Chit章是约伯继续第六章，m̄-koh chit章已经无koh是对以利法讲话，却是约伯向上帝讲出伊心灵苦闷ê话语，伊teh向上帝表达对家己性命所tú-tio̍h ê苦难感觉无力kah无奈，伊确定家己ê苦难，是tùi上帝来ê惩罚，因为án-ne，若beh án-ne痛苦活teh，伊倒希望不如hō͘家己死去，来得有khah好。伊描述家己目前ê苦难，包括伊身上ê疾病缠身，心力交瘁，身心俱疲外，伊深深体会tio̍h án-ne痛苦ê性命，活teh并无甚么特别ê意义thang讲。

第1到3节，约伯一开始就用「做兵」，来形容性命苦难ê现象。Chia ê「做兵」一词，mā thang翻译成「苦役」，意思是teh指像奴隶一般ê工作，是人tī体力上极大ê负担。伊讲家己像「奴隶」，渴慕歇困一下，á是mā像「雇工」，期待一点点á工资好糊口，伊用chit种方式teh形容家己ê卑贱身分，只有ē-tàng tī困苦ê岁月中过日子。约伯是用chit种方式teh反驳以利法tī头前所提起ê，认为性命有苦难，是因为人犯罪ê缘故（参考五：6），m̄-koh约伯认为m̄是án-ne，却是因为国家phah败仗，受掠成做奴隶；若无，就是因为非常sàn-chhiah，致使需要卖身为奴。伊khah强调ê是ná亲像第1节所提起ê，chit种运命m̄是出tī本身ê意愿，却是「被迫」ê，chit种「被迫」有环境ê因素。Á环境应该是kah上帝有密切关系。

第4到6节，约伯讲家己tī暗时困ê时chūn，一躺落来想beh歇困，希望用此方式来减轻痛苦。M̄-koh就算只是án-ne ê期待，mā lóng是一种奢求。约伯期待暗时来到ê时，就ē-tàng好好á歇困一下，喘口气。Ē-sái讲是日时头劳碌工作hō͘筋骨酸痛到暗时无法度成眠。因为án-ne，只好反tńg来期待日时头赶紧来临。Ē-sái讲是，当想tio̍h日时头来临ê时，koh得koh再去面临艰苦ê奴工生活ê时，就koh khah感叹性命ê苦难。结果是人躺tī床顶，mā chhia-péng困bē去，面临chit种性命ê苦难，真是苦不堪言。性命siōng大ê痛苦，就是身处矛盾ê中间。第5节，thang参考第二章7到8节，描述约伯身上长满疮，而且坐tī粪埽堆中用瓦片刮身上ê毒疮。伊讲家己ê性命ná亲像古代织布机上ê「梭」，表示家己ê性命过ê非常紧，快到连人想beh看一下「梭」如何在织布机中穿梭tio̍h mā真oh。

    第7到11节，约伯讲家己ê「性命只是做一困息」，类似chit种感叹性命短促ê句话，tī约伯记中一再出现，mā是约伯记中一再提起ê观念（参考四：20、八：9、九：25—26、十四：1—2）。这「做一困息」mā有含另外一个意思，就是teh指「一阵风」，teh表示另外一个意义是「飘渺」、「虚无」。约伯用chit种方式teh提醒上帝，希望上帝注意tio̍h伊tú-teh受苦，若无，若koh再慢一点ê话，就别想beh「看会tio̍h」伊，因为伊可能已经「无tī」，表示往生。伊讲「人死去无koh tńg去」，真紧to̍h会hō͘亲朋好友，甚至是家己厝里ê亲人hō͘ bē记得。即使tī chit种苦难中，约伯iáu是beh kā心灵深处ê苦闷讲出来hō͘上帝知影，伊希望上帝tī伊iáu未死chìn前，会重视伊、知影伊所受ê苦oh得有jōa大。约伯自认对上帝忠心耿耿，从来无违背上帝ê旨意，却因身边ê chiah-ê朋友指责kah闲言闲语，hō͘伊koh khah心痛。

第12到16节，约伯怀疑上帝kā伊当做是一个pháiⁿ人、怪兽（海怪）一般teh看待伊。伊用「防守」（mā thang当做「警卫」解释）、「恐吓」、「每ê时每刻lóng看tio̍h伊」等字句，形容上帝对伊ê m̄信任kah怀疑。伊自认m̄是「海怪」，m̄-koh上帝却像看待「海怪」仝款对伊，hō͘伊感觉真冤枉。第13到14节，thang参考第4节；tī第4节约伯讲暗时根本无法度入眠困，而tī chia则讲上帝用「恶梦恐吓」伊，hō͘伊无法度得tio̍h歇困。人siōng痛苦ê事，就是无法度睡得安适，因为án-ne，约伯讲若beh án-ne痛苦，不如「窒息」来死总比hō͘伊活teh受苦iáu会khah受好。Taⁿ伊已经对性命无koh寄hō͘任何希望ê态度，因为活teh是án-ne痛苦，ná有甚么意义thang讲？伊希望上帝「chhut-chāi」伊去，m̄-thang koh再管伊。

第17到21节，tī诗篇第八章4到6节有类似第17节chit种句话，当诗人强调人ê渺小时，相对ê，就是teh歌颂上帝ê伟大。约伯引用诗人ê话语，是因为伊肯定虽然家己真渺小，m̄-koh上帝并无因为án-ne就kā伊bē记得，他iáu是仝款「看重」、「重视」tio̍h伊。就是因为án-ne，hō͘伊连想要求死ê机会都无，因为上帝kā伊看kah ân-ân ê，连hō͘伊想beh「咽下一嘴唾沫」ê机会mā无。其实chit种讲法mā teh表示：上帝对约伯保护得非常好，他绝对bē hō͘约伯死去。

另外一方面，约伯mā teh向上帝控诉，为甚么ài kā伊看紧到如仝一个罪犯，就算是，一个罪人有甚么所在值得上帝kā伊看kah chiah-ni̍h ân，伊认为家己身陷苦难中，已经不值得上帝án-ne保护伊。约伯mā对上帝ê慈悲提出质疑地，伊认为如果伊有错，怜悯ê上帝应该会赦免伊chiah-tio̍h。M̄-koh为甚么慈悲、怜悯ê上帝无án-ne？伊koh一pái希望上帝「正视」、「注意」伊，而伊mā相信上帝一定会án-ne，只是伊希望chit-ê时间bēkhah受太慢。