耶利米书 3章19节 到 3章25节   背景资料  上一笔  下一笔
Chit段经文真可能受tio̍h主前第八世纪ê先知何西阿影响,真chē用词kah诗句ê意义上真相近(参考何西阿书十:12、十四:4)。Chit段经文一再看tio̍h上帝对以色列民族呼喊ê声音,希望他拣选ê以色列子民会tńg来到他ê身边,chit种呼吁ê声音,chit种呼吁ê声音所表达出来重要信息:上帝无比ê疼,ná亲像一个慈爱ê老父,teh期待叛逆ê子女tńg来到身边来仝款。M̄-koh chit-ê信息有一个基本前提:以色列民族tio̍h知影认罪、悔改。上帝透过先知传达ê就是chit-ê重要信息,因为无认罪、悔改,就无法度得tio̍h上帝ê怜悯kah赦免。

第19节,「以色列ah,我jōa-ni̍h-á乐意认你作kiáⁿ」,chit句话充分显示出上帝kah以色列民族之间是父子关系。出埃及记第四章22真清楚记载上帝讲以色列人民是他ê「大kiáⁿ」,表示以色列人民tī上帝心目中ê地位siōng-kài重要。

「我认为你会叫阮老父爸」,chit句话已经清楚说明以色列民族否认上帝kah in之间ê父子关系,表示原本ê「父子」关系已经破裂,因为以色列民族「背离」了上帝。

第20节,chia讲以色列民族是上帝ê「bó͘」,上帝是in ê丈夫。「bó͘」一定tio̍h对丈夫忠实,这是因为两个之间有连结成一体bē-tàng分割ê关系(参考创世记二:24)。Chia讲以色列民族竟然对上帝「不忠,像不贞ê bó͘私奔」,表示in除了敬拜上帝,mā同时teh拜偶像神明,就是巴力神明、亚舍女神等,这ná亲像一个cha-bó͘-gín-á同时kah两个以上ê cha-po͘人同睡。

第21节,「山头壳顶有呼声」,这是teh指犹大人民tī山头壳顶设置祭坛拜偶像神明(参考三:2),所发出ê声音。Chia讲in原本拜偶像神明ê声音,chit-má却变成「流目屎哀求」,表示in tú-tio̍h极大ê痛苦而哀哭,原因是in「bē记得上帝」chiah会tú-tio̍h苦难,因为án-ne,chit-má醒悟过来,知影tio̍h悔改。
第22节,chit节用「beh医」一词,譬喻犹大人民ná亲像患tio̍h重大破病仝款,需要医,若无,一定会面临死亡ê来临。

「是!咱beh tńg去到上主hia,因为伊是咱ê上帝。」chit句表明以色列人民已经清楚知影,只有án-ne才能koh一pái重新chhōe-tio̍h性命ê契机。

第23节,所表达是in知影弃sak上帝去拜偶像,是「一点á好处」mā无,chit-má chiah学习tio̍h「独独上主」ē-tàng「拯救以色列」人民脱离亡国ê苦难。

第24节,chit节真清楚说明北国以色列人民因为失去上帝ê庇护,致使国家被灭亡,所有ê一切财产就会丧失,甚至连带丧失ê是「祖先自古以来建立ê一切家业」。注意chia所提起ê,in mā会失去「kiáⁿ」,这是teh指in甚至bat为tio̍h beh追求koh khah chē ê财富,kā「kiáⁿ」当做牲祭献hō͘神明(参考耶利米书七:31,列王记下十六:3、十七:17、廿一:5)。

第25节,chia讲in beh「以见笑作牀铺,以耻辱作被单」,表示侮辱了夫妻原本是圣洁ê牀铺,taⁿ已经因为bó͘悖逆丈夫而hō͘「牀铺」成做「见笑」ê记号。Chit种用「牀铺」来形容,mā是teh表明夫妻同房ê意思,应该是圣洁ê。Á「祖先常常tio̍h罪上主—咱ê上帝」,chit句话真清楚表示以色列人民犯罪,m̄是始自今á日,却是早tī祖先进入迦南地ê时就已经开始(参考何西阿书九:10),in无tńg来归上帝,却是继续犯下kah祖先仝款ê错误。

重新查询 专卷研经 耶利米书系列
错误回报,请联系comm[@]fhl.net