约伯记 16章1节 到 16章22节   背景资料  上一笔  下一笔
第十六到十七章,是约伯回答以利法ê话。约伯原本对chit位长辈iáu真细jī,ē-sái讲是当伊听tio̍h以利法用真严厉ê话指责伊ê时,伊mā用真无客气ê话回应伊。Mā因为án-ne,tī chit章经文中,约伯一再要求上帝hō͘伊清楚到底是犯甚么罪,chiah受tio̍h hiah-ni̍h大ê灾难(参考十三:23)。Án-ne,伊mā thang hō͘ chiah-ê朋友知影in lóng m̄-tio̍h去,lóng误会了伊。

    第1到3节,约伯tī chia讲伊ê chiah-ê朋友「安慰」ê话,伊已经听够chē ā,m̄-koh并无带hō͘伊「安慰」,反tńg是「带来愁烦」。Chia ê「安慰」一词,有含鄙视(siùⁿ)ê意思,因为he是谴责m̄是鼓励。约伯认为如果in真正是teh传达上帝ê话语,he必定ē-tàng安慰人ê心灵。因为án-ne,约伯讲in ê话乃是「不休不止」ê「废话」,伊希望chiah-ê无用ê话ē-tàng赶teh-beh结束。

    第4到5节,约伯提醒以利法如果kā角色hō͘换,设身处地为对方设想,必定会有无仝ê看法。其实约伯m̄-nā对以利法án-ne讲,伊mā bat要求上帝kah伊hō͘换角色(参考九:32、十三:22),án-ne上帝就thang了解tú-teh受苦者ê心境。换句话讲,伊是teh讲chiah-ê朋友根本就bē明白伊ê苦难,chiah会乱讲话。约伯甚至表示伊会比in chit三位朋友iáu koh khah有智慧,知影怎样用「好听ê话鼓励」正tī苦难中ê人。

    第6到8节,Tī chit段经文中,thang看出约伯是陷入tī极大ê痛苦中,chit种痛苦m̄是在tī肉体ê层面,却是tī kui个性命ê境遇,hō͘伊感受tio̍h m̄知应该án怎去解释。主要原因是伊ê朋友根本听bē落去约伯所讲ê话。Hō͘伊想beh用沉默来回应mā bē-sái,hō͘伊有讲mā m̄是,不讲mā m̄是ê苦境。若无讲话,别人会认为伊默认了家己犯ê罪;m̄-koh若是讲了,别人koh认为伊是teh狡辩,kan-taⁿ想beh隐藏所犯ê过错。约伯想beh来,既然án-ne,若beh对朋友讲话诉苦反被指责,不如直接向上帝抗议来得好。伊开始直接讲出上帝hō͘伊「家破人亡」,chit句话讲出第一章13到19节所发生ê家庭惨剧。续落来hō͘伊痛苦到「只chhun皮包骨」,chit句话thang参考第二章8节,表示灾难严重到连伊ê性命lóng会结束。约伯认为就是因为chit种惨重,所以伊ê亲朋好友mā因为án-ne认为伊是罪有应得,而bē认真思考伊是m̄是真正有罪。

第9到14节,chit段经文是约伯teh控诉上帝对伊ê「报复」,并m̄是因为伊有甚么罪,伊认为是上帝故意惩罚伊(参考九:17、20、十:13)。Tī chit段经文中,约伯用了真chē攻击性ê词句,包括拆裂、咬牙切齿、怒目、嘲弄、phah巴掌、围攻、交hō͘ pháiⁿ人、弃sak、折磨、扼咙喉、摔碎、当箭靶、射击、射中要害、肝胆倾流地上、击伤、践踏等等,伊用chiah-ê动词teh控诉上帝对伊ê惩罚非常严厉,差不多hō͘伊lóng无生存机会。Ná亲像第十章16节,伊描述上帝ná亲像teh追捕狮一般ê凶悍、无情,ná亲像猎人发见tio̍h猎物一般,非掠tio̍h绝对bē罢休。。

    约伯ê chit种描述kah以利法teh指责约伯ê态度,tú好呈现出类似ê讲法;以利法认为「pháiⁿ人」是无所m̄免其极ê攻击上帝(参考十五:25—26)。chit-má约伯则认为上帝对付伊,就是kā伊当做罪大恶极ê犯人仝款,用尽各式各种ê惩罚。

    第15到17节,chit三节ē-sái讲是对前述苦难ê结语。约伯表示伊chit-má是正tī极大ê苦难中,是「悲伤」到需要「teh moa麻布衫裤」表示心中ê哀恸,m̄-nā án-ne,伊iáu「坐tī尘埃中」表示忏悔,chiah-ê方式lóng是teh表示极大ê哀伤(参考约伯记二:12,创世记三十七:34,约拿书三:6)。Mā因为受tio̍h极大ê苦难,约伯讲家己已经哭到目睭红肿,而且因为无法度困而hō͘「目睭隆起,眼皮暗乌」,ná亲像一个人长期严重失眠,而出现乌眼kho͘-á仝款。M̄-koh即使án-ne,约伯犹原坚信家己并无犯严重ê罪,因为án-ne,伊犹原相信上帝会垂听伊ê祈祷。伊讲家己ê祈祷乃是「出tī到诚」,chit句话表明约伯从来无任何欺骗ê心思,而且对上帝一直心存敬畏ê态度。

第18到22节,这是约伯表明心迹ê方式,伊认为朋友lóng指责伊有罪,而伊ê辩解koh得bē-tio̍h in ê认同,甚至iáu加重了伊ê罪恶,hō͘伊感受tio̍h孤独、无助,并深感痛苦。因为án-ne,伊决定beh转向「大地」投诉。这mā是古代人ê看法,认为当人死去了后,埋葬tī大地里,表示归还土粉。Án-ne,所有ê一切lóng会恬恬无声。约伯用chit种观念呼喊大地为伊做证,不beh hō͘伊ê冤情被埋葬在地下脚。因为大地siōng清楚伊并无杀害过任何人,若无,土地顶面所流ê血必定会出声控诉伊ê残暴。另外一方面,伊mā用chit种方式ài土地为伊hit十个死去ê gín-á冤屈做证。

另外一方面,伊相信tī天顶必定有人thang替伊做证,会替伊伸冤。M̄-koh真有意思ê是,tī约伯记第十七章3节却记载,约伯呼喊上帝为伊作保证人。伊虽然一再控诉是上帝故意折磨伊,m̄-koh伊iáu是相信上帝最后必定会iáu伊ê清白(参考约伯记十九:25)。原本地上ê朋友是siōng好ê见证者,m̄-koh约伯控诉chiah-ê朋友m̄-nā无帮助伊,iáu责备伊,hō͘伊ê痛苦加重(参考十二:4—5)。伊期待有真正正义ê人出来为伊伸冤。这表示伊已经对chiah-ê朋友彻底失望了,只有ē-tàng直接向上帝哭诉。最后伊感叹家己性命所chhun ê日子无chē,若是无随时得tio̍h伸冤,会无机会,因为性命一去bē koh tńg来(参考七:9—10、十:21)。

重新查询 专卷研经 约伯记系列
错误回报,请联系comm[@]fhl.net