约伯记 24章1节 到 24章17节   背景资料  上一笔  下一笔
Chit章是继续第廿三章约伯teh回答提幔人以利法ê话。Chit章主题受tio̍h第廿三章17节ê影响,因为Tīhi̍t节经文中,约伯提起纵hō͘家己被「乌暗弄瞎」目睭,伊mā不惊惶,因为只有上帝是伊所惊惶ê。Tī伊看起来,无论是乌暗á是光明,lóng是上帝创造ê,因为án-ne,对上帝来讲并无所谓光明á是乌暗ê差别(参考诗篇一三九:12,启示录廿一:23)。

Chit章thang分做两个段落来看,第一段是第1到17节,chit段誓约伯继续回答以利法ê话。第二段是第18到25节,chit段经文是另外一个朋友琐法听约伯ê回应后,随时抢发言。

Tī chit段经文中,约伯讲述人犯罪ê具体行为,包括贪婪,欺压别人等恶质行踏。M̄-koh伊mā同时质疑地为甚么上帝会允准chiah-ê邪恶者做出hiah-ni̍h chē恶质ê事,却无hō͘ in严厉ê惩罚?然后约伯替贫困穷乏ê人hoah冤枉,伊认为in哀嚎ê声音,并无得tio̍h上帝ê垂怜。Á邪恶ê人却是嚣张跋扈,目中无人ê四界为非作pháiⁿ。

第1节,约伯ê连续质问伊看bē清楚到甚么时chūn上帝chiah会审判作恶ê人,因为只有án-ne chiah ē-tàng hō͘人看见上帝ê「正义来临」。

M̄-koh tio̍h注意ê是,圣经作者虽然提起「审判ê日期」,却从来m̄-bat说明hit日子甚么时chūn会来临,因为时间是掌握tī上帝手中,是由上帝决定,m̄是人ē-tàng过问,连耶稣mā bat án-ne kā他ê门徒讲无人知影到底是甚么时间,只有上帝知影(参考马可福音十三:32)。

第2到8节,Tī chit段经文中,约伯tī chia指出恶人ê行为,包括有「挪移地界」,这是摩西律法严厉禁止ê行为(参考申命记十九:14、廿七:17)。这kah贪图别人ê产业,想beh侵占别人ê土地仝款,当然mā是违背十诫ê第十诫。

第二种是恶质行踏,就是「夺行孤儿ê驴á」,以及「the̍h寡妇ê牛作抵押」,这mā是以利法对约伯ê指控(参考约伯记廿二:9)。M̄-koh约伯tī chia则强调只有邪恶ê人chiah会做得出来chit种事。换句话讲,约伯绝对bē做chit种事(参考约伯记三十一:16—17)。

第三种是拒绝hō͘「贫民享受应得ê权利」,这是teh指hō͘ sàn-chhiah人借钱免利息,以及到à安息年,thang除去奴隶ê身分(参考申命记十五:12—14)。Chia所谓「威胁sàn-chhiah人,hō͘ in逃走」,是teh指因为sàn-chhiah人无法度还所欠ê债务,债主想beh kā in卖掉,逼kahsàn-chhiah人只好想出所有ê办法逃离债主ê掌控。先知阿摩司bat kā伊谴责hit时代ê以色列人有chit种行为(参考阿摩司书二:6—7a)。

    第四种是逼kah sàn-chhiah人像流浪ê街友仝款,为tio̍h生存只好佳哉「荒野搜chhōe食物」度日,ná亲像「野驴á」仝款。

    第五种逼sàn-chhiah人「tī别人ê田里收割」,m̄-koh却是tī「邪恶人ê葡萄园摘取葡萄」,原因就是第2节提起ê,in ê田园已经被债主hō͘侵占了,á是被邪恶ê人用计夺行。换句话讲,in原本是田地ê主人,chit-má却因为sàn-chhiah变成乞丐á是受雇ê奴仆。相对ê,邪恶ê人却是兴旺ê,因为in ê葡萄园继续有收成,约伯用chit种方式提出疑问:为甚么邪恶ê人无受tio̍h惩罚?

第六种是sàn-chhiah人连夜间御寒ê外衫mā被夺取,致使in tī暗时teh困ê时一定tio̍h「thǹg-pak-theh」,真是凄惨。

第七种是连beh chhōe一个避雨ê所在,mā bē-tàng得,因为土地无了,当然koh-khah无可能拥有属tī家己ê厝。In只有ē-tàng四界流荡,寄居tī别人ê厝。雨季来临ê时,in mā只有ē-tàng bih-tī岩石洞穴中,求得暂时ê安居。

第9到12节,Tī chit段经文中,约伯继续为sàn-chhiah人呼喊,讲出in ê困境。包括有几个现象:

第一种是富人「the̍h sàn-chhiah人ê kiáⁿ抵偿债务」,hō͘ chiah-ê细汉ê gín-á ná亲像「孤儿」仝款,过悲惨ê生活。

第二种是富人对sàn-chhiah人ê苦境是无m̄是关心,致使sàn-chhiah人出门无衫裤thang遮蔽身子,iáu tio̍h「替人背禾捆」thàn点工资。In工作到非常辛苦,mā无法度歇困、食饭。

    第三种是sàn-chhiah人无歇困ê机会,因为in已经被抵押为邪恶者ê奴隶,即使替in「榨橄榄油」,in mā无法度得tio̍h橄榄渣thang食;为主人「踹葡萄制酒」,却得bē-tio̍h葡萄汁thang lim,以解工作流汗干渴ê需要。Án-ne看起来,邪恶ê人继续为非作pháiⁿ,却无得tio̍h应该有ê惩罚,而贫困ê人却一再受tio̍h欺负、虐待。

第四种是就算身躯已经受伤而痛苦「haiⁿ-haiⁿ叫」,甚至因为iau饿hō͘身躯接近「垂死」边缘,上帝kah-ná lóng听bē-tio̍h in ê呼求声音,á是上帝根本是听而不闻、「m̄-chhap」?

约伯用chit种方式提出抗议,想表达ê是:上帝怎样thang án-ne好款待邪恶ê人,而hō͘困苦sàn-chhiah ê人受tio̍h án-ne不公ê对待?约伯teh描述chiah-ê情景ê时,主要mā是teh说明一件事:为甚么上帝m̄听听chiah-ê sàn-chhiah人哀哭ê声音而随时伸手帮助in?为甚么上帝m̄听听hiah-ê作恶者tī奢华宴乐中ê欢笑声而hō͘ in严厉ê惩罚?伊以sàn-chhiah人ê景况反问上帝:为甚么不惩罚作恶ê人?却hō͘已经够困苦ê贫民继续过艰困ê生活?

第13到17节是teh描述邪恶者ê面貌。作者用四种身分来描述邪恶者,包括有:

第一种:拒绝光明者。Chit种人会拒绝光,是因为光会暴露in恶质ê行踏。圣经siōng ài用「光」来表示拯救。诗篇ê作者mā讲上帝ê话语、教示,就是性命ê「光」、「灯」(参考诗篇一一九:105)。相对tī光,就是乌暗。

    第二种是杀害穷困ê人,in ê手路看起来ná亲像「光明正大」,其实根本是「乌道」ê行踏。In杀害人ê手路,就是头前所讲ê,逼sàn-chhiah人「做到死」,无hō͘ in生存落去ê空间。然后继续贪婪(作贼ê意思)ê各种恶质行为。

第三种提起chiah-ê富有ê人,á是有权势ê人mā lóng陷入了淫乱ê网罗中,然后koh想出所有ê办法「遮tio̍h面孔,m̄ hō͘别人看见伊」,其实上帝看kah非常清楚。M̄-koh tio̍h注意ê事chia提起「奸夫」á是淫乱,mā是teh指去拜偶像ê意思,表示in心中无上帝ê话语。

第四种是in ê行为kah「盗贼」根本就无两样。In会强行「破门入室」到sàn-chhiah人厝里,搜刮了一切,然后「bih起来」,认为无人知影in所做ê。  

第17节是顶面所讲chiah-ê 可恶ê人共同ê特徵是认为in ê所做所为无人看见。M̄-koh in soah koh惊hō͘人发见,因为án-ne,in利用「乌夜」去做bē-tàng告人ê事。

其实chit种想法是愚戆ê想法。因为无论是乌暗á是光明tī上帝看起来都无差别(参考诗篇一三九:12)。

重新查询 专卷研经 约伯记系列
错误回报,请联系comm[@]fhl.net