Chit章是谈起关系耶路撒冷城被巴比伦帝国ê军队攻破，而且圣殿被烧毁ê经过，以及犹大ê以色列人民被俘虏到巴比伦去做奴隶ê情景。M̄-koh有关耶路撒冷城被攻破摧毁ê部分lóng tī第三十九章1到10节已经记载过，尤其是这第五十二章所记载ê内容kah列王记下第廿四章18节到第廿五章21节、第27到30节完全仝款。对照来看，教会发见耶利米书ê编者，kā列王记下第廿五章22到26节，chit段有关巴比伦王尼布甲尼撒任命亚希甘ê kiáⁿ基大利作犹大总督ê记事省略，m̄-koh却增加一段尼布甲尼撒王俘虏犹大以色列人民ê统计人数，特别是tī第30节提起第三pái俘虏以色列人民ê行动。

有学者认为chit章就是耶利米书编辑者附加上去ê。主要teh表明：先知ê预言确实是实现了，犹大王国确实是灭亡了。编撰者khah强调：先知传达上帝ê信息虽然听起来真不爽快，m̄-koh he确实是上帝ê信息，m̄-thang疏忽。上帝透过他忠实ê奴仆先知所传出来ê信息一定会听，千万m̄-thang藐视先知所传达出来上帝ê话，若无，会为性命带来koh khah大ê灾难。

Chit段经文差不多kah列王记下第廿四章18节到第廿五章7节完全仝款。会出现仝款ê记事，真可能是采用仝款ê资料所致。是teh描述犹大西底家王受掠，伊ê kiáⁿ tī伊面前被巴比伦王尼布甲尼撒杀害，伊被挖出目睭，然后用铜链锁tiâu带到巴比伦去做奴隶ê记事。

第1节，chia讲「西底家二十一岁ê时作犹大王」，这是主前596年。Tī「耶路撒冷统治十一年」，这是teh指主前586年。「伊ê老母哈慕伊」，是约西亚ê bó͘，mā是约哈斯kah西底家ê老母（参考列王记下廿三：31、廿四：18）。

第2节，「西底家王做上主看做邪恶ê事，像约雅敬所做仝款」，chia虽然无明确说明in到底做甚么事hō͘上帝hit种受气，m̄-koh却指明kah约雅敬王仝款，án-ne就ē-tàng tùi约雅敬所做ê事来了解。耶利米书第廿六章20到23节则记载一件有关约雅敬王刣死了上帝ê奴仆先知乌利亚。Chit位先知kah耶利米仝款，lóng真忠实传达上帝ê信息。M̄-nā án-ne，tī耶利米书第廿二章13到17节mā记载，约雅敬王tī国家为tio̍h赔偿埃及ê战争费用ê时，iáu大兴土木兴建富丽堂皇ê宫殿，m̄-nā贪图家己ê利益，甚至iáu流了无辜者ê血，以暴力压制人民等，chiah-ê lóng是上帝无法度容忍ê事。约雅敬án-ne做，西底家mā tòe学做chit种邪恶ê事。

第3到7节，chit三节提起巴比伦军队围困耶路撒冷城ê情景。上帝对他ê子民「受气」，是透过巴比伦军队来惩罚，无koh hō͘犹大人民khiā起tī「耶路撒冷」，hō͘ in到外邦地区去做奴隶，á是过痛苦生活。

「西底家背叛巴比伦王尼布甲尼撒」，chit句话thang参考历代志下第三十六章13节，西底家王bat chiù-chōa tio̍h忠实tī巴比伦，听从巴比伦帝国ê命令，m̄-koh结果并无照约束而行，而且拒绝听从先知耶利米传达hō͘伊上帝ê信息kah警告（参考耶利米书三十：17—19）。结果巴比伦军队西底家王在位ê「第九年十月十日」开始攻打耶路撒冷，一直到伊在位ê「第十一年」四月初9，这就是主前586年7月18日，án-ne，巴比伦军队围城时间总共长到一年六个月。因为城里「饥荒非常严重，人民无粮食」，结果是军队就弃械投降了。

第8到11节，虽然西底家王带家眷重臣，以及禁卫军同齐逃离耶路撒冷城，m̄-koh iáu是hō͘尼布甲尼撒王ê军队tī「耶利哥ê平原」tui-jiok上了，巴比伦军队俘掳了西底家王kah伊ê家眷，然后kā伊押解到tú-teh「利比拉」ê尼布甲尼撒王面前「审判」。

「利比拉」，这mā是当年埃及王尼哥ê军事总部，tī chiamā bat囚禁犹大ê约哈斯王。Taⁿ chit-ê所在变成尼布甲尼撒王ê军事总部，mā tī chit所在审问犹大末代国王西底家。巴比伦王尼布甲尼撒是非常残酷ê国王，伊当tio̍h西底家面前kā伊「所有ê kiáⁿ lóng处死」，mā同时「处死去犹大ê众首领」。续落来是kā西底家「两只目睭挖出来，用铜链锁tiâu伊」，然后kā伊带到巴比伦去，「关tī监狱里，直到伊往生ê日子」。