约伯记 38章1节 到 38章41节   背景资料  上一笔  下一笔
Tùi chit章开始直到第四十一章止,是上帝回答约伯连续提出ê问题。然续后落来tī第四十二章1到6节是约伯简略回答上帝所提出来ê真chē问题。Kui本约伯记siōng重要ê部分,mā是Tī chit段上帝回答约伯提出询问苦难ê原因。M̄-koh tio̍h注意ê是上帝并无直接hō͘约伯答案,反tńg向约伯提出连串ê问题。这说明一件事:约伯所期待ê,是上帝针对伊ê问题作答,m̄-koh上帝ê回答却是beh约伯tùi kui个宇宙万物存在ê奥秘来思考,而chiah-ê lóng是上帝创造ê。就tī chit中间,约伯chiah发见家己根本就是kui个宇宙万物中ê小丁点,原本约伯自认为真伟大,会晓非常chē,其实并m̄是án-ne。

Tī chit段经文中,作者用「上主tùi旋风中向约伯讲话」做踏话头,表示上帝ê伟大,ná亲像人看见旋风会懔neh惊惶仝款,因为只要旋风一转向到人ê身上,人kā失去影迹。这bat帮助约伯明白家己ê问题所在:上帝无回答人类提出ê任何问题。因为所有ê答案lóng tī他ê创造中,只要人小khóa细腻去观察、注意看,就会知影。约伯siōng大ê收成,就是tī chit种走chhōe解答ê过程中,tī信仰上有明显ê成长,而最后chiah发见家己ê问题所在。

Tī上帝chit段回答约伯ê问题中,thang分做两个大段落,一是tùi第三十八章1节到第四十章2节,然后约伯有简短ê回答(四十:3—5),二是第四十章6节到第四十一章34节,然后约伯第二pái回答(四十二:1—6)。约伯每pái回答,lóng对家己过去ê无知表示懊悔。显然地,当约伯听上帝所提出ê问题了后,chiah发见家己chìn前理直气壮想beh kah上帝辩论ê想法,lóng已经改变à。这mā说明约伯看tio̍h家己kah上帝之间带有极大ê落差,这mā tú亲像先知以赛亚所讲ê::「上主讲:我ê 念头m̄ 是lín ê 念头,lín ê 路m̄ 是我ê 路。因为天án 怎khah koân 地,我ê 路mā án-ne khah koân lín ê 路,我ê 念头khah koân lín ê 念头。(全民版)」(以赛亚书五十五:8—9)

Chit章tùi第4节开始,上帝连续用真chē无仝ê受造物,向约伯发问,chiah-ê受造物包括天kah地(第4到7节)、海洋(第8到11节、16节)、日头(第12到15节)、阴间(第17节)、光kah暗(第19到20节)、气候(第22到30节、34到38节)、星辰(第31到33节)等,宇宙万物lóng是上帝所创造,上帝用chiah-ê属tī他创造ê一切,mā是人看做「自然」,á是认为浩瀚伟大ê景象,甚至是无法度理解ê kui个寰宇现象来向约伯提出质问。主要lóng绕tī一个基本问题上:人对上帝所造ê宇宙万物认bat jōa-chē?其实,上帝就是tī问约伯:你bat jōa-chē?

第1节,这是第一pái「tùi旋风中向约伯讲话」,第二pái是tī第四十章6节。这mā是约伯所期待得tio̍h ê,tī头前有kúi-nā pái约伯一再向上帝提出问题,希望上帝kah伊对话,伊tio̍h kah上帝理论、答辩(参考九:32—33、十三:3、22、廿三:3—7、三十一:35、37)。Chia ê「旋风」,mā thang当做「暴风」解释,通常是用来形容上帝临在ê方式之一(参考诗篇五十:3,撒迦利亚书九:14)。这是一种hō͘人看见、听tio̍h就会懔neh心惊ê一种方式。

第2节,「你是甚么人」,这是上帝直接向约伯提出质疑地。上帝问约伯ná会对上帝ê智慧「表示怀疑」。Tī chia「智慧」一词,mā表示上帝创造ê奥秘kah他ê计画kah旨意(参考诗篇三十三:11,箴言十九:21)。
第3到7节,chit-má上帝beh约伯「像一个有勇气ê人」,原本意思是teh指「像一个人」á是「像一个cha-po͘人」。本来是约伯teh向上帝质问伊苦难ê由来,chit-má是上帝beh伊khiā起来回答上帝所提出ê问题。上帝m̄-nā无回答,却是提出问题ài约伯回答。上帝开始tùi他创造开始来问约伯,hit时伊tī tó位?换句话讲,人根本m̄知上帝是怎样创造世界ê。因为连人mā是上帝所创造ê。既然约伯家己认为真无辜,甚至怀疑上帝,他颠倒tio̍h问问约伯kui个受造ê宇宙,是甚么人kā它规划出来,以及怎样hō͘大地亲像一个有「支柱」支撑tio̍h。

    Chit段经文是kā上帝譬喻为一个建筑师,对tī他所创造ê一切,无论是设计á是制造ê过程,lóng是经过他细密ê计划了后chiah进行ê。当上帝创造完成ê时,天顶ê天使lóng「欢呼」歌颂,m̄-koh上帝问约伯,hit时chūn伊tī tó位?

第8到11节,chit段经文上帝是用海洋来做问题ê主轴。Tī以色列文化中,海洋á是大海通常表示乌暗á是恶势力ê所在地。M̄-koh上帝kā它譬喻ná亲像老母生gín-á仝款,大海是tùi大地生出来。然后上帝用奇特ê方法kā大海「关闭」、「挡止」,hō͘ chit种代表恶势力ê大海控制tòa ê,而这并m̄是人ê气力,却是上帝。上帝mā用云彩当做裹布,thang kā大海「包裹」起来,就ná亲像老母用布包 tú出世ê婴á仝款。并且对大海下一个命令,hō͘「海水」有「界限」,然后右设「门闩」,hō͘海水bē致使泛滥造成灾害。

第12到15节,chia上帝用「光」来表示伊奇妙ê创造能力。Á「日光」是上帝创造中siōng奇特ê,因为有「曙光照临大地」,chiah ē-tàng kā人siōng惊惶ê乌夜,mā就是hit-ê「隐藏」tī看bē-tio̍h ê所在ê邪恶势力hō͘「赶出来」。Mā因为有「日光」ê照耀,大地ná亲像「土上ê印记」。Chia ê「印戳」一词,表示「红色」,ná亲像炎热ê阳光照tī大地,hō͘一切看起来ná亲像被熨斗烫过ê衫裤仝款,笔直ê山岭kah山谷间ê鸿沟,有非常清楚ê分界。Mā因为「日时头ê亮光强烈」,án-ne就ē-tàng「hō͘邪恶ê人」退却,m̄敢koh再「为非作pháiⁿ」。这表示:只有邪恶ê人chiah会利用乌夜隐藏家己,免得恶质ê行为被发见。M̄-koh却无法度逃离上帝鉴察之眼。因为他是创造日光ê主,bē受tio̍h限制。

第16到18节,chit段是用「阴间」来形容上帝ê能力kah到深远ê阴间、深渊中。Chia提起「海ê深处」,指ê意思就是乌暗。Thang用「深渊」来代表。「深渊」mā teh代表魔鬼、撒旦藏身ê所在。上帝惩罚人siōng严厉ê方式,就是kā人关tī「深渊」中。被关tī「深渊」ê人,beh经过一千年chiah ē-tàng被暂时释放出来(参考启示录二十:1—4)。Á chia ê「阴间」,这是teh指死人去ê所在。M̄-koh上帝mā是「阴间」ê主宰。如果人无法度超越「阴间」,án-ne,koh怎样ē-tàng kah上帝比能力?怎样ē-tàng要求上帝kah伊对换位置,由约伯当控告者,上帝当被告neh(参考约伯记十三:22)?而第18节是一句讽刺ê句话,其实,无人知影chit-ê世界有jōa大。因为chia所讲ê「世界」,是包括地下脚ê「阴间」在内,而这是一种宗教性ê用语,表示人无法度用尺á是任何量器去衡量ê另外一个世界。

第19到21节,chit三节经文是用「光kah暗」来问约伯对chit两项知影jōa-chē?上帝问约伯「光tùi何处来」、「乌暗ê源头tī tó位」chit种问题,mā等于提出创造之初ê问题,kah第4节所提ê问题仝款。如果是发生tī创造之初,人iáu未出现ê时chūn,人就无法度解答chit种问题。若是无法度解答第19节ê问题,就koh khah无法度解释chit节所提ê「送tńg去原处」,因为m̄知光kah暗tùi tó位来,koh怎样ē-tàng kā它送tńg去?续落来上帝用真讽刺ê话讲约伯就亲像上帝ê年龄仝款久,看tio̍h上帝ê创造。当然这是无可能ê事。因为人ê性命ná亲像吐一口气而已,真紧to̍h会消失(参考诗篇九十:4、9)。

第22到30节,chit段经文主要以气候ê变化来说明上帝奇妙ê作为,这气候ê变换,包括雪、雹、阳光、东风、大雨、雷电、露珠、冰、霜等,chiah-ê即使tī科技chiah-nṳ̍h发达ê今á日,人iáu无法度事先掌握气象,只有ē-tàng跟tòe大气ê变化,等待气候恢复平静,人chiah ē-tàng继续行动。上帝问约伯有无看过收容雪ê「雪库」á是冰雹ê「雹仓」,而上帝用chiah-ê当做工具使用,用来惩罚悖逆ê子民。然后上帝提起「日头」kah「东风」,上帝问约伯是m̄是知影chit两项khǹg tī tó位?而「雷电」kah「大雨」二者有密切关系。河川是因为落雨切割地面而形成。上帝用「大雨挖掘水道」,chit种巧夺天工ê气力,已经大大超过人所ē-tàng想像会tio̍h ê范围。上帝mā tio̍h「落雨」tī无人khiā起ê所在,mā tī hit种地方thang看tio̍h真chē花草树木,滋养tio̍h野兽、爬虫,kah飞鸟。Chiah-ê lóng teh表示上帝ê仁慈,hō͘大地、万物kah人,一切受造物lóng ē-tàng享受他ê恩泽。 
Tī chit段经文中ê最后,上帝用雨水、露珠、冰、霜等来说明他创造ê奥秘,而chiah-ê lóng m̄是人ê手,á是能力所ē-tàng造出来ê。第28到29节,是对称ê两句诗歌,主要teh说明上帝创造ê奇妙。Chia用老父kah老母,以及生产,来表示上帝看chiah-ê ná亲像亲生ê仝款。因为有chiah-ê,人ê性命chiah ē-tàng保存,大地ê万物mā因为án-ne得tio̍h滋养性命ê粮食。连hō͘水结成冰,坚硬ná亲像石头,mā是上帝奇妙ê创造chiah成。
第31到33节,「昴星」,这是teh指南方ê星宿,表示温暖ê意思。Á「参星」,是teh指北方ê星宿,teh代表寒冷。「群星」,mā teh表示当「季节」替换ê时,就有无仝ê星辰teh引chhōa tio̍h气候变化,而chiah-ê lóng一定tio̍h听从上帝ê旨意,m̄是人teh控制。星辰ê运转有一定ê「定律」,所谓「定律」,指ê就是一定ê秩序,是上帝teh管理。

第34到38节,chia上帝诘问约伯,伊ē-tàng向「云彩」、「大雨」、「sìh-nà」下命令否?其实,人若m̄是创造者,受造物就bē听从。因为受造物只听从造物主ê命令,而万物ê创造主就是上帝。

续落来上帝提起空中ê飞鸟,他特别提起「朱鹭鸟」,chit种鸟koh称做「鹳鸟」,一种tī尼罗河流域不时出现ê鸟类,喜爱食蛇、爬虫类,因为án-ne被看做是「益鸟」。因为传说中,chit种鸟会发生哀鸣ê声音,向hiah-ê人预告尼罗河会泛滥。因为án-ne,埃及有人kā它当做神明敬拜。M̄-koh mā因为埃及人膜拜chit种鸟,tī摩西律法中禁止食用chit种鸟,mā m̄准用tī献祭,beh kā它当做无清气ê鸟类看待(参考利未记十一:19)。Á「雄鸡」,这是一种会报ê时ê鸡,古早人饲养chit种「雄鸡」当做ê时辰ê计ê时器,mā因为án-ne被称做有「智慧ê动物」。上帝问约伯,甚么人教chiah-ê鸟类有chiah-ê奇妙ê知识?伊是m̄是知影云彩有jōa-chē朵?á是甚么时chūn beh kā云彩装tio̍h ê雨水降落来,hō͘土成做淤泥「ân-ân黏结」做伙?而chiah-ê lóng只有上帝所掌管,m̄是人ê能力ē-tàng造成。

    第39到41节,tùi三十八章39节开始,一直到第三十九章30节止,lóng是用动物为例,表明连地上ê动物,kah空中ê飞鸟mā lóng thang做上帝ê见证者。Chiah-ê动物包括有:狮、乌鸦、野山羊、野鹿、野驴á、野牛、鸵鸟、马、la̍h-hio̍h、兀鹰等。

「狮」,这是圣经中描述siōng强壮、凶猛ê动物,无任何动物比得上它(参考箴言三十:30),甚至会用狮咆哮ê声音来比并上帝讲话ê声势,令听tio̍h ê人胆战心惊(参考阿摩司书三:8)。既然人惊惶狮,koh怎样ē-tàng养饲狮?m̄-koh上帝却真自然tek养饲所有野地上所有ê狮,包括小狮在内,上帝lóng hō͘ in lóng无欠缺(参考诗篇一○四:21—22)。约伯记ê作者想beh表达一个中心思想:上帝m̄是只照顾人类而已,他创造ê其他万物mā需要看顾、养饲。Á上帝赏赐hō͘人类ê siōng chē,hō͘人类ê手thang做真chē事,因为án-ne上帝kā他所创造ê世界交hō͘人类管理,m̄-koh人类显然并无尽责。Á「乌鸦」,属tī空中ê飞鸟之一。Ná亲像耶稣所讲「in不种m̄收,无仓无库,上帝尚且饲养in」(参考路加福音十二:24)。

以上chiah-ê lóng teh表明一个基本观念:人ê能力实在是真微薄、弱小。这只有koh再谦卑ê人ê身上chiah会明白。约伯若是知影谦卑,态度就bē亲像头前hit种à。

重新查询 专卷研经 约伯记系列
错误回报,请联系comm[@]fhl.net