帝赦免,并且可能iáu会得tio̍h加倍ê奖赏,补足伊过去所有ê损失。M̄-koh比勒达chit种讲法,约伯根本听不入去,反tńg hō͘约伯koh khah受气、不平。约伯回答比勒达ê话,比起比勒达讲ê话加真chē,包含第九章kah第十章。

第1到3节,比勒达认为约伯回答以利法ê话「空洞」无内容。伊对约伯表示非常不满,因为án-ne,伊用真无客气ê语气回应约伯ê话。伊讲约伯ê话明明是就是乌白讲,甚至是「颠颠倒是非」。Chia ê「颠倒」一词,指ê是「扭曲」、「变形」ê意思。伊认为公义ê上帝,绝对bē扭曲事实,mā bē冤屈好人。而且公义ê上帝绝对bē做出错误ê事。比勒达想beh讲ê是:约伯和伊ê家族会án-ne连连tú-tio̍h重大灾难,一定是家己犯罪,因为公义ê上帝绝对bē无缘无故ê惩罚人。伊ê看法是:如果约伯无认为上帝是公义ê神,伊根本就bē转向上帝求救。

第4到7节,比勒达确实是真努力试beh帮助约伯了解tú-tio̍h灾难ê原因,这mā是伊提出ê第一个「可能性」,就是约伯kiáⁿ得罪上帝。M̄-koh因为比勒达有chit种讲法,hō͘约伯非常艰苦心。因为比勒达án-ne讲,等于是teh kā约伯讲讲:伊ê kiáⁿ会tú-tio̍h灾难来死,是罪有应得。Chit种讲法对正teh受难中ê人来讲,是非常「残酷」ê。真正ê问题,是出tī比勒达并无指出约伯ê kiáⁿ到底tó位犯罪。

续落来比勒达提出ê第二个解决ê可能性,就是帮助约伯知影怎样「重新得力」。伊ê观点就是「转向上帝」,向他悔改、认罪,只有án-ne,chiah ē-tàng得tio̍h上帝ê帮助。比勒达提出一个基本信仰认知:走chhōe上帝ê人,必定会得tio̍h丰富ê奖赏。伊建议约伯应该tio̍h恳切向上帝求助,tio̍h趁 iáu活teh ê时chūn,赶紧走chhōe上帝,chiah有恢复以往光彩岁月ê希望。伊讲上帝一定会tī约伯承认错误而且悔改了后,赏赐hō͘约伯比以前koh-khah chē。Chia用「恢复」一词,原本是teh指「重新建立」、「填满」ê意思。后来,根据约伯记第四十二章10到17节记载,约伯后来确实得tio̍h比以前上帝赏赐hō͘伊ê koh-khah chē。(m̄-koh该段经文,一再被圣经学者存疑,in认为该段并m̄是本来约伯记ê作品,却是后来编辑者附加上去ê。有关此点teh绍介chit本经册ê时已经提起过。)m̄-koh比勒达所提出ê chit种看法,tú好是撒旦向上帝挑战ê时所提起ê「有利可图」ê意思,chit点却是约伯记作者所不认同ê信仰内涵。约伯记ê作者siōng想beh kā所有读者讲ê是:真正信仰应该建立tī「无利thang图」ê基础上chiah正确。

    第8到10节,比勒达劝约伯tùi古圣先贤ê「祖先」之经历来学习,比勒达用「咱ê性命目nih-á」、「像掠过大地ê影儿」等chit种句话,主要目的是beh kā约伯讲,tī hiah-ni̍h有限ê性命中,人真oh了解性命ê奥秘,无论jōa-ni̍h-á努力,结果iáu是「一无所知」。伊koh一pái强调古代贤者ê智慧、经验,应该是siōng好ê帮助,注意听in讲过ê话,注视in行过ê脚迹,而in性命所经历ê,thang成做真好ê「教导」。

    第11到12节,比勒达用「蒲草」kah「芦苇」来譬喻性命ê目nih-á kah脆弱,说明一个人如果想beh óa靠家己ê能力,就会亲像chit两种植物仝款ê脆弱、无力。因为「蒲草」kah「芦苇」,chit两种水生植物,如果tú-tio̍h干旱季节,马上就会lian去,失去性命力。比勒达mā用chit种话teh暗示:得来ê快,失去ê mā快。

    第13到15节,ē-tàng看出比勒达思想ê重点,mā是以色列人民久长以来共同ê性命经验,in认为上帝就是性命ê源头,会失去上帝,等于会失去一切。比勒达用以色列人民所熟悉ê信仰认知提醒约伯:m̄-thang「bē记得上帝」,因为他chiah是性命ê源头。「bē记得上帝」,等于是切断kah上帝之间ê关系。伊tī chia一再用「蜘蛛网」来譬喻,这是挂tī草丛á是树叶中ê昆虫之丝,对目nih-á性命ê飞蛾、昆虫等有非常ê刣伤力。M̄-koh对人来讲,蜘蛛网是脆弱无比,只要人ê手轻轻一碰,就ē-tàng hō͘蜘蛛网破裂、损pháiⁿ,因为án-ne,若有人想beh用chit种网来做性命ê óa靠,he明明是愚戆至极ê想法。比勒达用「蜘蛛网」来譬喻,除了性命ê主上帝以外,人无论chhōe甚么外在物件á是力量当做óa靠,lóng kā ná亲像走chhōe「蜘蛛网」保护性命仝款,是真糊涂koh thang悲ê事。

第16到19节,比勒达tī chia ê「杂草」说明表面上看起来,生长kah非常紧,而且非常茂盛,甚至iáu会蔓延到墙篱外面,m̄-koh因为chiah-ê都无深厚根基,ná亲像「杂草」仝款,随时可能会hō͘拔除。生做真紧,lian去得mā真紧。伊讲「邪恶ê人」,ná亲像「杂草」仝款,所有ê荣华富贵只不过lóng是表面ê景象,只要小khóa用力,就thang kā它连根拔起,kah chiah-ê「杂草」仝款随时死亡。然后「无人知影它bat tī hia扎过根」。比勒达ê话隐约中kah-ná是beh警告约伯,过去伊所óa靠ê财富、雄厚家势等,lóng像chiah-ê杂草无根基ê植物仝款脆弱,tú-tio̍h考验随时会lian去、被拔除而失去性命。然后tùi第19节thang总结比勒达ê观点:愚戆ê人chiah会喜爱chit种目nih-á、易逝ê性命,m̄-koh这无应该是人ê性命目标。Mā只有愚戆ê人chiah会kā性命托付tī hiah-ê如蒲草、芦苇、蜘蛛网、蔓藤草等等chiah-ê bē稳固ê事物上。

    第20到22节,chit段经文thang看tio̍h以利法观点ê重现(参考约伯记四:7—9、五:17—27),就是上帝对待义人kah恶人之间ê差别,而这mā是智慧文学典型ê笔法,强调义人(好人)必定会得tio̍h上帝ê祝福,相对ê,恶人一定结出无好ê果子。Teh比勒达ê认知里,约伯ná亲像一个「邪恶ê人」(mā thang当做「罪人」)。因为如果约伯是一个「无thang指责ê人」好人(á是讲「义人」),上帝一定会帮助伊,koh khah「bē弃sak」伊。M̄-nā án-ne,上帝会koh一pái hō͘伊「喜笑」、「欢呼」,表示重新得tio̍h荣耀。伊强调上帝m̄-nā会赐福hō͘ óa靠他ê人,对tī hiah-ê「无thang指责ê人」,上帝mā一定会庇护,绝对bē弃sak。Á相对ê,对tī hiah-ê恨恶上帝所kah意ê子民者,上帝一定会hō͘ chit种人「蒙羞受辱」,因为chit种人无意爱上帝ê公义。最后,必定hō͘ 上帝所消灭。

重新查询 专卷研经 约伯记系列
错误回报,请联系comm[@]fhl.net