耶利米书 7章1节 到 7章15节   背景资料  上一笔  下一笔
Tùi第七章开始直到第十章,是先知耶利米tī耶路撒冷圣殿门口传讲信息ê记录。Tio̍h注意ê是chit段经文记录并m̄是tī仝一个时间传讲,却是经历过kúi-nā年ê时间chiah完成。第七章所讲ê、所用ê文辞也kah头前几章差别真大;头前几章lóng是用诗歌ê方式teh表达,第七章ê经文则用散文ê方式写出来。

Chit段经文是先知耶利米tī耶路撒冷传讲ê信息。Tùi chit段信息thang看出内容ê特色:信仰kah社会生活是一体ê两面,无法度分开。若是kā信仰tùi生活kah工作中抽离出来,hit种ê信仰是虚假,不实在ê。这mā是为甚么先知ê信息中一再强调实践社会公义ê重要性,因为这是上帝对他拣选ê子民所赋予 ê社会责任(参考创世记十八:19,以赛亚书四十二:1、4、6—7)。每一个时代lóng仝款,当chit种信息kah信徒ê利益冲突,特别是执政者ê利益违背,就真oh被接受。耶稣受难ê原因是án-ne,今á日ê传道者tī某一kóa地区会hō͘侮辱、迫害,mā常常是因为传讲ê信息kah当地人民ê生活、工作之利益有冲突致使ê结果。

第1到4节,上帝差派先知耶利米到耶路撒冷「圣殿门口」,ài伊「向进入圣殿敬拜上主ê人传达」上帝ê信息。Án-ne,听tio̍h信息ê对象必定lóng是犹大人民。所传达ê信息内容就是ài in「弃邪归正」,「m̄-thang koh再相信hiah-ê骗人ê话」,讲甚么tī耶路撒冷真安全。Īnm听从上帝ê话「弃邪归正」,结果惹起上帝忿怒,进一步koh弃sak in,就算bih起来tī耶路撒冷圣殿mā仝款,性命不保。

第5到7节,「tio̍h弃邪归正」,chit句话koh一pái重复第3节所提过ê,表示犹大以色列人民已经背离上帝ê教导,做真chē无应该做ê事,chit-má先知传出ê信息是ài in「以公平相待」。

Chia「公平」指ê是公正、公道、无欺骗ê行为。Chia强调「公平相待」ê原因,就是有发生「占外侨kah孤儿寡妇ê sio̍k」,以及「杀害无辜」、「拜别ê神明」等,chiah-ê lóng是上帝眼中看做严重恶质ê行为。先知耶利米强调讲,只要犹大人民知影「改过」,上帝就会hō͘ in「继续居留」tī上帝赏赐hō͘ in「祖先」流传到in khiā起ê这迦南地。

第8到10节,tùi chit三节thang看出上帝严厉地控诉犹大人民所做恶质之行踏,包括in不时听hiah-ê假先知传讲「骗人ê话」,kan-taⁿ知影做「偷the̍h」、「刣人」、「奸淫」、「做伪证」、「向巴力献祭」等等chiah-ê lóng是上帝看做「恨恶ê事」,然后却走去圣殿讲:「咱真安全!」chit句话意思是teh指当敌人来攻击耶路撒冷ê时,in就走进圣殿里bih起来,祈求上帝庇护。M̄-koh平时,in却是热心地去拜偶像巴力神明,chit种行为是对上帝来讲是真大ê侮辱。

第11节,「Lín认为我ê圣殿是贼窝mah?」chit句话mā被耶稣引用teh谴责tī当时宗教领袖把持圣殿,并且kah贩卖商人勾结欺骗人民ê事顶面(参考马可福音十一:15—17)。Tùi耶稣洁净圣殿ê故事,就thang发见一个重要ê事实:人若无法度tī生活上遵照上帝ê旨意来行,án-ne,koh再好ê宗教祭典礼仪,mā只不过是一种掩盖(khàm)罪恶ê行为而已,m̄-nā无法度彰显宗教信仰ê情操、意义,颠倒地,koh khah sêng是teh亵渎神圣ê上帝仝款。先知耶利米tī chia讲上帝非常「清清楚楚地看见」犹大人民ê「一举一动。」因为上帝是无所不在、无所不知ê神。

第12到15节,先知耶利米传达上帝ê话,ài犹大人民去看māi上帝对待「示罗」,chit-ê所在原本是以色列人民tī约书亚带领in进入迦南后,第一个设立会幕敬拜上帝ê所在(参考约书亚记十八:1)。到士师ê时代,「示罗」是以色列十二支派ê圣地,tī chia有会幕、约柜,kah大祭司(参考士师记廿一:19,撒母耳记上一:3),一直到撒母耳ê时代,「示罗」lóng是以色列人民ê宗教中心。M̄-koh后来,以色列人民弃sak上帝,结果约柜被非利士人抢行,chē kah三万以色列军人被刣(参考撒母耳记上四:1—11)。chit-má上帝用「示罗」来譬喻耶路撒冷城teh beh面临仝款ê运命,会遇tio̍h巴比伦攻破,而且圣殿mā会hō͘烧毁,城kah圣殿lóng会成做废墟。原因是in犯真chē罪,虽然有上帝ê先知传达信息ài in悔改,m̄-koh in「lóng是m̄听」。上帝决定beh hō͘ in被掠到外国去做奴隶,ná亲像主前721年北国以色列人民所遇tio̍h ê结果仝款。

重新查询 专卷研经 耶利米书系列
错误回报,请联系comm[@]fhl.net