耶利米书 38章1节 到 38章13节   背景资料  上一笔  下一笔
Chit章是延续第三十七章11到21节ê背景。Mā有一种讲法是:认为第三十八章就是第三十七章11到21节内容ê另外一种记录。会有chit种观点是因为:

(1)chit两章lóng记载先知耶利米是hō͘控「叛国」罪名,讲先知耶利米煽动人民向巴比伦军队投降(参考三十七:13/三十八:4)。

(2)chit两章lóng提起先知耶利米是被关tī「约拿单监狱」(参考三十七:15/三十八:26)。而且Tī该监狱tú-tio̍h非常恶质ê对待,hō͘伊ê性命有危险(参考三十七:20/三十八:9)

(3)chit两章lóng提起西底家王kā先知耶利米带去私下脚问伊有无上帝ê信息(参考三十七:17/三十八:14)。以及问完结束后,西底家王就依先知耶利米ê要求kā伊送到王宫监狱里监禁(参考三十七:21/三十八:28)。

(4)chit两章lóng记载先知耶利米tī监狱中食ê物件,直到耶路撒冷城内无饼thang食(参考三十七:21/三十八:28),而照第五十二章6节ê记载,当城里饥荒非常严重ê时,mā是耶路撒冷城被攻破ê时间。

Chit段经文讲国王身边ê重臣正式向国王控诉先知耶利米,讲伊煽动人民向巴比伦帝国ê军队投降。In要求国王kā先知耶利米判处死刑。

第1节,「马坦ê kiáⁿ示法提雅」,伊是王室ê首领。

「巴施户珥ê kiáⁿ基大利」,是祭司,而巴施户珥担任圣殿总管,bat phah过先知耶利米。伊ê kiáⁿ基大利tī宫廷职位真koân。

「玛基雅ê kiáⁿ巴施户珥」,tī第廿一章1节出现过,mā是西底家王身边ê重臣。

第2到3节,顶面所讲chiah-ê人看见先知耶利米teh向耶路撒冷城内ê民众「转达上主ê话」,讲甚么人向巴比伦人「投降,甚么人就bē致使被刣,性命ē-tàng保全」。先知耶利米koh一pái强调只要是留tī城内,必定会遇tio̍h「刀剑、饥荒、瘟疫」ê灾难。因为上帝「一定会kā chit-ê城交hō͘巴比伦ê军队;in beh来占领」。注意chia ê「刀剑」就是「战争」ê意思。Chit种言论tī he城被包围ê紧张时刻,真容易就被认定是搅乱民心、煽动人民弃sak家己国家,谣言惑众,一定tio̍h判处死刑。

第4节,ná亲像第1节所提起ê chiah-ê官员听了后,非常震怒,因为án-ne,in「去见王」,控告先知耶利米,要求国王kā伊「处死」,理由是「伊教唆tī城内ê兵丁kah人民投降,hō͘士气低沉」,in认为先知耶利米ê言论不利tī人民,「kan-taⁿ想beh害in」。

第5到6节,可惜西底家王并无坚持保护先知耶利米,伊允准chiah-ê臣子去处理先知耶利米。就án-ne in就「用索á」kā先知耶利米「坠入玛基雅太子ê井里」,这「口井tī宫廷监狱里,井里无水,只有淤泥」,in ê做法就是hō͘先知耶利米死tī井中,无需要另外掩埋,mā bē有人知影。

第7到10节,「宫廷太监,古实人以伯・米勒」听tio̍h chit-ê消息,知影chit时先知耶利米ê性命真危急,「一定会饿死tī hia,因为城里已经绝粮了」,以伯・米勒利用西底家王tú-teh开庭(便雅悯门开庭)审案,就kā chit-ê tāi-chì向西底家王陈情,讲「chiah-ê人án-ne待先知耶利米真可恶」。Iáu好,西底家王听tio̍h chit种消息,就命令以伯・米勒赶紧kā先知耶利米「救出来」,án-ne chiah hō͘伊ē-tàng脱离死亡ê险境。

第11到13节,以伯・米勒真小心地「用破布烂衣」kah「索á」,kā先知耶利米tùi ná口井中「khiú出来」,m̄-koh并无释放伊,却是继续kā先知耶利米关tī宫廷监狱里。

重新查询 专卷研经 耶利米书系列
错误回报,请联系comm[@]fhl.net