约伯记 42章1节 到 42章6节   背景资料  上一笔  下一笔
Chit章thang分做两个段落,其一是tùi第1到6节,这是约伯第二pái回应上帝ê话,mā是上帝kah约伯之间对话ê结束。其二是tùi第7到17节,这部分属tī结尾,mā是约伯记ê总结。

Chit段是约伯第二pái回答上帝所讲ê话。Chit pái ê回答kah第一pái回答有仝款ê所在(参考四十:3—5)。

第1到2节,约伯开始就讲「我知影」,相对tī上帝开始讲伊是「竟讲无知ê话」(参考三十八:2),tú好呈现完全相对ê状态。伊承认上帝是「事事lóng ē-tàng」,只要是上帝「计划」ê事,lóng必定会「实现」。这mā是teh表示:chit-má约伯已经明白并且相信,家己受苦是有上帝ê计划tī其中。伊知影「你ē-tàng实现一切计划」,bē因为有人chē言chē语而改变本来ê计划,mā bē hō͘人ê意见所左右。

第3到4节,约伯koh一pái承认家己ê「无知」,mā承认家己过去所讲ê话,其实连家己mā m̄-bat。chit-má伊知影上帝做事、计划「奇妙异常,无法度领悟」。伊讲上帝beh伊「注意听」,m̄-koh伊过去却kan-taⁿ想beh讲hō͘上帝听,这是错误ê。「注意听」,这mā是kui本圣经ê教示。

第5节,chit节ē-sái讲是kui本约伯siōng重要ê经文之一,说明人对上帝创造「奇妙异常」ê认bat真少。过去所认bat ê,lóng是「听别人谈论」上帝ê事,chit-má听上帝ê话了后,chiah发见家己过去ê认bat非常有限。chit-má「亲目看见」上帝,表示明白、晓悟ê意思,这是直接、亲身ê体验,而无koh是透过别人绍介、间接性ê认bat。

第6节,chit节thang对照第九章21节。约伯对家己以前「讲过ê话感觉见笑」。Chia所讲ê「见笑」,有含惊惶ê意思,因为知影错误,惊惶上帝无欢喜、受气(参考创世记三:10)。约伯用真严肃ê方式来表示家己诚心实意ê忏悔态度;伊以「坐tī土粉kah炉灰中忏悔」来表示siōng真诚ê悔意。「土粉kah炉灰」,chiah-ê lóng是无用ê物件,只有ē-tàng任人践踏、弃sak。

重新查询 专卷研经 约伯记系列
错误回报,请联系comm[@]fhl.net