Chit章到四十四章lóng是谈及耶路撒冷被毁灭了后ê景况。Chit章mā谈及沙番ê孙á、亚希甘ê kiáⁿ基大利被巴比伦王尼布甲尼撒任命为犹大省ê总督，m̄-koh却hō͘伊ê同胞hō͘谋刣。

Ná亲像头前有提起过ê，chit章ê第1到6节经文kah第三十九章11到14节ê记事有差异。有一种讲法，是旧约学者布莱特（Bright, J）tī伊所写ê《耶利米书释义》册中，提出ê看法，伊讲：当先知耶利米被释放后，tī tńg去故乡ê路途中tú-tio̍h hiah-ê押解犹太人去巴比伦做奴隶ê军队，in m̄知头前指挥官释放先知耶利米，认为伊是漏网之鱼，因为án-ne，koh kā伊掠。后来知影是王下ê命令，就án-ne koh一pái kā伊释放。不过，两段ê记事lóng仝款是先知耶利米无选择去巴比伦享受礼遇，却是tńg去故乡kah hiah-ê贫困ê同胞做伙。

第1节，「拉玛」，这是距离耶路撒冷城北pêng大约八公里ê一个小镇。先知耶利米kah一阵被俘虏ê以色列同胞同时受掠，in行到à「拉玛」chit-ê地方chiah被「护卫长」尼布撒拉旦「释放」。Ná亲像头前所叙述ê，真可能是第二pái受掠，因为第一pái ê释放是tī第三十九章已经记载过了。

第2到3节，chia提起巴比伦军队ê护卫长尼布撒拉旦mā认为耶路撒冷城kah圣殿ê毁灭，是出「上帝」ê决定，理由是「因为」以色列人民「得罪上主，m̄听从伊ê命令」。Chit-ê话会tùi巴比伦军队指挥ê口讲出来，有一个可能就是尼布撒拉旦tùi俘虏ê嘴中听tio̍h in chit-má真懊悔当初无听从先知耶利米ê苦劝，chit-má果然一切lóng会失去。因为án-ne，当伊beh解开先知耶利米ê身上锁链ê时，就用伊所听tio̍h ê chiah-ê话对先知耶利米讲。这mā有意思beh表明：耶利米是一个可敬ê先知，可惜伊ê人民m̄听从伊。

第4节，尼布撒拉旦「解开」先知耶利米「手上ê链á」，hō͘伊「自由」。同时mā hō͘ hō͘先知耶利米一个真好ê选择：若是伊tio̍h kah尼布撒拉旦去「巴比伦」，伊会「好好á照顾」伊。这表示chit位巴比伦元帅确实对先知耶利米非常敬重。「如果无愿意，就m̄免去」，thang真自由选择「欢喜到甚么所在，就到甚么所在」，并且iáu hō͘伊看排tī「面前」ê是「kui片土地」，伊thang自由选择。

第5节，chit节真重要，因为tī chia尼布撒拉旦得tio̍h「巴比伦王已经指派」亚希甘ê kiáⁿ基大利「作犹大各省ê省长」ê消息，因为án-ne，伊建议耶利米tńg去基大利hia。M̄-koh并无勉强先知耶利米，hō͘伊随家己ê「意思」决定是m̄是beh tńg去。同时iáu送hō͘先知耶利米「礼物kah旅途需要ê食物」。

第6节，先知耶利米决定到「米斯巴去chhōe基大利」，这是因为基大利选择以「米斯巴」城作为政府所在地；因为耶路撒冷城已经被巴比伦军队摧毁成做废墟，而且城墙已经被拆，无适合khiā起，当然koh khah无适合成做政府行政中心。Chit-ê城距离耶路撒冷北pêng大约十二公里。Tī士师ê时代，chit-ê所在bat是一个宗教圣地，mā是军事行动中心（参考士师记二十：1）。

第7到8节，「犹大官员kah无投降ê部队」，chiah-ê就是所谓ê「游击队」，对巴比伦帝国来讲，就是所谓ê「顽劣份子」。In听见了chit-ê消息，就讲基大利是受派「管理」留tī故乡「hiah-ê siōng sàn-chhiah ê人」。就决定到米斯巴去见基大利。Chia列出一份名单，siōng值得注意ê是「尼探雅ê kiáⁿ以实玛利」，伊就是后来暗刣基大利ê主要杀手（参考四十一：5），另外iáu有「加利亚ê kiáⁿ约哈难、单户默ê kiáⁿ西莱雅、尼陀法人以斐ê众kiáⁿ，kah玛迦人耶掖尼亚」等，chiah-ê lóng是当时反对向巴比伦投降ê菁英份子。

第9到10节，chiah-ê意见领袖来见基大利；伊向in「保证」，ài in「mài惊向巴比伦人投降」，伊强调只要「服事巴比伦王，一切lóng会顺利」，并且hō͘ in知影，伊会争取到hō͘ in tī米斯巴生活ê时，thang「收存酒、果子、橄榄油」等，这表示in thang kah hiah-ê siōng贫困ê同胞同齐耕耘土地。因为大部分ê人lóng受掠巴比伦，必定留落来真chē田园等待种作。特别是hit时chūn，已经是开始采收果子ê季节，当基大利án-ne表示ê时，mā teh说明巴比伦王并无想beh没收in农产品。基大利mā表示ê决心「beh亲自留tī米斯巴」好好á照顾留落来ê以色列同胞。

第11到12节，chia提起流亡到国外地区tńg来ê以色列人民，包括有tùi「摩押、亚扪、以东」等地，以及其他「流亡ê所在」，大家lóng纷纷「tńg来到犹大」。Chiah-ê人中间有真chē人mā是来到「米斯巴见基大利」，并且就ná亲像基大利所讲ê，hō͘ in thang「tī hia收存真chē酒kah果子」。Tùi chia mā thang看tio̍h基大利治理ê手路是温和ê，伊并无要求chiah-ê来归降ê游击散兵缴械，只是劝勉in tio̍h安定落来，顺服巴比伦王。M̄-nā án-ne，伊ê态度是明智、开放ê，伊hō͘以色列同胞拥有家己ê田园，mā thang收藏家己ê粮食。这mā同时teh表明巴比伦帝国统治之下，对犹大残存ê人民采取阔容政策，允准in拥有家己管理ê方式，chit点kah北国以色列被亚述帝国消灭ê时，所受ê待遇完全无仝；巴比伦王尼布甲尼撒并无tùi外国引进大量移民来kah以色列民族通婚，这mā是南国犹大ē-tàng继续保存以色列人民kah信仰亲密成一体ê主要因素。亚述帝国是消灭北国以色列后，除了俘虏以色列人民做奴隶，甚至kā in贩卖到外国去之外，进一步ê作法，就是tùi附近国家、民族引进大量ê移民，hō͘ in通婚，引诱以色列人民去拜偶像神明（参考列王记下十七：24、29），亚述帝国án-ne做ê主要目的，是有计画beh消灭chit-ê以色列民族。

第13到14节，tī第7到9节提起顶pái chiah-ê犹大逃走菁英去见基大利了后，其中一位「约哈难」koh一pái去见基大利，伊提供一则所知影ê重要消息，就是尼探雅ê kiáⁿ「以实玛利」，受tio̍h「亚扪王巴利斯」ê教唆，beh来米斯巴暗刣基大利。M̄-koh基大利「m̄相信chit-ê话」。

第15到16节，约哈难m̄-nā提供chit段消息，并koh khah进一步表示beh先kā以实玛利暗刣死，好保护基大利，而且ē-tàng防止巴比伦帝国因为基大利被刣而对犹大人采取报复手段。M̄-koh基大利阻止约哈难ê计画。伊认为约哈难所得tio̍h ê消息无正确。