约伯记 42章7节 到 42章17节   背景资料  上一笔
Chit段经文说明上帝对约伯ê肯定,相对ê,上帝对以利法等三个约伯朋友ê论点并无满意。M̄-koh欠缺上帝对以利户ê裁判,这mā是有kóa圣经学者认为,第三十二到三十七章chit段以利户ê言论是tī chit本经册已经编辑完成了后,chiah加添上去ê结果。

Tùi第10节开始,有bē少圣经学者认为chit段经文hō͘约伯记chit本经册ê美妙失味à。因为chit段经文tú好koh tńg来到「善有善报、恶有恶报」ê传统观念中,破坏了原本约伯记siōng精彩ê「善,无一定有善报;恶,mā无一定有恶报」ê观点,hō͘本来整体结构ê基础受tio̍h摇动。

M̄-koh,另外一种看法是:当人明白上帝ê旨意了后,就会明白上帝乃是个赏赐ê上帝,他mā是丰富ê上帝。对tī信靠他ê人,上帝绝对bē袖手旁观。因为án-ne,当约伯明白上帝旨意了后,伊开始奋力khiā起来,koh努力工作,而得tio̍h好成果。

第7到9节,上帝进行审判,甚么人对、甚么人错。人ê标准确实kah上帝ê看法差别真大;tī上帝ê看法里,以利法、比勒达、琐法三人对上帝ê认bat,远不如约伯。虽然约伯一直用真严厉ê语句对上帝表示抗议,m̄-koh约伯ê话却是诚实ê;相对ê,以利法等三位朋友所讲ê,虽然听起来kah-ná真正确,m̄-koh in却m̄是真正明白上帝ê旨意。

Tī chia上帝称呼约伯是「我ê奴仆」,tùi chit本经册ê开始,上帝就是án-ne称呼约伯(参考一:8),chit种称呼lóng teh表示约伯是上帝特别拣选ê。作者有意在表明上帝呼召一个人来成做他ê奴仆,就已经有意hō͘奴仆「受苦」,用以训练奴仆忍受苦难ê耐力(参考以赛亚书第五十三章)。约伯siōng hō͘人动容ê所在,乃是伊讲:「我chit-ê 皮败坏了后,我会tī 肉体ê 外面ē-tàng 见上帝。我本身会看tio̍h 他是为我ê,我亲目看tio̍h 他m̄ 是外人;我ê 心肠tī 我内面热kah 强beh 熔去。(全民版)」(约伯记十九:26—27)显示约伯对上帝有绝对ê信心,即使伊tú-tio̍h siōng大ê灾难,mā无放弃见上帝ê面,虽然是残破、潦倒ê状况,伊iáu-koh深信上帝会接纳伊、见伊。上帝beh以利法等等chiah-ê人用「七只公牛,七只公羊,到约伯hia去献上烧化祭」,这是用来做「赎罪」ê礼仪一定tio̍h有ê方式(参考利未记一:1—13)。M̄-koh摩西律法并无规定tio̍h献「七只」,其实,只需献一只就有够。献上七只,表示siōng完整、siōng完美ê意思。

然后上帝beh约伯为伊ê三个朋友代祷,上帝「会欢喜接纳伊ê祈求」,因为伊确实是认bat上帝ê人。真正认bat上帝ê人,chiah会明白怎样kah上帝对话。真重要ê是约伯ê chit三位朋友—以利法、比勒达、琐法等三人,就听从了上帝ê吩咐去做。Á「上帝欢喜接纳约伯ê祈求」,表明上帝kah约伯ê关系,并无因为约伯苦难ê遭遇有所改变,因为tī上帝ê眼中,约伯乃是他忠实ê奴仆。上帝并m̄是根据人ê标准看待人,因为上帝是鉴察人心内ê上帝,并无照外表来衡量人(参考撒母耳记上十六:7)。

第10到11节,约伯为以利法等三位朋友「祈祷」,这是teh指「祝福」ê意思。上帝「恢复了伊ê景况」,hō͘约伯「比以前加倍兴盛」,因为án-ne,亲朋好友lóng因为约伯恢复了昔日光彩而来探望。大家lóng纷纷送hō͘约伯「一kóa钱kah一个金环」,是teh代表敬意ê礼物。

第12到15节,chit节thang比较第10节ê「加倍兴旺」,说明上帝赐福比以前koh-khah-chē。原本有七千只羊(参考约伯记一:3),chit-má有「一万四千只」;过去有三千只骆驼,chit-má有「六千头」;以前一千头牛,chit-má有「二千头」;以前有五百匹驴á,chit-má是有「一千匹」等,chiah-ê lóng说明加倍ê意思。然后koh赏赐hō͘伊kah以往仝款有「七个kiáⁿ,三个cha-bó͘-kiáⁿ」,并且讲chit三个cha-bó͘-kiáⁿ是比以前koh khah「súi」,而且是「世间」siōng súi ê。比较特别ê所在是chia特别记载约伯chit三个cha-bó͘-kiáⁿ ê名:「耶米玛」,这是象徵粉鸟ê温柔、可爱;「基洗亚」,是肉桂ê意思,这是一种制造高级香水ê材料;「基莲・哈朴」,意思是teh指画眉ê小化妆盒,是súi ê装饰品。

第16到17节,约伯koh「koh活了一百四十年」,chit句话表明约伯看tio̍h「四代kiáⁿ孙」。表示伊ê kiáⁿ lóng已经成家立业,而且是儿孙满堂ê意思,是世间ê人看做siōng幸福ê标准。Koh讲,这「一百四十」tú好是「七」ê倍数。Á「七」tī以色列文化中,表明ê是上帝赐福。因为án-ne,mā teh表示约伯后来活在世间ê这「一百四十」年岁月,确实是充满tio̍h上帝ê赐福kah恩典,而这mā是teh回应第12节所提起ê「上主赐福hō͘伊,比伊早年所得ê koh-khah chē」chit句话。约伯最后是「长寿善终」,这mā是圣经作者形容一个人得tio̍h上帝祝福ê意思。

重新查询 专卷研经 约伯记系列
错误回报,请联系comm[@]fhl.net