约伯记 4章1节 到 4章21节   背景资料  上一笔  下一笔
Tùi chit章开始直到十四章止,lóng是约伯ê朋友kah伊ê第一回合对话。Á其中第四章到七章是提幔人以利法kah约伯ê对话。开始ê第四到五章,是提幔人以利法对约伯表示哀伤ê心境表达看法,然后第六到七章是约伯回答以利法ê讲法。

Teh传统上,以色列人真清楚绝对bē-tàng对上帝发怨言。In认为做一个人对上帝发出强烈抗议之言论ê时,会为性命带来灾难(参考民数记十四:26—38)。Tī in ê观念中,灾难kah人ê罪恶有密切关系,因为he是上帝对人犯罪ê惩罚。因为án-ne,约伯ê chiah-ê朋友认为约伯必定是犯严重ê罪,chiah会遭遇án-ne重大ê灾难。如果是án-ne,约伯就应该tio̍h认罪悔改,bē-tàng对上帝发怨言。因为án-ne,chit位siōng年长ê朋友决定提出伊ê看法,阻止约伯发怨言,免得惹起上帝ê忿怒遇tio̍h上帝koh-khah严厉ê惩罚。

第1到2节:提幔人以利法事(tāi)先发言,伊可能是chit三位朋友中年龄siōng长ê一位,因为án-ne,每pái lóng是由伊开始发言(参考十五:1、廿二:1)。以利法mā表示伊之所以beh抢tio̍h发言,是因为受不了「久长ê沉默」,因为in chit三个朋友有长到「七工七夜」静默不语,teh陪伴约伯。

第3到4节,chit两节看起来kah-ná teh鼓励约伯,肯定伊过去所做ê。M̄-koh其实,mā teh暗中讽刺约伯过去行善,是因为「有利可图」,若无应该是亲像箴言所强调会「善有善报」chiah-tio̍h,怎样taⁿ却是灾难连连?

第5到6节,chit两节tú好kah第3到4节成相对内容;tī第3到4节o-ló约伯teh教导别人方面有好ê成果,第5到6 chit两节soah讲当灾难临身ê时,约伯显露出来ê,却kah伊过去teh教导别人ê相违背。换句话讲,以利法认为约伯kan-taⁿ会教导别人,真ê家己身处患难ê时,却做bē到。Tī以利法ê观点里,一个知影「敬畏」上帝ê人,就是对上帝有信心、有ǹg望ê人。Taⁿ约伯却对上帝连续发出哀怨之言,显然伊并m̄是真正「敬虔」ê人。换句话讲,tùi以利法ê话中,已经对约伯tī信心上ê纯洁度kah真实情况提出疑问。

第7到9节,chit段经文是非常典型ê「箴言」论调:善有善报、恶有恶报(参考箴言十:27—30)。以利法提出一个普世原则,he就是箴言所强调ê:善有善报、恶有恶报。以利法用当时社会种作ê经验,说明一个性命哲理:好心得好报,pháiⁿ人自食恶果。以利法ê讲法已经是teh怀疑约伯可能bat做真chē pháiⁿ事,却隐藏得非常好,hō͘大家lóng认为伊是一个好人。因为如果约伯真正是「正直ê人」,上帝必定会拯救伊脱离灾难(参考箴言十一:21)。显然地,约伯并m̄是真正好人,而必定是犯bē-tàng原谅ê重罪,chiah会有今á日chit种苦难,甚至是ài面对死亡ê威胁。以利法ê观点tú好说明一般人久长以来ê观念:种ê是甚么因,收ê mā必定是甚么果。所谓「种瓜得瓜」,chit种金科玉律ê讲法(参考箴言廿二:8,何西阿书八:7、十:12a、13)。

其实,以利法所提出ê并m̄是甚么深奥ê道理,却是一般生活中所经验到ê道德规律。

第10到11节,以利法用「狮」来说明邪恶力量真大,无人ē-tàng阻止hit种ná亲像猛狮咆哮般ê邪恶,m̄-koh上帝却thang轻易kā chit种力量消灭。

第12到15节,以利法用梦来解释上帝ê惩罚,就是所讲ê做恶梦。Chit种恶梦甚至会hō͘伊感觉「全身pi̍h-pi̍h-chhoah」、「毛发khiā立」,hō͘伊心生惊惶之态。

第16到17节,以利法讲伊tī眠梦中看见某种形像出现,m̄-koh伊无法度辨认出来。不过伊却听tio̍h「声音」。Chit-ê声音表示无任何人thang khiā tī上帝面前而自认是「纯洁」、「义人」ê人。

    以利法ê chiah-ê讲法显然并无真正明白约伯所tú-tio̍h ê处境,因为并m̄是伊有甚么错,却是上帝允准伊受tio̍h撒旦ê折磨。Koh讲,tùi开始到chit-má,约伯并无直接抱怨上帝tī伊身上所发生ê事,伊只是抱怨性命ê苦难,若beh生存tī苦难中,不如bē出世来得好。

第18到19节,chit段是继续前段经文第17节所提起ê,甚么人chiah是真正无罪ê人?甚么人chiah是所谓「义人」?其实,除了上帝以外,世间无所谓「好人」(参考诗篇十四:1—3),包括天顶ê天使mā是仝款。以利法提出ê一个基本ê论调:如果连天使lóng无法度被列入纯洁、无瑕疵ê族群,koh khah何况是人?会朽烂败坏ê人,怎样ē-tàng kah天使相比?Chit两节lóng提起人性命ê目nih-á,无法度想亲像上帝ê无限kah永恒(参考诗篇三十九:5、九十:3—6)。人可能连家己犯罪lóng m̄知,结果瞬间ê性命,一下á就无了,连tio̍h悔改ê时间mā无,án-ne就真可惜。以利法就是beh约伯赶紧悔改,m̄-thang一直停留tī自怨自哀。

第20到21节,以利法继续用以色列人民生活ê经验来说明性命ê脆弱kah有限。照以利法ê看法,人ê性命是án-ne脆弱,而且渺小到「无人chhap」。Á siōng悲哀ê事,to̍h是当人死去,犹原是hiah-ni̍h-á「愚昧无知」,伊惊约伯会án-ne。

Thang án-ne了解:约伯并m̄是m̄知人ê渺小,伊只是想beh知影一件事:如果好人lóng会tú-tio̍h灾难,án-ne,上帝beh用甚么款ê人来替他管理他亲手所创造ê世界,而且ē-tàng hō͘ chit-ê世界有秩序thang循?如果好人kah pháiⁿ人无区分,mā会受tio̍h án-ne大ê苦难,ná chit种世界koh tio̍h án怎符合上帝创造ê旨意?
重新查询 专卷研经 约伯记系列
错误回报,请联系comm[@]fhl.net