耶利米书 48章26节 到 48章47节   背景资料  上一笔  下一笔
第26到39节ê经文kah以赛亚书第十五到十六章,二者ê类似ê所在真chē,主要内容是teh说明摩押会hō͘上帝惩罚,是因为伊真骄傲、狂妄。Tī第26节、29节、30节等等一再提起伊ê傲慢态度。

Chit段经文mā描述摩押tī巴比伦帝国攻击之下,人民四界逃亡窜流ê情形,m̄-koh无论in怎样逃,lóng无法度逃得了。Ē-sái讲是上帝有恩典,无hō͘摩押完全毁灭,会hō͘摩押人得tio̍h重整家园ê机会。

第26到27节,上帝对他拣选ê奴仆巴比伦帝国(参考廿五:9)下命令,beh hō͘像「lim醉」了人仝款,然后beh hō͘伊tī家己「吐出来ê物件」上「phah滚」,hō͘摩押人成做被嘲(sau)笑ê对象,ná亲像过去in teh「嘲(sau)笑以色列」人民仝款,hō͘ in以后提起chit段往事,lóng会感觉家己ná亲像被「掠tio̍h ê强盗」,只有ē-tàng见笑「摇头」。

第28节,「像粉鸟tī峡谷中做巢」,chit句话thang参考诗篇第五十五篇6到8节,表明若是知影上帝已经非常忿怒,in就beh赶紧改变筑窝ê方式。

第29到30节,chit两节thang参考西番雅书第二章8到10节。Chit节真清楚说明上帝beh严厉惩罚摩押人ê因,就是in「傲慢」、「骄傲」、「狂妄自大,自认为了不起」。M̄-koh上帝非常清楚,摩押「所夸耀ê lóng是虚妄,所做ê事都无根」,只是虚有其表而已。

第31到33节,chit段经文kah第11到12节相对应;tī第11到12节中提起有关葡萄酒香,以及酒瓶后来被摔碎ê情形。Á tī第32到33节则谈起葡萄树本来是生长kah真美壮,m̄-koh chit-má被摧毁了,m̄-nā夏季ê果子无了,连葡萄酒ê酒池mā酿bē出酒来。

Chit段经文mā提出kúi-nā个城市ê名,lóng是属tī吕便kah迦得ê区域,tī约旦河东岸(参考约书亚记十三:15—28)。

「吉珥・哈列设」,这是古摩押ê首都,以出产葡萄出名,特别是hit-ê城ê葡萄饼koh khah是远近出名。Chit-ê「哈列设」ê字意有含「phah碎陶器ê碎片」,因为án-ne,「吉珥・哈列设」ê意思,就是「成做碎片ê城市」。

「西比玛」,可能tī希实本以西大约五公里远ê所在。Chit-ê城mā是用盛产葡萄kah夏季果子出名。Chia讲上帝毁灭ê方式,就是kā chiah-ê lóng摧毁。

「雅谢」,这是tī死海ê北pêng,有可能就是今á日ê「雅纪尔」(Jazzir)城。Chia mā kah「西比玛」仝款,lóng是盛产葡萄kah夏季果子。

上帝beh为顶面所讲chiah-ê城市「哀哭」,表示过去因为盛产葡萄所带来安稳之经济繁荣ê生活,taⁿ已因战乱甚至国家灭亡来致使葡萄园无人整理而荒废,当然就koh khah án怎都无好收成thang讲,放目chiu看去是一片死寂ê景象,过去用来夸耀ê,taⁿ lóng变成一片空白。无任何「欢乐ê声音」出现,因为无任何葡萄生产,mā就「无koh有人榨酒欢呼了」,因为chiah-ê城市lóng荒废了。

第34节,chit节kah以赛亚书第十五章4到6节仝款。

「希实本」,这是设tī死海北部东边约三十公里ê所在,tī以色列iáu未占领chit所在chìn前,是亚摩利王西宏ê首都。

「以利亚利」,tī希实本以北约两公里ê所在,因为是隔壁做伙,每pái提起希实本,mā时常会连带讲tio̍h以利亚利。

「雅杂」,tī希实本西南方约三十二公里ê所在。

「琐珥」,是靠近死海ê南端。罗得逃难ê时,bat tī chia闪过所多玛城被毁灭ê厄运(参考创世记十九:23、30)。

「何罗念」、「伊基拉」、「施利施亚」等等chiah-ê城市,正确地点lóng已经无清楚。

「宁林」,是tī死海南端约十六公里ê所在。

以上chiah-ê后来lóng是属tī摩押ê城镇,m̄-koh却tī巴比伦军队蹂躏之下,四界听tio̍h「哭」、「哀号」,以及tī伤痛中ê haiⁿ-haiⁿ叫声音。Siōng凄惨ê莫过tī原本用来灌ak ê溪水干涸了,这是因为战争ê缘故,敌人阻塞河道,破坏了水源。

第35节,过去in认为伟大ê神明基抹,mā因为敌人入侵、蹂躏ê缘故,摩押人对神明基抹会失去信心(参考第13节),á是讲神明被敌人hō͘掳行,mā无法度koh再像过去仝款向神明「献烧化祭」了。

第36到39节,chit节thang参考以赛亚书第十一章16节,耶利米书第十六章6节、第廿二章28节。

上帝讲beh替摩押人kah in首都ê人民「悲伤」、「挽歌」,因为战败ê结果是过去「所有ê一切lóng完了」,taⁿ lóng已经成做过去。Chia描述摩押人为tio̍h beh表示心中ê哀伤,in「剃光头毛,剪掉胡须」、「割伤tio̍h家己ê手,穿麻衣」等等,chiah-ê lóng是古早时以色列人民用来表示极大哀伤ê方式。当时巴勒斯坦地区ê人,认为留长发、长胡须,是teh表示一种社会力量kah地位。对一个人侮辱ê方式,就是kā伊ê头毛á是胡须剪掉(参考撒母耳记下十:4—5),chit种人会感觉见笑,严重ê话会自刣来死。Á「割伤tio̍h家己ê手」,mā是巴勒斯坦地区ê人用来表示哀伤ê一种方式,摩西律法中严厉禁止以色列人民学习chit种方式(参考利未记十九:28)。M̄-nā án-ne,tī摩押境内是四界lóng thang听tio̍h「哀恸ê声音」,原因kah上帝出手惩罚有关,无人敢伸手救助。带hō͘摩押ê就是「侮辱」,被邻国族群「嘲(sau)笑」而已。

第40到46节,chit段经文lóng teh描述上帝用巴比伦军队来惩罚摩押,hō͘巴比伦军队有ná亲像「la̍h-hio̍h」凶猛,连想beh预防mā困难。因为巴比伦ê攻击ná亲像「猝然冲落来」ê la̍h-hio̍h,hō͘摩押无法度遁逃。Á这只有一个原因,就是伊「自大」、骄傲所带来ê结果,m̄相信上帝会伸手打击它。Á chit种打击ê痛苦,就ná「像阵痛ê产妇仝款」。无论摩押人想ài怎样逃避,lóng无法度躲得掉上帝「已经定下惩罚摩押ê时日」。虽然摩押人bat想beh走chhōe「希实本」hō͘ in「保护」,m̄-koh in会发见chit-ê城早已经「成火灰」。Mā tùi chia看见巴比伦军队所过ê城镇,lóng是放火烧毁,人民无法度chhōe-tio̍h安居保身ê所在,m̄-nā是摩押人民受tio̍h严厉ê惩罚,连in守护神「基抹」mā难逃被烧毁,甚至连「in ê子女lóng受掠去了」。

第47节,这是真重要ê一节,讲「kā有一工」上帝beh koh一pái「hō͘摩押重整家园」,表示上帝tī惩罚ê背后,lóng是带有怜悯kah恩典。Ná亲像tī惩罚埃及仝款,mā是hō͘它有复原ê机会(参考耶利米书四十六:26)。M̄-koh却无hō͘非利士人得tio̍h仝款ê恩典。

重新查询 专卷研经 耶利米书系列
错误回报,请联系comm[@]fhl.net