Chit章tùi第4节开始，直到第十章止，chit段经文中间，除了第九章11节、第12到15节、第24到25节等等为散文外，其余经文差不多全部lóng是用诗体写出来，可惜，《现代中文译本》tī编辑上并无亲像中文《和合本》仝款，用诗体ê方式编辑出来。Tī chit段经文中，siōng主要讲述两个主题：一是犹大人民心硬、固执，听bē落去上帝透过奴仆先知ê话。二是tī国难当头ê时，犹大人民iáu是m̄知悔改认罪，继续沉沦tī罪恶中，tùi án-ne带来koh khah悲惨ê结局。换句话讲，Tī chit段诗体ê经文中，先知耶利米传出上帝ê信息表示：上帝已经对犹大人民失望至极，无koh对in存有任何期待，理由只有一个：犹大人民拒绝认罪、悔改。

最后第18到22节是一段是先知耶利米为耶路撒冷悲伤所唱ê诗歌，主要原因是伊ê犹大同胞已经被掠到巴比伦做奴隶，过苦难ê日子发出哀嚎ê声音。先知耶利米听tio̍h伊同胞tī受掠之地受到à极大ê侮辱，并且经历惨痛ê生活境遇而发出哀嚎ê声音。伊kā这哀嚎ê声音kā上帝讲。

第1到3节，chia提起「犹大诸王、官长、祭司、先知」等，chiah-ê犹大国ê领导阶层，就算in往生安葬了，mā bē得tio̍h安宁，因为敌人会kā in ê「骨骸lóng tùi坟墓内挖出来」。这有两种可能原因，一是chiah-ê人死去ê时，lóng有丰厚、贵重ê陪葬品，因为án-ne，挖坟，mā就等于是teh挖宝仝款。二是chit种行为mā是古代社会一种侮辱敌人ê方式（参考列王记下廿三：16—18，阿摩司书二：1）。当in ê尸体被挖出来了后，会被「暴露tī日头、月娘，kah星下脚」，被随意弃sak tī荒郊野外，无人chhap，「无koh被收敛埋葬」。Á「日头、月娘、星」chiah-ê星辰lóng是in过去当做神明teh崇拜ê对象，是in「所爱慕、服事、占卜、崇拜ê」，如果chiah-ê星辰真正是神明，看见此情应该会伸手救助in ê子民。M̄-koh真清楚，chiah-ê星辰lóng是虚假ê神明，对in死后ê境遇根本就lóng无反应。In kā「会变成地面上ê肥料」，lóng无性命尊严ê意义thang讲。

第4到6节，chit段经文讲出上帝ài先知耶利米去传达信息，hō͘犹大人民知影in真正是固执到「一意孤行」，而且是lóng无悔意，已经面临灭国ê大灾难来临，却iáu ân-ân地「掠tiâu偶像」m̄放，拒绝悔改tńg来到上帝chia来。上帝原本会注意听人出tī心内真诚ê祈祷声音，m̄-koh犹大人民就是「不讲出心底话」，无人「为家己ê恶行忏悔」。这是hō͘上帝感觉艰苦心ê事。
第7节，chit节thang参考以赛亚书第一章3节。

Chit节表示上帝对犹大人民ê评价，是比飞禽行兽iáu不如。因为连「鹳鸟」、「斑鸠、燕子、白鹤」thèng候鸟，lóng知影tio̍h跟tòe「季节迁徙」才能保存性命，飞向该去ê栖息地，m̄-koh犹大人民却m̄知为保存性命去走chhōe上帝。

第8到9节，chit节thang看出当时犹大社会犯罪ê严重性，就是连宗教师lóng会做欺骗人ê事，甚至严重到连上帝ê「律法」mā被经学教师hō͘「修改」。Án-ne，聪明如经学教师ê，面临国家灾难来临ê时mā是「惊惶失措」m̄知该怎样办？这只ē-sái自认聪明如经学教师ê人「蒙羞」。

第10到12节，chit三节是重复叙述第六章12到15节经文。

Chia清楚说明上帝beh用敌人来phah败犹大人民当做惩罚ê方式，án-ne，in ê「bó͘ hō͘别人」，「田地mā交hō͘新主人」，in过去汲汲营钻所得tio̍h siōng珍贵ê一切会丧失。因为in过去就是贪婪成性，「无论地位高低lóng贪图不义之财」，「连先知kah祭司mā lóng欺诈人民」kui个犹大社会问题是án-ne严重，有权有势ê人贪到「m̄知耻，不面红」，是带头堕落ê领导者，因为án-ne，当上帝「惩罚」临到ê时，in所受tio̍h ê惩罚会比一般民众koh khah严厉，会「一蹶不振」，永远爬bē起来。

第13节，chia用葡萄树kah无花果树做譬喻，chit句「像葡萄树无结葡萄，像无花果树无结果子」，chit句话真清楚teh表示以色列民族kā消失，á是讲南国iáu大将因为án-ne被灭亡，因为上帝「容许外国人来占领in ê土地」。「连叶álóng枯干去」，chit句话表示无生机ê现象，已经死去à。换句话讲，南国犹大生存ê机会已经非常渺茫，而且毁灭ê时间真紧来到。

第14到16节，chit三节是teh暗示巴比伦帝国军队来临，而且攻入耶路撒冷城后会发生ê情景。虽然有人teh鼓励耶路撒冷人民，tio̍h赶紧起来，m̄-thang「iáu坐teh无振动」，ài in赶紧「走到设防ê城」，就算beh死mā「就死tī hia」in已经清楚知影上帝bē koh再伸手救助in，mā知影这是上帝ê惩罚。因为敌人已经来到siōng北pêng ê城镇「但」。M̄-nā án-ne，而且敌人ê阵势庞（pâng）大，犹大人民已经听见「战马teh喷气」kah「战马嘶鸣」ê声音。

第17节，chia用「毒蛇」teh代表巴比伦帝国ê气力，是非常厉害，已经m̄是用任何力量thang阻挡落来。

第18节，「我悲伤无停；我心愁烦。」原本「悲伤无停」chit-ê词ê意思是teh指「无法度痊愈」，指伤害真严重。

第19节，chit节是真典型ê「问kah答」ê句话；前半句是犹大人民teh问，后半句是上帝teh回答in ê问题。用chit种回答方式，thang帮助以色列人民明白in taⁿ ê苦难是为何原因。

「我四界听见同胞哀鸣」，这是先知耶利米kā以色列同胞惨痛ê境遇转hō͘上帝，有意祈求上帝ê垂怜。Tī苦难中ê犹大人民teh问：「上主不tī锡安了mah？锡安ê王不tī城内了mah？」上帝ê回答真清楚，反问in「为甚么拜偶像？为甚么拜虚无ê外国神明，激怒我」？

第20节，chit节thang看出in成做奴隶后tī苦难生活中ê期待原认为「夏季过去，收成结束loh」，in就ē-tàng得tio̍h拯救，m̄-koh结果「犹原无得救」。这说明犹大人民tī奴隶生活中，是一直teh等待得救ê信息传出来，m̄-koh chit种期待一再落空，显然地，上帝出手重罚了南国犹大ê人民。

第21到22节，chit两节讲出先知耶利米一再向上帝呼求，m̄-koh ná亲像头前已经提起过ê，上帝不ài伊替犹大人民祈祷。因为上帝无想beh koh听他ná m̄听苦劝ê子民呼求ê声音。Mā因为án-ne，先知耶利米感觉「悲痛万分，惊忧无停」。就án-ne伊询问上帝「kám讲基列无药膏mah？」这「基列」城是设tī约旦河东岸ê所在，mā是当时中东地区ê医学中心，以出产医病ê膏药kah乳香出名tī当时ê中东世界（参考创世记三十七：25，耶利米书四十六：11、五十一：8）。「kám讲hia无医生mah？」基列既然以医药出名，必定mā有真好ê医生。M̄-koh有真好ê医生却无一定ē-tàng「医」犹大人民心灵ê创伤，因为chit种创伤是tùi上帝来严厉ê惩罚，除了悔改认罪之外，chhōe bē-tio̍h其他thang得tio̍h「医」ê途径（参考耶利米书七：7）。