约伯记 14章1节 到 14章22节   背景资料  上一笔  下一笔
Ná亲像头前已经提起过ê,约伯记tùi第十二章开始,到第十四章为止,这三章lóng是约伯回答拿玛人琐法ê话,是第一回合ê对话。约伯除了针对朋友所讲ê来答覆之外,约伯mā同时kā家己对上帝ê信心kah遭遇苦难ê心路历程铺陈出来,这thang帮助读者明白伊ê心境。

第十四章是约伯继续向上帝陈述伊对性命ê看法,ná亲像chìn前约伯一再强调过ê,性命既然án-ne短促,为甚么iáu koh khah承受hiah-ni̍h chē痛苦?Tùi chit章ê经文mā反应出类似第十三章15节a句ê态度:「我已经无希望,即使上帝刣我koh怎样?」chit种心态mā真亲像第七章1到2节所提出ê性命观,是真消极ê态度。Ē-sái讲是约伯记siōng珍贵ê所在,是tī第十三章15节b句所讲ê,即使tī siōng绝望ê时刻,mā无放弃希望,一定会争取到最后ê做一困为止。绝无放弃,这是约伯记kui本经册ê中心思想。

第1到6节,chit段经文中thang看出约伯对性命采取悲观ê态度。Chit种态度tī传道书中不时出现,tī诗篇中mā thang看会tio̍h(参考诗篇三十九:5—6)。约伯用「软弱」、「目nih-á」、「患难」等词字,描述人性命ê有限,mā说明性命苦难ê景况。然后伊koh用「花草」、「影儿」来描述性命ê目nih-á、无影迹。Chiah-ê tī第七章6节、第九章25到26节mā有类似ê描述。虽然性命是án-ne,m̄-koh性命ê长短iáu是由上帝teh决定,是tī上帝ê掌握中,无人ē-tàng脱离上帝ê管辖。约伯想beh表达一个观念:上帝真正会看顾性命án-ne目nih-á ê人类mah?伊用「肯看我一眼」来说明人ê卑微,实在是渺小到极点。约伯想beh讲ê是:既然人ê性命hit种目nih-á、痛苦,ná亲像花草般卑贱,上帝为甚么iáu koh khah án-ne细腻地监视tio̍h人类?án-ne亲密ê监视,等于是teh搅扰人平静ê生活。Á tī约伯记第七章17到19节,认为上帝m̄-nā kā伊看kah真ân,甚至是连伊想beh咽下一嘴唾沫,mā lóng hō͘ 上帝注目tio̍h。伊祈求上帝siōng好m̄-thang án-ne,因为人ná亲像一个受雇ê工人,负担ê工作已经hō͘伊真辛苦了,人每工工作mā只是为tio̍h beh生存落去。

第7到9节,tī chit三节经文中thang清楚看出约伯认为人ê性命比树iáu koh khah无用;树虽被phut落来,即使树根已经衰老,甚至腐烂,只要有水就iáu会有生机,m̄-koh人却m̄是án-ne,人只要一死就结束loh。注意第7节ê「被锉落来」chit-ê词,表示这并m̄是家己ê因素,却是被外在ê气力摧毁。整段看起来有一种特殊涵意:人phut树为tio̍h是beh hō͘树再生出新ê枝来。M̄-koh人若hō͘ 上帝「刣死」,ē-tàng koh再koh活重生mah?

第10节,chit节讲tio̍h人性命ê状况反tńg kah第7到9节呈现颠倒ê现象;约伯tī chit节讲出人ê性命远不如朽木,只要一死就一去无koh tńg去。Chit种对性命ê看法,显然比先知以赛亚ê看法iáu koh khah koh khah悲观,因先知以赛亚讲「人kah花草无两样」(参考以赛亚书四十:7)。约伯则认为人远比朽烂ê木头iáu不如。

第11到12节,江河lóng需要水,chiah ē-tàng表现出它存在ê意义kah价值,若无,即使koh再大ê河道,无水mā无价值。约伯用chit种方式teh譬喻一个人若是死,一切就无意义à。约伯想beh表达ê一个期待—人ê性命如果án-ne脆弱kah卑微,为甚么上帝iáu koh khah追究人ê罪,hō͘人ê性命承受án-ne深重ê苦难?性命若是亲像「一片落叶」á是亲像一条枯干ê「麦hiūⁿ」,iáu需要上帝用chit种方式追问查究mah?

    第13到14节,其实,约伯期待上帝m̄是真正消灭了伊,却是kā伊「藏tī阴间」,这表示伊ê性命并无消失,只是hō͘「藏」了起来而已。原因是chit-má上帝正teh生气,伊相信只要上帝ê受气一过,就会koh再想tio̍h伊,甚至会欢喜伊(参考第15节)。Tī第14节提起真关键性ê字,就是「koh活」ê问题。Mā tùi chia thang看tio̍h「koh活」chit种观念,并m̄是直到耶稣基督ê时代chiah有ê,却是原本旧约ê时代就已经存在,而且深植tī犹太人ê文化中(参考以赛亚书廿六:19,但以理书十二:2—3)。

第15到17节,约伯对上帝有绝对ê信心,伊表示上帝会欢喜伊,mā会「呼唤」伊ê名,伊会kah上帝对话,这表示伊kah上帝之间有密切ê来往。Tī第16节chia thang看tio̍h约伯有改变看法;以前伊认为上帝观察伊ê脚步,对伊监视ê非常严密(参考七:18—19),甚至连脚印lóng查验过(参考十三:27)。M̄-koh chit-má约伯相信上帝虽然仝款严密观察伊ê脚步,ē-sái讲是并m̄是为tio̍h beh追究伊ê罪á是错误,而是beh照顾伊,扶持伊。因为án-ne,约伯对性命有一个期待,就是期待上帝赦免、怜悯伊,ē-tàng hō͘伊ê罪完全消除。Tī以色列人ê观念中,罪就是带来苦难ê主要因素,赦免所犯ê过失,mā等于是赦免所有ê chiah-ê罪过仝款。约伯相信只要上帝ê受气一过,chiah-ê lóng会清楚明白,而且上帝会知影伊ê无辜,而hō͘所有发生tī伊身上ê苦难lóng消除掉。

    第18到22节,chit段诗歌koh一pái tńg来到12节以前ê阴沉状况,对性命无koh存有任何ǹg望。Mā可能约伯是teh期待伊ê苦难随时因为伊ê ǹg望来临而消失,m̄-koh事实上并无án-ne,而hō͘伊感觉非常失望。Chit段话mā是约伯回答伊ê三个朋友ê结论。

    Tī第19节,伊讲即使坚硬如石头,mā会因为「水」ê冲刷而消失。譬喻人即使有非常坚定ê信心,mā会因为上帝ê冷漠、不回应,甚至不理睬而失去信心。约伯提起人是非常软弱ê,这tùi对照第18 kah 19节就thang看出,如果山川大地lóng会因为上帝ê「惩罚」而走样,koh khah何况是用土粉造出来ê人,必定会因为án-ne而面目全非而且无法度修复。Á设若人因为苦难而痛苦到极点ê时,就算伊ê kiáⁿ孙有jōa大ê成就,á是做出jōa-ni̍h-á见笑ê事,mā lóng bē有感觉à。约伯认为对饱受苦难ê人来讲,chit种期待mā是属tī空虚、不实在ê。因为性命是目nih-á ê,即使kiáⁿ孙真正有成就,对tī iáu tī苦难中ê人,mā无意义。因为这并bē-tàng安慰伊,因为伊身上犹原痛苦。约伯án-ne讲,是teh表明一个性命体验—苦难,hō͘人感觉性命ê意义尽失。

重新查询 专卷研经 约伯记系列
错误回报,请联系comm[@]fhl.net