约伯记 25章1节 到 25章6节   背景资料  上一笔  下一笔
Chit章ē-sái讲是约伯记中siōng简短ê一章,是比勒达回答约伯ê话。内容会chiah-ni̍h短,真可能是因为资料有遗失á是收集不完整。其实,若详细阅读chit章ê经文,会发见内容并无甚么新意。因为án-ne,有kóa学者认为可能是有kóa经文资料被编者删除了,因为在内文中有真chē重复ê字句。不过,chit种观点并无够额ê资料thang佐证。

请注意,chit章经文并无针对约伯tī头前所叙述过ê话提出辩论,却是讲述创造宇宙万物上帝ê伟大。这kah chìn前比勒达针对约伯ê话题提出强烈ê答辩,是真无仝款ê态度。这就呈现出一种奇怪ê现象:chiah-ê朋友kah约伯lóng是各讲各话,lóng无交集。

第1到2节,chia提起「上帝有大权力」,因为án-ne「万民tio̍h敬畏他」,这表示所有ê人lóng应该用真诚ê心回应上帝,bē-tàng有轻浮、随便ê态度。伊讲上帝hō͘「天顶ê国度和平」,chit句话mā teh说明:是上帝用他ê大能力,chiah hō͘ kui个混沌ê宇宙平息安定落来,因为人类bat想beh造塔kah上帝比高低(参考创世记十一:4),而且有强大ê君王想beh kah上帝互相比较量(参考以赛亚书十四:12—14)。Chiah-ê lóng是人类愚戆ê行为。

第3节,「甚么人ē-tàng数算事奉」上帝ê「天使」有jōa-chē?天使就是所讲ê「天军」(参考路加福音二:13—14),in是听从上帝命令指挥ê军团(参考约伯记十九:12)。天使所负责ê范围,m̄-nā tī天顶,mā包括人间,因为án-ne,世间无一个国家ê军队会比天使ê数目koh-khah-chē。Á天使ê出现往往就是用「光」作代表(参考马太福音廿八:3,路加福音廿四:4)。上帝ê天使是chē到thang照亮世间ê每一个角落。

第4到6节,chit三节kā人kah上帝相比,koh khah显示出人ê渺小kah有限。Tī chit三节中,比勒达一再表示对以利法观点ê支持,这mā同时是beh kā约伯讲,ài约伯khah听前辈ê话。

比勒达ài约伯记tiâu:所有ê人tī上帝面前,就m̄-thang chiah koh讲家己是无辜、无罪ê。因为上帝bē冤屈好人(参考约伯记八:3)。琐法tī chia是语带讽刺ê讲约伯竟然iáu自认是好人,无瑕疵(参考十一:4)。伊质问约伯甚么人ē-tàng讲家己「纯洁」、「正直」。伊用天顶ê星辰来譬喻,就算看起来是非常「皎洁」ê「月娘」、「星辰」,tī上帝眼中iáu是有阴暗ê一面。伊用chit种方式来对照人ê生存,意思是连星辰月娘lóng无够完美,koh khah何况是会死而且身躯会长「蛆虫」ê人(参考廿一:26),怎样ē-tàng tī上帝面前讲甚么家己ê伟大? 

重新查询 专卷研经 约伯记系列
错误回报,请联系comm[@]fhl.net