约伯记 21章1节 到 21章34节   背景资料  上一笔  下一笔
Chit章是约伯第二回合最后ê答覆,对象kah-ná是针对琐法,其实lóng是对tio̍h伊ê chit三位朋友讲ê。过去chiah-ê朋友一再强调「善有善报、恶有恶报」,m̄-koh约伯非常不苟同chit种论调。伊一再质疑地为甚么上帝会hō͘邪恶ê人继续活teh?而且iáu hō͘邪恶ê人享受长寿、兴旺,甚至ē-tàng过含饴弄孙ê美满日子?

Tī chit章经文中,约伯提起邪恶ê人各种兴旺ê事证,tú好kah三位朋友过去一再强调ê,邪恶ê人会tú-tio̍h各种灾难之讲法,mā就是所讲ê「善有善报、恶有恶报」ê观念,成强烈ê对比。约伯tī chit章mā提出伊ê总结就是:tī chit世界上,「善有善报、恶有恶报」无一定是咱性命ê定律。Tùi这mā thang看出约伯ê用词m̄-nā无亲像过去所用ê强烈语句来回应,却是用深沉ê语调,并且以家己亲身ê体验kah所看tio̍h ê实例来回答。

第1到3节,约伯认为听伊倾诉,就是siōng好ê安慰。伊认为chiah-ê朋友就是讲siuⁿ chē无用ê话(「空话」,参考第34节),所以hō͘伊得bē-tio̍h任何安慰。因为án-ne,约伯讲伊对chiah-ê朋友唯一ê要求,就是请in好好á ê听伊ê倾诉。伊讲这mā是伊期待chiah-ê朋友ē-tàng hō͘ ê「惟一ê安慰」。

第4到6节,伊用「必朽ê人」chit-ê词来称呼伊ê chiah-ê朋友,意思mā是讲in并无比伊好jōa-chē,只不过是无tú-tio̍h kah伊仝款ê苦难罢à。伊ài chiah-ê朋友看māi伊所tú-tio̍h ê,m̄-nā kui身躯生疮,甚至丧失所有ê kiáⁿ kah所有ê财产,若是chiah-ê朋友若是有点á怜悯ê心,看tio̍h伊ê惨状,m̄-nā会「吓得哑口无言」,而且会「浑身战栗」。

第7到10节,tùi第7节开始,是约伯谈论到有关邪恶ê人ê景况。伊提出kah伊chiah-ê朋友所讲ê邪恶人ê景况大无相仝;伊ê朋友对邪恶ê人ê看法是非常典型传统观念:好人有好报、恶人有恶报。约伯却看tio̍h上帝hō͘邪恶ê人「享长寿、兴旺、发达」。因为án-ne,伊问上帝「为甚么」会án-ne做?续落来伊提起邪恶ê人所得tio̍h ê第二件福气,就是「儿孙满堂」,而且iáu因享长寿而看tio̍h「后一辈(孙á)ê成长」。M̄-nā án-ne,chiah-ê邪恶ê人iáu ē-tàng享受上帝本该hō͘好人ê福气,而且厝里ê「六畜兴旺」。古代社会畜牧业发达ê人,就是富翁、大财主。因为án-ne,Tī一般人ê观念中,所豢养ê家畜繁衍能力强,就表示有上帝祝福。Chit种看法tī诗篇中mā真普遍(参考诗篇一二七:3--5、一二八:3—4、一四四:12—14)。

第11到13节,chit三节lóng有一个共同焦点:邪恶ê人安享晚年,而且是长寿到ē-tàng看tio̍h 众kiáⁿ孙继续享受荣华富贵ê生活。包括in会「跳跃舞蹈」,跟tòe「吹笛ê声音欢呼」,而且「一生风平浪静」平安地老去。

第14到15节,chit两节真特别,约伯讲出邪恶人ê态度,就是tī in ê性命中,根本就是m̄是定有上帝ê存在,in lóng强调tio̍h óa靠家己chiah是正确ê。约伯会án-ne ê回答,其实mā是teh回应以利法tī第十五章4节对伊ê指责,以利法讲约伯无敬虔ê心,不祈祷。M̄-koh事实上约伯并m̄是án-ne,伊一直teh祈祷,伊甚至恳切地祈求上帝hō͘伊明白他ê旨意(参考约伯记十三:23)。伊bat有过非常悲壮ê告白,伊讲即使是落魄到一无所有,mā tio̍h坦荡荡地面见上帝,因为伊深信上帝对伊是一点mā不生份(参考十九:25—27),chit种态度tú好显示出伊kah邪恶人完全无仝。

第16节,chit节一直是圣经学者讨论ê经文。有两种看法:其一,认为chit节应该是整段经文ê结束,讲约伯并无因为邪恶人ê兴旺,心内有不平。因为伊坚持上帝会iáu伊公道(参考十九:25)。其二,无论邪恶人án怎,约伯认为伊kah in并无相仝。因为约伯从来m̄-bat夸耀过家己ê能力。伊一直深信上帝chiah是性命ê源头,这mā是为甚么伊无想beh kah chiah-ê朋友激辩,而beh直接向上帝抗辩ê原因(参考十三:3、15)。

第17到22节,Tī chit段经文内底,约伯提出一连串ê问题,包括伊讲邪恶人ê kan-taⁿ讲是jú来jú亮。M̄-nā án-ne,邪恶人ê性命mā非常顺利,无tú-tio̍h任何灾难。甚至tī暴风雨á是大水来临、所有物件lóng被卷行、冲行ê时,却常常看tio̍h邪恶ê人iáu-koh屹立不摇,并无亲像琐法tī第二十章28节所讲ê,恶人会tī上帝ê忿怒中被洪流般灾难冲行所有ê一切。伊mā指出chiah-ê朋友认为上帝会「为tio̍h老父ê过犯而惩罚kiáⁿ」,m̄-koh约伯认为上帝应该惩罚「罪人本身」chiah正确,伊chit种讲法mā是teh为家己ê kiáⁿtú-tio̍h之灾祸控诉。伊强调甚么人做邪恶ê事,甚么人就该受惩罚,án-ne,邪恶ê人chiah会体验出上帝忿怒ê惊人。若是由后代kiáⁿ孙承受上帝ê惩罚,则后代kiáⁿ孙iáu是无法度了解为甚么beh由in承受苦难。伊认为邪恶ê人是连家己ê kiáⁿ孙mā不关心。约伯beh hō͘伊chiah-ê朋友知影一件事:上帝ê旨意是深奥难测,无人ē-tàng明白。当伊ê chiah-ê朋友一再指责伊,讲伊ê灾难是因为伊犯罪所带来ê惩罚ê时,tú好是错误ê。因为只有上帝chiah是真正审判者。无人thang取代上帝去审判别人ê罪。

第23到26节,Tī chit段经文中,约伯是用相对语句来行形容两种无仝ê人生境遇,mā就是所讲ê「好人」kah「pháiⁿ人」之间ê无仝。约伯强调chit两种人tī活teh ê时chūn,并无因为「善kah恶」ê差别,而tī死后有所差别,因为结局lóng仝款ê。Án-ne,对真正好人来讲并无公平。就是因为结果分bē出好kah pháiⁿ,所以chiah会hō͘ pháiⁿ人嚣张,为非作pháiⁿ ê人mā不惊惶上帝ê审判。

第24节ê「腰部满有气力」,是teh指工作能力,表示一个人ê才tiāu。另外一种翻译是:「腰部充满脂肪」,意思是teh指富有、事业兴旺,kah第23节ê「健壮」仝款。第25节是teh指另外一种所讲ê善人,mā就是遵照上帝ê旨意、教示去行ê人。Chit种好人却受尽折磨,一生lóng是Tī痛苦中过活。约伯koh一pái提出chit种问题:为甚么顶面所讲两种人所得ê结果lóng仝款?若是án-ne,为甚么tio̍h遵行上帝ê教示去行?

第27到31节,Tī chit段经文中,约伯使用真chē质疑地ê问句反驳chiah-ê众朋友ê观点。伊强调邪恶ê人ē-tàng继续生存落去,就是因为in活teh ê时chūn,无人敢当面指控in所犯ê错误,á是惩罚in所犯ê罪过,chiah会造成chit种结果。因为án-ne,如果m̄敢tī邪恶人iáu活teh ê时chūn揭发in ê恶行,却一再对因善良而被欺压ê人讲一kóa不切实际ê话,he是真荒谬ê事。约伯认为伊ê chiah-ê朋友有pháiⁿ ê「念头」,chiah会án-ne故意伤害伊。当伊ê chiah-ê朋友ài伊chē听听祖先贤慧ê教示ê时(参考十五:18)。约伯tī chia反问in,为甚么chiah-ê先贤所讲ê pháiⁿ人并无得tio̍h应该有ê恶报,因为in并无tú-tio̍h甚么大灾难,而且lóng ē-tàng逃脱上帝ê审判。伊问「有甚么人当面指责hit-ê邪恶ê人」?这是一句真严肃ê指控,说明人对恶者保持沉默kah袖手旁观ê态度,hō͘世界变成是非不明。

第32到33节,约伯认为这是一种是非不明ê时代siōng典型ê写照。大家kan-taⁿ会对得势ê人谄媚、颂赞,却对伊压迫别人ê行为默不作声。Chiah-ê真正作恶ê人连出殡lóng真风光,连坟墓lóng有「守卫周密」看守,因为埋葬ê墓穴里有贵重ê陪葬物,甚至连土地lóng会对伊ê尸体献殷勤。约伯chit种讲法其实mā是一种控诉,伊因为不满邪恶人被放纵继续作恶(参考第31节),致使是非不明,tùi án-ne hō͘真chē人掠做是hit种chiah是正确,也kah着有样学样。

第34节,是约伯ê结论:伊讲chiah-ê朋友根本就m̄知真实ê情况。因为án-ne,in所讲ê话m̄-nā无安慰伊,反tńg是对伊带来koh-khah chē ê伤害罢à。

重新查询 专卷研经 约伯记系列
错误回报,请联系comm[@]fhl.net