耶利米书 34章1节 到 34章22节   背景资料  上一笔  下一笔
Chit章ê历史背景是tī主前589年,巴比伦ê军队kah其同盟国ê军队攻落犹大国ê真chē城镇,只chhun耶路撒冷kah 拉吉kah亚西加chit两个城镇iáu teh作最后ê奋斗,m̄-koh状况mā已经岌岌thang危。Tùi chit章经文中,mā thang看tio̍h当时犹大社会ê生活情况,确实在生活kah行为上背离了上帝ê教示。

先知耶利米就真清楚指出犹大社会,假先知猖獗,四界欺骗以色列人民,而koh khah严重ê,是连先知、祭司mā参与欺骗人民,贪婪而m̄知见笑(参考耶利米书六:13、八:10)。Koh khah恶质ê是犹大人民去拜偶像神明了后,竟iáu敢走到圣殿去祈求上帝庇护in,护卫in安全(参考耶利米书七:8—11),以上chiah-ê行踏lóng是上帝非常讨厌ê事。顶面所讲chiah-ê lóng是主前第七世纪末期到第六世纪初期南国犹大社会ê景况。

Mā tùi chit章经文thang看tio̍h真正上帝ê奴仆,tī一个动荡不安ê世代里,确实是oh得生存,in传讲ê是真实ê话,m̄-koh人民并无欢喜听,因为上帝真实ê信息ē-sái hō͘ in心内会感觉艰苦心,有罪恶感。先知耶利米siōng痛苦ê事,就是当伊看见社会严重堕落ê景况ê时,伊一定tio̍h照实讲出上帝beh伊传出ê无受欢迎、而且带有严厉警告ê信息,m̄-koh伊ê同胞却拒绝听从。Ē-sái讲是当伊ê同胞Tī痛苦中发出哀号声ê时,上帝soah koh ài伊传所谓ê「希望信息」来安慰in。其实,chit两种话lóng m̄是伊心中所想beh讲ê。因为伊知影讲出前者,会为家己带来人民ê怨恨,m̄-koh ná soah koh是上帝ê命令,伊无法度拒绝,mā无法度抗拒。Á ài伊讲出后者ê信息,soah koh m̄是家己心中所愿,m̄-koh he却是上帝beh伊传出ê信息。

第1节,chit节讲巴比伦王带领「伊统治下各国各族ê军队teh围攻耶路撒冷kah周围城镇」,chit时chūn上帝对先知耶利米启示他ê信息。这表示chit章经文ê时代背景是teh比第三十二到三十三章稍早ê时间,大约是tī主前589 á是588年。

第2到3节,chit两节经文thang参考第三十二章3到5节。

Chit两节koh一pái讲出西底家王teh beh面临ê悲惨运命,伊会hō͘俘虏「带到巴比伦去」。Chit件事后来chiâⁿ实成真。详细资料thang参考列王记下第廿五章6到7节,kah耶利米书第五十二章8到11节。

第4到5节,chit两节是hō͘犹大末代国王西底家ê信息,讲伊「会平安往生」,西底家王虽然无战死战场,mā无tī被俘虏了后马上被处死。M̄-koh对伊来讲,伊是hō͘凌辱到比一般俘虏á是囚犯iáu koh khah悲惨,因为伊ê kiáⁿ是当tio̍h伊ê面前被刣死,然后伊ê目睭被挖出来,koh再用铜链锁tiâu伊了后,kā伊关到巴比伦ê监狱中直到死去(参考列王记下廿五:6—7),这是真悲惨ê结局,虽然有被「埋葬」,m̄-koh受tio̍h chit种待遇并无比被当场处死好gōa chē。因为伊是国王,却是落魄、潦倒到「囚」死异乡,而hō͘人感觉悲哀。

第6到7节,chia提起「拉吉」kah「亚西加」两座城,这是设tī耶路撒冷西南方。之所以chhun落来这两座城未被攻破,是因为埃及ê军队出来beh帮助犹大,m̄-koh,巴比伦尼布甲尼撒王并无想beh kah埃及ê军队起冲突,因为án-ne下令tio̍h军队撤退(参考耶利米书三十七:5),mā因为án-ne致使西底家王得tio̍h小khóa喘气ê机会。M̄-koh chit种喘息时间真短,并无为犹大国带来koh khah好ê无仝落场。

第8到11节,chit段经文是描述西底家王kah耶路撒冷人民立约,决定beh释放家己同胞中,有人因为贫困而卖身做奴隶ê人。有几个可能:

一是chit时是战ê时,粮食供应有困难。Chē一个奴隶,等于chē一个负担。释放奴隶,hō͘ in家己去乞食,比主人养饲in koh khah容易,而且主人mā thang减轻负担。表面上看起来kah-ná是善良,其实动机并无单纯。

二是in认为chit-má释放奴隶,á是允准以换得上帝保守耶路撒冷免受灾难。M̄-koh tùi第11节来看,显然并无达tio̍h chit-ê目的,就án-ne in就懊悔了,改变本来ê约定,kā被释放离开ê奴隶koh「掠tńg来」。

三in可能是听tio̍h埃及beh出兵来协防,而巴比伦王因为听tio̍h埃及已经出兵来救援耶路撒冷,就赶紧撤兵。Án-ne,本来讲过而且kā已经决定释放奴隶ê约定之约撕毁,这清楚表示in并无遵守所应允ê约。

第12到14节,chit段经文说明耶路撒冷人民并无照所立ê约去行,in本来讲beh释放奴隶,m̄-koh后来soah koh反悔。头前已经有提起会改变ê原因。M̄-koh这mā说明in并无照所立ê约来遵行,kah in ê「祖先不理」上帝,「m̄听」上帝ê话仝款。

第15到16节,koh一pái重复叙述第8到11节所提起ê,in签约同意beh释放奴隶,m̄-koh无久就反悔了。M̄-nā án-ne,in iáu去kā已经释放ê奴隶koh掠了tńg来。这是非常可恶ê行为,mā是引起上帝忿怒ê原因。

第17节,chit节讲出上帝ê忿怒已经开始,mā说明上帝beh透过「战争、瘟疫kah饥荒」来惩罚in。

第18到19节,chit两节thang参考创世记第十五章10节、17节等等。

Chit两节讲出以色列民族bat kah上帝立性命之约,chit-má却无照所立ê约去做,án-ne kan-taⁿ会为in带来诅咒kah灾难,一点好处mā无。

第20到22节,因为犹大并无遵守所立ê约,因为án-ne,上帝beh「Kā in交hō͘想杀害in ê敌人」,这敌人就是teh指巴比伦帝国。Á这帝国会用非常残酷ê手段对付in,hō͘「in ê尸体kā作飞鸟行兽ê食物」,犹大王西底家kah伊ê臣仆会被巴比伦军队掠去。虽然巴比伦bat因听见埃及大军beh来援助而撤退,m̄-koh上帝会koh一pái「命令巴比伦ê军队开tńg来chit-ê城」,换句话讲,耶路撒冷目前ê解危并m̄是永久ê,只是暂时ê。In会koh一pái tńg来攻打耶路撒冷,hit-ê城会被「占领」,被「烧毁」,kui个犹大境内ê城镇lóng kā「荒废,无人khiā起」。

重新查询 专卷研经 耶利米书系列
错误回报,请联系comm[@]fhl.net