Chit段经文是对以东发出ê信息。

以东，这是以扫ê kiáⁿ孙，kah以色列人民ê关系来讲，是「叔辈兄弟」，是非常亲近ê血缘关系。M̄-koh tùi出世开始，chit两个祖先是双生á ê兄弟就一直冤家无停，in ê kiáⁿ孙mā是仝款，特别是tī摩西带领以色列人民出埃及ê时chūn，以东人m̄-nā bat拒绝以色列人民借道经过，iáu派出精锐ê大军攻打以色列人民（参考民数记二十：14—21）；tī大卫王ê时代，以东人bat被大卫ê军队屠杀有一万八千人，并且被以色列驻军管辖（参考撒母耳记下八：13—14）。后来tī犹大王约兰在位期间，以东人乘机独立（参考列王记下八：20—22）。

仝款记载有关上帝beh惩罚以东ê经文，mā出现tī诗篇第一三七篇7节；以赛亚书第廿一章11到12节；耶利米哀歌第四章21节；以西结书第廿五章12到14节；阿摩司书第一章11到12节，以及俄巴底亚书等。Tùi先知俄巴底亚ê文献来看，就会发见chit位主前第六世纪ê先知俄巴底亚ê信息差不多全部lóng是针对以东人所发出ê。伊指出以东人siōng大ê问题是：当外族人攻击犹大ê时chūn，以东人m̄-nā袖手旁观，甚至是趁火抢劫参与掠夺，明明是就是kah仇敌仝款对待犹大（参考俄巴底亚书11到13节）。

第7节，以东tī旧约圣经时代，hō͘人认为是当地siōng有智慧ê族群。In tī中东地带ê商业活动非常活跃。M̄-koh圣经所讲ê「智慧」、「贤达」lóng是teh指认bat上帝是性命主宰，并m̄是指tī商业上能力真强，á是tī应付世事ê事顶面有真灵巧ê技能。

Koh讲，以东iáu有另外一个出名而hō͘人认为真聪明ê事，就是位居高耸ê峭壁，真好ê天然屏障，hō͘ in往往chhōe机会落来偷袭，却无其他族群ē-tàng攀上高山去打击in，而hō͘ in thang安居高枕无忧。

第8节，「底但人」，chit-ê族群mā是亚伯拉罕ê kiáⁿ孙（参考创世记廿五：2—3），阿拉伯人ê一个游牧部落。Tī以西结第廿七章20节讲，chit-ê部落ê人ài用马鞍kah毯子kah别ê族交易，换来生活用品。In平时接触ê对象是叙利亚、腓尼基kah巴勒斯坦人。

chit-má上帝beh「惩罚」、「消灭」以东人ê时刻到à，因为án-ne，ài「底但人」bih起来，m̄-thang koh再kah以东人有任何来往，免得受tio̍h连累。

第9到10节，chit两节经文kah俄巴底亚书第5到6节仝款；tī俄巴底亚书提起贼á á是盗贼来，kan-taⁿ会the̍h走所需要ê物件，伊无可能全部lóng the̍h走。仝款ê，以色列人民照摩西律法规定，摘葡萄ê时chūn，bē-tàng全部摘完，一定tio̍h留落来一kóa hō͘ hiah-ê sàn-chhiah ê人，á是外出ê人thang得tio̍h果子来止饥（参考利未记十九：9—10、廿三：22，申命记廿四：20—21）。M̄-koh tī chia，用比较khah ê词句说明上帝ê惩罚，是bē koh再存有怜悯ê恩典，会对以东人采取非常严厉ê态度，方式就是「Kā以扫ê后代剥得精光」，并且beh「揭露in隐藏ê所在」，hō͘ in无所遁形。Án-ne，即使是存活落来ê人，mā会sàn-chhiah到极点，因为in过去对犹大人民ê态度就是趁火抢劫。

第11节，上帝讲beh照顾以东人ê「孤儿」kah「寡妇」，这说明以东ê cha-po͘人lóng kā tī chit pái ê灾祸丧生战场，无人存活落来。

第12到13节，chia特别指出若是上帝决定严厉惩罚以东，无论in怎样bih起来mā无用。Tī chia mā提起以东ê首都「波斯拉」，会变成荒野，这mā teh表示以东kā无可能有继续存在ê机会了。

第14到16节，chit三节经文kah俄巴底亚书第1到4节类似。

Chia采用ê是一种拟人化ê笔法，讲上帝「差使者到列国，ài in召集军队」，这ná亲像今á日所谓ê「外交大臣」准备结盟成联军出击以东。其中方法之一，就是孤立以东，hō͘以东失去外援。上帝会惩罚伊ê原因，就是伊「傲慢欺骗」成性，即使伊ê地理位置是tī「山峰上ê峭壁」，ná亲像「la̍h-hio̍h tī koân ê所在做巢」mā仝款，只要是上帝决定beh毁灭ê旨意，任何一个所在lóng仝款，无法度逃避上帝惩罚ê手（参考诗篇一三九：7—8）。

第17到18节，chia kah耶利米书第十九章8节所预言犹大ê结局仝款。Chia讲「以东kā遭遇hō͘人恐怖ê毁灭」，ná亲像「所多玛、蛾摩拉」这两城仝款，是彻底毁灭。而且是包括伊「周围ê城镇」mā是仝款ê遭遇。

第19节，tùi chit节到21节tī第五十章44到46节koh一pái出现仝款ê句话，只是以东换做巴比伦。

Chit节提起上帝「选立ê统治者kā统治chit-ê国家」，指ê是上帝选派来惩罚以东ê国家，并且用「狮」来代表攻击以东者ê强猛。Mā tùi chit节mā看出以东chit-ê国家对上帝ê藐视，想beh kah上帝「比」、「挑战」、「反抗」，chiah-ê lóng是骄傲chiah会出现ê态度。

第20到22节，包括以东ê大城「提幔城」，in ê孩童mā会「hō͘人拖行」，成做无父母thang照顾ê孤儿，kui个城内居民所发出ê哭声连远远tī「红海」地区ê人mā听得见，这表示上帝惩罚以东情形ê严重，已经因为来攻击in ê人ná亲像凶猛ê「la̍h-hio̍h展开翼股，猝然冲落来攻击」，hō͘ in无法度防备，只有感觉像teh beh临盆ê产妇「阵痛」、「仝款恐慌」。