Chit章是来探访约伯ê第三位朋友拿玛人琐法ê发言，内容kah提幔人以利法、书亚人比勒达等等ê观点仝款，lóng是认为约伯犯错得罪上帝，chiah致使受难。Chit三位朋友lóng认为：人受难必定是kah犯罪有关，因为án-ne，独独悔改chiah ē-tàng得tio̍h上帝ê赦免，减轻罪所带来ê惩罚。

Tùi约伯和chit三位朋友ê对话中，mā thang想tio̍h另外一个真重要ê议题：就是受苦ê人，心中是m̄是有上帝？如果答案是肯定ê，án-ne受苦ê人怎样表达伊对上帝ê疼？伊ài如何描述伊心中ê上帝？而且tī人类历史kah社会现象中，不时会看tio̍h：受苦ê人，in对上帝ê敬虔远比一般人来得koh khah深、koh khah真实。

第1到2节，琐法一发言，就指责约伯所讲ê话是荒腔行板，甚至认为约伯ê话siuⁿ chē，听不进朋友ê劝勉。琐法认为m̄是「话讲chē了就证明一个人有理」。

第3到4节，chit两节真清楚讲出琐法对约伯确实真不满，伊认为约伯tī态度上是无正确ê。伊讲约伯ê话听起来明明是就是「胡讲八道」，伊认为：就算过去约伯真正无错，m̄-koh chit-má单单tùi伊kah前两位朋友ê对话中，就ē-tàng知影约伯已经是语无伦次。伊提醒约伯m̄-thang自认为有「道理」，mā m̄-thang认为家己「tī上帝面前干清气净」。其实，约伯未bat讲过家己tī上帝面前「干清气净」，伊甚至iáu bat讲过，ài上帝宽赦伊ê过犯（参考七：21）。伊一直认为上帝对伊siuⁿ过苛求，hō͘伊连吞咽嘴澜ê机会mā无（参考七：18—20）。意思是teh指上帝kā伊当做「完人」一般要求伊，无容允伊有一丝á轻松落来，这是约伯siōng受不了ê所在。

第5到6节，tī chia琐法提出两项「愿望」，一是由上帝亲自回答约伯ê话语。琐法祈愿上帝直接向约伯讲话，mā teh表明in三位朋友已经无法度改变约伯，hō͘伊明白家己是一个罪人，所受ê苦难乃是罪有应得。除了上帝之外，亲朋好友无任何方法thang改变伊。二是琐法是希望上帝「开嘴驳斥」约伯所讲ê话。琐法认为只有上帝公开谴责约伯，chiah ē-tàng hō͘约伯哑口无言。后来确实是因为上帝亲自开嘴讲话，chiah hō͘约伯对家己过去所讲ê感觉见笑，并且坐tī土粉kah炉灰中忏悔（参考四十二：6）。Koh讲，琐法是希望上帝指示约伯，免得约伯继续án-ne自认为是。其实，tī琐法ê认知中，认为约伯ê言词kah亵渎上帝无差别。因为án-ne，伊应该受koh khah大ê痛苦chiah-tio̍h。

    第7到10节，Tī chit段经文中，琐法连续质疑地约伯对上帝ê认知到底有jōa-chē？而tùi约伯记第三十八到四十一章，上帝回答约伯所讲ê话中，约伯承认家己对chiah-ê受造物ê认知确实真少。其实，何止约伯对上帝ê认bat真少，所有ê人对上帝ê认知lóng只有一小丁点而已。M̄-koh当琐法teh歌颂上帝创造ê伟大ê时，伊是用chit种方式同时teh突显约伯ê渺小kah无知。

这mā是一般人不时发出ê疑问：怎样明白上帝ê旨意？基本上，tī基督教信仰内面，受造物是无法度明白造物主ê旨意。当圣经讲人是上帝用「地上ê土粉」（参考创世记二：7）造物ê时，已经teh说明人是tī上帝ê旨意kah计画之下被创造出来。因为án-ne，除非是上帝亲自启示，若无，就无任何一个人ē-tàng明白上帝创造ê计画，á是他ê旨意。因为án-ne，讲上帝伟大便是teh凸显人ê渺小。看hit-ê无边ê天际，而人只不过是这天际中ê微小一粒，如仝一个粒细沙hit种渺小而已；地kah海洋lóng是万物共生之地，而人只是万物中ê其一，比起这广大无比ê大地kah海洋，人koh算是甚么？琐法用「天」、「阴间」、「地」，kah「海洋」表示地ê四个「极点」，已经远远超出人ê能力范围，就算有siōng好ê工具mā无法度测量世界ê高、深、长、宽等。M̄-koh，上帝却ē-tàng命令海水分开，mā ē-tàng hō͘天开窗落雨，hō͘大地裂开，hō͘邪恶ê气力被关tī阴间、深渊ê所在，而人则对chiah-ê lóng无所知。Án-ne，人有甚么能力thang阻止上帝ê行动？根本无可能！

    第11到12节，上帝是一个细察人心ê上帝，因为án-ne，他「清楚」每件事经过实况，koh khah清楚所有受造者ê心内意念，虚假ê人，一定瞒不过上帝ê眼目。第12节比较特别，因为经文内容kah-ná kah头前ê经文连结bē起来，真可能保存原文ê过程中有遗漏。Chia琐法举「野驴á」为例，这指广大旷野中流荡ê驴á，无受拘束，真oh驯服。琐法用野驴á譬喻讲约伯ná亲像野驴á仝款，无知到极点，根本就是真oh沟通，ná亲像一个愚笨ê人，就算是对伊一再解释说明，伊iáu是m̄-bat。意思指约伯明明是无药thang救à。

    第13到15节，琐法劝约伯tio̍h「存心正直」，意思是teh指ài伊双手洁净、心灵谦卑，án-ne chiah ē-tàng chhōe-tio̍h上帝，而hō͘性命得tio̍h存活ê机会。第14节mā是真重要ê一节，因为chit节指出一个人即使是tī外面犯罪，chiah-ê罪所带来ê污秽，mā会污染伊所khiā起ê厝kah全家。相对ê，做一个人洁净了后，伊kah伊ê全家mā会同时受益（参考使徒行传十一：14、十六：31）。上帝ê恩典是tùi一个人而恩泽到全家。琐法讲chit种人chiah ē-tàng lóng无愧疚地面对上帝。其实，tī约伯ê观点里，每一个人面对上帝ê时，lóng会感觉亏疚，因为上帝是chiah-ni̍h圣洁，而人却是污秽、不洁。

    第16到20节，琐法认为约伯若是知影走chhōe上帝，则伊所有tú-tio̍h ê「祸患」，mā就是伊chit-má所tú-tio̍h ê苦难，lóng会因为为伊悔改而得tio̍h上帝怜悯，并且得tio̍h上帝koh-khah chē ê祝福，chiah-ê祝福会遮盖所有一切ê苦难。性命mā会因为án-ne ná亲像晨曦一般发出亮光，甚至mā会亲像「透中昼」ê阳光，hō͘乌暗消失。因为chhōe上帝ê人，必定会得tio̍h上帝ê庇护，ē-tàng安然入眠。M̄免担心敌人会来偷袭。因为知影走chhōe上帝ê人，上帝就会成做伊siōng好ê保护者。Tī琐法ê观点里，约伯如成（chiâⁿ）实悔改走chhōe上帝，上帝一定会恢复伊以往ê兴旺，甚至比以前koh-khah chē。若无，只有ē-tàng亲像邪恶ê人仝款，只有等待死亡ê来临，bē有性命ê ǹg望。