约伯记 13章1节 到 13章28节   背景资料  上一笔  下一笔
第十三章tùi第1节开始直到第18节止,chit段经文是约伯继续teh回应拿玛人琐法所讲ê话。然后tùi第十三章19节起,一直到第十四章22节,是约伯对上帝ê恳求。

第1到2节,chit两节真清楚,约伯teh回应伊ê chiah-ê朋友讲伊m̄知向有智慧ê老人á是先贤请益,m̄-koh约伯表示in所讲ê chiah-ê自认为有智慧ê话,伊lóng知影,其实伊ê意思是伊比in lóng khah聪明,对上帝ê认bat koh khah深切。

第3到5节,第3节开始,约伯就讲「beh向全能者理论」,chit句话ē-sái讲是kui本约伯记ê中心思想。作者beh说明一个观念:人thang kah约伯仝款,直接kah上帝争论性命所tú-tio̍h ê苦境。「理论」一词有含诉讼双方tī法庭中进行「辩论」ê意思。原本约伯是「m̄敢kah上帝辩论」(参考九:14、19),后来伊开始有无仝ê想法,认为siōng好ê方式就是直接向上帝陈述家己ê状况,因为上帝就是「法官」,án-ne,m̄-nā thang向他陈述案情,iáu thang kah他辩论,并且约伯深信家己会得tio̍h无罪ê宣判(参考第18节)。Koh讲,tī约伯ê看法里,伊ê chiah-ê朋友若是静默不语,反tńg会是比较聪明ê作法,因为án-ne chiah bē显露出in ê「无知」、「愚笨」。因为án-ne伊强调,chiah-ê朋友若是无讲话,有可能iáu thang隐藏家己ê愚笨。

第6到8节,虽然tī第7节约伯提起「讲白贼」、「假话」,这并m̄是讲伊ê三位朋友讲话不诚实,其实,伊ê三个朋友讲话lóng真诚实,只是in对上帝ê认bat并无正确。约伯认为伊对伊所讲ê,ná亲像teh「想替上帝辩护」,伊讲人无论怎样用心想替上帝「辩护」,lóng是真愚戆ê作法kah念头,因为上帝根本就无需要任何人替他ê神圣辩护,mā无需要咱用任何方式为他证明真正存在á无,koh-khah无需要咱用奉献来满足他ê需要,因为上帝本身就是万有ê上帝。

第9到11节,Tī chit段经文中,约伯真清楚提出伊ê看法:如果上帝ē-tàng chhōe-tio̍h伊ê错误,伊ê chiah-ê朋友mā bē比伊好jōa-chē。上帝是观察细微ê,就算人tī暗中做偏袒ê事,上帝mā会清楚知影。每一个人面对上帝ê审判,lóng tio̍h感觉「惊惶失措」、「惊惶」。

第12节,chit节ē-sái讲是约伯对伊chit三位朋友siōng尖酸刻薄ê一句话,约伯讲in所讲ê话ná亲像一堆无用ê土粉。

第13到18节,约伯Tī chit段经文中真清楚表示,伊无希望koh再继续听伊chiah-ê朋友讲落去。因为无用ê话,一句lóng嫌siuⁿ chē。伊tio̍h用真大ê勇气直接向上帝申诉,伊ài chiah-ê朋友安静听伊向上帝申诉,án-ne,in就会明白伊为甚么听bē落去in劝勉ê话。坚持申诉到底,这是约伯目前ê态度。伊宁可因为发出抗辩ê声音有性命危险,mā无愿意因为惊死而默不作声。第15节chia伊讲「即使上帝刣我koh怎样」,chit句话表明伊hit种kā命「豁出去」ê决定。伊án-ne讲ê用意是teh表示家己真正是受tio̍h冤屈,只希望上帝会愿意接受伊ê陈述、辩白。伊深信公义ê上帝绝对bē冤屈正直无罪ê人,公义ê上帝bē hō͘无罪ê人承担有罪ê人所应该受ê惩罚。约伯讲伊「已准备好势beh提出ê抗辩」,beh向上帝陈述ê内容真有自信,相信必定会得tio̍h上帝ê接受,改判伊「无罪」,意思是停止伊ê苦难。

第19到23节,tùi第19节起到第十四章22节,chit段经文lóng是约伯转向上帝陈述家己ê境遇,并且期待上帝ē-tàng kah伊直接对话。

Tùi第19节ē-tàng看出约伯坚决ê心。伊深信家己无犯错误,如成(chiâⁿ)实ē-tàng查出伊有任何犯罪行为,伊甘愿接受惩罚来死。然后tī第20到21节约伯向上帝祈求两件事:一是m̄-thang koh再「惩罚」、「恐吓」伊(21节);二是hō͘伊thang直接kah上帝对话,án-ne伊就ē-tàng「答辩」(á是「辩论」,22节)。然后约伯期待kah上帝「辩论」,像tī法庭中ê检察官kah被告辩论仝款(参考九:32)。Chit-ê意思真清楚,就是祈求上帝tī无听tio̍h伊诉愿chìn前,m̄-thang打击伊,tio̍h等到听完伊陈述了后,判定伊有罪,chiah来惩罚伊。约伯会án-ne提出要求,其主要目的就是希望上帝hō͘伊知影,伊到底是犯甚么罪(参考十:2)?Chit点是kui本约伯记ê主要中心诉求。

第24到25节,连续对上帝发出四个问题:一是上帝为甚么避无看tio̍h面?二是为甚么上帝kā伊当做敌人看待?三是上帝为甚么beh恐吓伊?四是上帝为甚么beh tui-jiok伊?约伯表示人ê性命是非常脆弱ê,ná亲像「落叶」kah「枯干ê麦hiūⁿ」无实质性命ê物件仝款,跟tòe风四界飘动,án-ne脆弱ê物,怎堪上帝用「恐吓」kah「tui-jiok」án-ne严重ê惩罚来对待?

第26到28节,约伯充分说明家己性命ê无奈kah软弱。伊期待上帝m̄-thang tùi伊年轻无知ê时代开始清算伊所犯ê罪过。因为hit种kan-taⁿ会hō͘伊感觉家己ná亲像一块已经朽烂ê木头,á是亲像一件虫蛀过ê衫裤,一无是处。

重新查询 专卷研经 约伯记系列
错误回报,请联系comm[@]fhl.net